Qarabağdakı separatçılar indi də ordu saxlamaq üçün “hərbləşdirmiş zona” terminini ortaya atıblar. Onların “rəhbərliyində” təmsil olunan Artur Arutyunyan deyir ki, Ermənistanın baş naziri Nikol Paşinyan 10 gün əvvəl Soçidə keçirilən üçtərəfli görüşdə Qarabağ separatçılarının bu təklifini təqdim edib:
“Paşinyan demişdi ki, Qarabağın ermənilər yaşayan hissəsi ətrafında beynəlxalq qarantiyaları olan “hərbsizləşdirilmiş zonanın” yaradılmasını istərdi. Baş nazir demişdi ki, əgər bu təklif qəbul edilərsə, separatçılara “bəlkə də indiki miqyasda ordu lazım olmaya bilər”.
Bu təklif barədə suala cavab verən Arutyunyan deyib ki, bugün Rusiya sülhməramlı kontingenti bütün təmas xətti boyunca təhlükəsizliyi təmin edə bilmir, amma əgər “hərbsizləşdirilmiş zona” yaradılarsa, Qarabağda onların ordusu yox, özünümüdafiə dəstələri olar.
Göründüyü kimi, indi də Qarabağdakı erməni separatçıları ordu saxlamaq üçün “hərbləşdirmiş zona” ideyasını ortaya atıblar.
Bu barədə ekspertlər nə düşünür?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, iki gün əvvəl Şuşa şəhərində bizim böyük Zəfərimizin ikinci ildönümü ilə bağlı Prezident İlham Əliyev bir daha onları xəbərdar etdi ki, yanılmasınlar, səhv yollara yenidən qayıtmasınlar: “Azərbaycanın elə imkanları var ki, onları yerində otuzdursun və bu prosesləri sülh yolu ilə həll etsin”. Prezidentimiz qeyd edib ki, Azərbaycan ermənilərlə məsələləri həll etməyə hazırdır. Artıq onların vətəndaş cəmiyyətinin nümayəndələri, nəinki barışıq, həm də Azərbaycanın tərkibində olmağa razılıq vermişdilər. Amma Soçi görüşləri ərəfəsində qondarma bir missiya təşkil olundu. Pul və maliyyə hesabına keçirilmiş bu dəbdəbəli tədbirdə Rusiyanın bəzi dairələri, Fransanın siyasi elitası, digər ölkələrin nümayəndələri də ermənilərə dəstək verdi. Ermənistanın daxilində də bu məsələlərlə bağlı Nikol Paşinyanı günahlandıranlar var. Onun satqın olduğunu və ermənilərin mövqeyini ayaq altına verdiyini düşünürlər. Əslində belə deyil. Bizim zəfərimiz, bizim qələbəmiz bütün məsələlərin həlli ilə bağlı aydın bir mənzərə yaradır. Burada sözü, əlbəttə ki, qalib tərəf deməlidir. Ancaq bəzi dəllalların vasitəsilə status məsələsi gündəmə gəlir. Buna baxmayaraq, Prezident İlham Əliyev bildirdi ki, biz bu mövzuya qayıtmayacağıq. Bu məsələ artıq bitib. Ona görə də, “hərbisəzlişdirilmiş zona” , özünümüdafiə dəstələri bizim üçün qondarma hesab olunur. “Fərrux” əməliyyatı ilə “Qisas” əməliyyatını İlham Əliyev Şuşa şəhərində nahaq yerə yada salmadı. Onlara mesaj göndərdi ki, bütün proseslər bizim nəzarətimiz altında gedir. İstənilən məqamda biz lazımı tədbirləri görəcəyik ki, onlar hədlərini aşmasın. Bəli, Ermənistan yalan danışır. Onun baş naziri Nikol Paşinyan bildirir ki, guya Ermənistanın orda maraqları yoxdu. İrəvanda dəfn edilənlərin 90 faizi Ermənistan vətəndaşları idi. Odur ki, Ermənistan sadəcə məğlub olub, indi də çalışır ki, vaxt udmaqla özünü toparlasın. Ancaq bu yolun axırı yoxdur. Qarabağda yaşayan ermənilər anlamalıdırlar ki, Azərbaycanın qurduğu status dəyişilməz olaraq qalacaq. Bir də Ermənistan baş qaldırsa, gərək öz müqəddəratı ilə bağlı düşünsün”.
Ekspertin sözlərinə görə, başqa variant olmayacaq: “Biz onlara çox güzəşt etdik. 30 il ərzində onlara sülh təklif etsək də, onlar prosesləri uzatdılar. Hərbi təxribatlarını həyata keçirtdilər. 2014 - cü ilin avqustunda ön xətdə böyük canlanma oldu. Biz onların cavablarını verdik.
Nəhayət Tovuz hadisələri və 44 günlük müharibədə bizim möhtəşəm Zəfərimiz göz qabağındadır. Yenə çox dərinə getsələr, biz Laçından keçən yolu bağlayacağıq və orada nəzarət postları quracağıq. Bu bizim ixtiyarımızda olan məsələdir. Bununla bağlı bizə nə Rusiya, nə Amerika, nə də Fransa mane ola bilər. Ərazi bizim ərazimizdir, yaşayanlar da bizim insanlarımızdır. Ona görə də, Şuşa şəhərində Prezidentimizin səsləndirdiyi bəyənatlar, mesajlar hamısı lazımi tərəflərə çatıb. Biz bütün dünyada təsdiqləmişik ki, süveren dövlətik və süverenliyimizin də keşiyində durmağı bacarırıq”.
Məhəmmədəli QƏRİBLİ
