Azərbaycanın İrandakı səfiri Əli Əlizadə həmin ölkənin Xarici İşlər Nazirliyinə çağırılıb. Xarici işlər nazirinin köməkçisi Azərbaycan mətbuatında İran əleyhinə olan qeyri-dost bəyanatlara narazılığını və kəskin etirazını səfirə çatdırıb:
"Biz bu prosesin ən qısa zamanda dayandırılmasını və təkrarlanmaması üçün lazımi tədbirlərin görülməsini gözləyirik", - XİN rəsmisi qeyd edib.
Səfir Əli Əlizadə mövcud vəziyyətdən təəssüfləndiyini bildirərək, İran tərəfinin etirazını dərhal Bakıya çatdıracağını vurğulayıb.
Bizə niyə xəbərdarlıq edilir? Biz onların təxribatına cavab veririk. İranın bu addımına necə cavab verməliyik? Bizim də onların səfirini çağırıb etiraz etməyimiz lazımdırmı?
Müstəqil siyasətçi Bünyamin Qəmbərli “Bakı-Xəbər”ə açıqlamaslnda bildirdi ki, bizin XİN bu məsələdə konkret və sərt mövqe ortaya qoymalıdır: “Azərbaycanın Tehranda olan səfirinin İran xarici işlər nazirliyinə çağırılmasını Azərbaycan Xarici İşlər Nazirliyinin qeyri-məqbul işi hesab edirəm. Uzun illərdir İranın Azərbaycana qarşı təxribatçı bəyənatlarına, mövqeyinə, İran rəsmilərinin düşmən mövqeyi olan açıqlamalarına, İran parlament üzvlərinin Azərbaycana qarşı sərt bəyənatlarına bizim Xarici İşlər Nazirliyinin yetərincə cavab verməməsi, zamanında münasibət bildirməməsi, İranın Bakıda olan səfirini Xarici İşlər Nazirliyinə çağırıb ciddi xəbərdarlıq etməməsi, nota verməməsi, Azərbaycana qarşı düşmən mövqeyində olan mahnıların səsləndirilməsinə reaksiyaların verilməməsi işi gətirib bu vəziyyətə çıxarıb. Bu gün bizim İranın Bakıda olan səfirini Xarici İşlər Nazirliyinə çağırıb, hansısa bir fikir deməyimiz artıq mənasız sayılır. Gecdir, biz yubanmışıq. Eyni zamanda, Azərbaycan hakimiyyətinin Azərbaycan vətəndaşlarının, siyasi qüvvələrin, Qeyri Hökümət Təşkilatlarının İran səfirliyi qarşısında mitinqlərinə, piketlərinə icazə verməməsinin özü də yalnışdır. Azərbaycanın Tehrandakı səfirinin mövqeyi tam fərqli olmalıydı. Nə çatdırmalıdır Bakıya? Səfirimizin orada verəcəyi cavab bu olmalı idi: İranın düşmən münasibətinə Azərbaycanın müdafiə xarakterli çıxışı normaldır. Mən düşünürəm ki, bizim Tehranda olan səfirimiz hətta bundan da sərt cavab verə bilərdi. Çünki mövqeyini əsaslandıra biləcək kifayət qədər dəlillərimiz var”.
Göründüyü kimi, İran molla rejimi növbəti şüvən kampaniyasına keçib. Özünün etdiklərini pərdələmək üçün bizi qabaqlayır. Daha doğrusu, qabaqdangəlmişlik edir. Hər halda, Azərbaycan bu məsələyə rəsmi cavabını verməlidir. Molla rejiminin mediası, televiziyaları bizi hər gün söydükləri halda, bizim mediadakı ritorikadan şikayət edirlər. Onlar öz dövlət kanallarında heç bizim ölkənin adını belə bilərəkdən düz çəkmirlər. Gah “Şimali İran”, gah da “Bakı höküməti” deyirlər. Bizim media yalnız onlara layiq olduğu cavabı verirsə, molla rejimi səhvi özündə axtarmalıdır. İran Silahlı Qüvvələrinin baş qərargah rəisi Azərbaycanı təhdid edir. O, Azərbaycan- Ermənistan mövzusuna toxunaraq, sərhəd dəyişikliyi olarsa, səssiz oturmayacaqlarını vurğulayıb.
Çadranı düzgün geymədiyi üçün öldürülən gənc bir qıza görə hazırda kütəvi iğtişaşların baş qaldırdığı ölkənin yüksək çinli hərbi rəhbəri deyir bu sözü. Bu sözü, 30 ilə yaxın Azərbaycan Respublikası-İran sərhədini amansız işğalda saxlamış Ermənistana "gözün üstə qaşın var" deməyən, tam tərsinə, Ermənistanla qanunsuz işbirliyi içində olmuş hərbi-siyasi rejimin təmsilçisi deyir. Məhəmməd Baqiri nə əcəb, İran düşməni ABŞ-ın yüksək vəzifəli rəsmisi Nensi Pelosinin ətəyindən kömək uman Ermənistan rəhbərliyinə etiraz etmədi? Bütün bunlar göstərir ki, İran obyektivlik axtarmır, hamını öz marağına tabe etdirmək istəyir. Bu da alınan deyil.
Məhəmmədəli QƏRİBLİ
