“Türk dünyası təkcə müstəqil türk dövlətlərindən ibarət deyil. Onun coğrafi sərhədləri daha genişdir. Hesab edirəm ki, TDT üzvləri olan ölkələrdən kənarda yaşayan soydaşlarımızın hüquqlarının, təhlükəsizliyinin, milli kimliyinin qorunması, onların assimilyasiyaya uğraması kimi məsələləri artıq təşkilat çərçivəsində daim diqqətdə saxlamağın vaxtı gəlib çatıb. Türk dünyasında gənc nəslin yaşadıqları ölkələrdə məktəblərdə öz ana dilində təhsil almaq imkanı olmalıdır”.
Bu sözləri Prezident İlham Əliyev Səmərqənddə keçirilən Türk Dövlətləri Təşkilatının IX Zirvə Görüşündə çıxış edərkən deyib.
İ.Əliyev qeyd edib ki, Azərbaycan dövlətinin hüdudlarından kənarda yaşayan 40 milyon azərbaycanlının əksəriyyəti bu imkanlardan məhrumdur. Türk dövlətlərindən kənarda yaşayan soydaşlarımızın öz ana dilində təhsil alması daim təşkilatın gündəliyində olmalıdır: “Bu istiqamətdə lazımi addımlar atılmalıdır”.
Tural İsmayılov: “Ölkə başçısı İlham Əliyev bütün türk dünyasına nümayiş etdirdi ki, dünyanın harasında yaşamasından asılı olmayaraq azərbaycanlıların hüquqları eynidir”
Azərbaycan dövlətinin hüdudlarından kənarda yaşayan 40 milyon azərbaycanlının öz ana dilində təhsil ala bilməməsi barədə fikir bildirən siyasi şərhçi Tural İsmayılov qeyd etdi ki, ölkə başçısı İlham Əliyev bütün türk dünyasına nümayiş etdirdi ki, dünyanın harasında yaşamasından asılı olmayaraq azərbaycanlıların hüquqları eynidir. Həmçinin, onların gələcək problemləri Azərbaycan dövlətinin diqqət mərkəzindədir: “Ölkə hüdudlarından kənarda yaşayan 40 milyon azərbaycanlının böyük əksəriyyəti İranda yaşayır. Bugünədək İran total siyasət həyata keçirərək, azərbaycanlıların ana dili hüquqları daxil olmaqla, bir çox insan haqlarını tapdalamağa davam edir”.
Həmsöhbətimiz hesab edir ki, bu gün Azərbaycan dövləti, xüsusilə 44 günlük Vətən müharibəsində qazandığı qələbədən sonra regional gücdən qlobal gücə çevrilib. Ölkəmizin mövqeləri bir xeyli güclənib: “Belə olan təqdirdə bütün proseslərdə Azərbaycanın vahid mövqeyi formalaşıb. Azərbaycan yalnız Azərbaycanda yaşayan vətəndaşların deyil, bütün azərbaycanlıların ana vətənidir. Hər bir azərbaycanlının ürəyi müstəqil Azərbaycan Respublikası ilə döyünür”.
Dəyanət Osmanlı: “Türk dünyası hüdudlarından kənarda yaşayan soydaşlarımızın hüquqlarının, təhlükəsizliyinin, dil, mədəniyyət, milli-mənəvi dəyərlərinin qorunmasına önəm verilməlidir”
“Türk Dünyası İnfo” İctimai Birliyinin rəhbəri, Atatürk Mərkəzinin baş redaktoru Dəyanət Osmanlı bildirdi ki, Türk Dövlətləri Təşkilatına üzv olan ölkələrin həyatında, qardaşlıq bağlarının möhkəmlənməsində mühüm tarixi hadisələr baş verib: “ Yeniləşən münasibətlər artıq bütün sahələri əhatə edir, elə ona görə də strateji əhəmiyyəti böyükdür.
Prezident İlham Əliyev Zirvə görüşündəki çıxışında Türk dünyası kimi böyük bir ailənin gələcək planlarının müəyyən tezislərini irəli sürdü. Milli maraqlar üzərində siyasi, iqtisadi, ticari, mədəni, nəqliyyat, energetika, rəqəmsal transformasiya, kənd təsərrüfatı, turizm sahələri ilə yanaşı, təhlükəsizlik, müdafiə, müdafiə sənayesi sahələrində də əməkdaşlığın fəallaşdırılması məsələləri önə çəkildi. Eyni zamanda, Prezidentin dövlətimiz hüdudlarından kənarda yaşayan 40 milyon azərbaycanlının əksəriyyəti üçün ana dilində məktəbin olmaması və yaxud bina imkan verilməməsi barədə mesajları da sözsüz ki, təşkilatın bundan sonrakı fəaliyyətində taleyüklü məqam kimi diqqətdə saxlanacaqdır. Türk dünyası hüdudlarından kənarda yaşayan soydaşlarımızın hüquqlarının, təhlükəsizliyinin, milli kimliyinin qorunması, dil, mədəniyyət milli-mənəvi dəyərlərinin qorunmasına önəm verilməsi təşkilatın dünyada böyük söz sahibi olacağından xəbər verir”.
Günel CƏLİLOVA
