“...Danışıqlara başlamazdan əvvəl Sizi böyük Qələbə - 8 Noyabr günü münasibətilə təbrik etmək istəyirəm. Sizin yaxın dostlarınız kimi biz də bu Zəfəri bayram etmişik”. Bunu Özbəkistan Prezidenti Şavkat Mirziyoyev Azərbaycan Prezidenti İlham Əliyevlə görüşü zamanı bildirib.
Maraqlıdır ki, Azərbaycanın 44 günlük Vətən müharibəsində qazandığı Zəfər türk dünyasının zəfəri kimi xarakterizə edilməyə başlayır. Bu barədə Türkiyənin mövqeyi bəllidir, artıq Özbəkistan da bu zəfərə öz zəfəri kimi münasibət bəsləyir.
“Gerçəkdən bütün türk dünyası Azərbaycanın qazandığı zəfərdən qürur hissi keçirir”
AVCİYA-nın vitse-prezidenti, siyasi şərhçi, professor Məhərrəm Zülfüqarlı bildirdi ki, Azərbaycanın Qarabağ Zəfəri bütün türk dünyasının zəfəri sayılmalıdır. Özbəkistan Prezidentinin Azərbaycanın Zəfəri ilə bağlı verdiyi bəyanatın böyük tarixi əhəmiyyəti olduğunu vurğulayan M.Zülfüqarlı qeyd etdi ki, özünü türk sayan hər kəs bu qələbəni öz qələbəsi bilir. “Özbəkistan Prezidentinin Zəfər Günü ilə bağlı fikirləri, bu qələbəni öz qələbələri sayması çox mühüm əhəmiyyət daşıyır. Gerçəkdən bütün türk dünyası Azərbaycanın qazandığı zəfərdən qürur hissi keçirir. Azərbaycanın qələbəsi bütün türk dünyasının qələbəsinin başlanğıcıdır, biz türk xalqı olaraq hələ qarşıda çox qələbələrə imza atacağıq. Özbəkistan Prezidentinin bu bəyanatı onu göstərir ki, Rusiyanın yaratdığı KTMT-nin üzvləri, o cümlədən də Qazaxıstan da, Qırğızıstan da 44 günlük müharibədə məhz Azərbaycanın yanında oldular. Həmin təşkilatda müttəfiq olduqları Ermənistana dəstək vermədilər. Bu sevindirici haldır. Hesab edirəm ki, gələcəkdə də türk dünyasının, türk dilli respublikaların mədəni, iqtisadi, hərbi əməkdaşlığında bu mühüm rol oynayacaq. Əgər türk dünyası birliyi yaranarsa, türkdilli respublikalar həm iqtisadi, həm mədəni cəhətdən bir-birinə dəstək olarsa, bu, hərbi əməkdaşlığa da keçə bilər. Necə ki, Avropa Birliyi üzvləri var, bu ölkələr bir-birinə dəstək olurlar, türk birliyi də belə bir qurum olar”.
M.Zülfüqarlı hesab edir ki, türkdilli respublikalarla əlaqələrin genişlənməsi çox müsbətdir, bu birlik çox mühümdür. O qeyd etdi ki, orta Asiya ölkələri ilə Azərbaycan arasında əlaqələrin güclənməsi çox müsbətdir. “Prezident İlham Əliyevin Özbəkistana səfəri, Naxçıvanda yaranmış Türk akademiyasına istinadən yeni qurumun inkişafı ilə bağlı danışıqların aparılması türk dünyası üçün böyük dəyərə malikdir. Bu işi birbaşa izləyən adam kimi deyə bilərəm ki, Orhon-Yenisey abidələrinin təbliği, türk iş adamlarının (TİKA) həmin abidəni mühafizəyə götürməsi, Azərbaycan, Türkiyə, Qazaxıstan, Özbəkistan və digər türkdilli respublikaların alimlərinin orda tədqiqatları məhz Naxçıvanda yaranan Türk Akademiyasının adı ilə bağlıdır. İndi həmin məsələlərin bilavasitə Özbəkistanda, türk dünyasının mədəniyyət mərkəzlərindən biri olan Səmərqənddə müzakirəsi hamımızı sevindirir”.
İradə SARIYEVA
