Ermənistan Milli Assambleyasının Avropaya inteqrasiya üzrə Daimi Komitəsinin sədri Arman Eqoyan Litvanın xarici işlər naziri Qabrielius Landsberqisin dəvəti ilə noyabrın 9-10-da Vilnüsdə “Gələcəyin Demokratiyası" tədbirində iştirak edib.
Otuza yaxın ölkə və təşkilatın nümayəndələrinin iştirakı ilə keçirilən konfransda demokratik dövlətləri və sistemləri təhdid edən müasir çağırışlar və onların aradan qaldırılması yolları müzakirə olunub.
Yaranmış fürsətdən istifadə edənA.Eqoyan tədbirdə Azərbaycana qarşı əsassız ittihamlar səsləndirib. Belə ki, o, Azərbaycanın Ermənistana “hücumunun” məqsədlərini və əsas "motivlərini" və Bakının" işğalçı siyasətini" təqdim edib.
Görünən odur ki, Ermənistan özü işğalçı ölkə ola-ola, Azərbaycanı işğalçı kimi qələmə verir və böhtan atır. Halbuki, səslənən ittihamların yaxından-uzaqdan Azərbaycanla heç bir əlaqəsi yoxdur. Təəssüf doğuran məqam həm də ondan ibarətdir ki, Litva Azərbaycanla strateji tərəfdaş olmağına rəğmən, ermənilərə bu kimi tədbirlərdə Azərbaycanın ünvanına iftira atmasına şərait yaradır. Bu da, istər-istəməz, iki ölkə arasında olan strateji tərəfdaşlıq münasibətlərinə kölgə salır. O üzdən Litva bu amili nəzərə almalı idi.
“Ermənilər istənilən beynəlxalq tədbirdən öz məqsədləri üçün sui-istifadə edirlər”
Məsələyə münasibət bildirən İrəvan Azadlıq Təşkilatının sədri Təbriz Musayevin fikrincə, prinsipcə, belə halların baş verməsi yolverilməzdir: “Yəni strateji tərəfdaş ölkələr bu kimi məsələləri nəzərə almalıdılar. Tədbirin gündəliyi hazırlanarkən buna diqqət edilməlidir. Yox əgər bu yoxdursa, o zaman Azərbaycana cavab haqqı tanınmalıdır. Ermənistandan kimsə tədbirə dəvət olunursa, analoji olaraq Azərbaycandan da tədbirdə iştirakçı olmalı idi. Məsələnin digər tərəfi ondan ibarətdir ki, ermənilər istənilən tədbirdən sui-istifadə edirlər. Xüsusən də beynəlxalq tədbirlərdən. Platformanını formatına uyğun oldu-olmadı Qarabağdan danışırlar, Azərbaycanı ittiham edirlər, separatçı qurumu təbliğ edirlər. Hər vasitə ilə bundan təbliğat məqsədi üçün istifadə edirlər. Hətta idman yarışlarında belə, bu kimi təxribatlarsa əl atırlar. O baxımdan Litvada yaşananlara həm də bu konteksdən yanaşmaq lazımdır. Nəzərə almaq lazımdır ki, bunlar xəstə toplumdular. Harada olmalarından, hansı sahədə fəaliyyət göstərmələrindən asılı olmayaraq antitürk mövqedən çıxış edirlər. İkinci Qarabağ müharibəsində üzləşdikləri məğlubiyyət bunlara dərs olmayıb. Müşahidələr göstərir ki, get-gedə onlar daha da quduzlaşırlar. Ancaq harada olmasından asılı olmayaraq qarşı tərəfin cavabı verilməlidir. Çünki Avropa ölkələrində son dövrlər erməni lobbisinin himayəsi ilə Azərbaycana qarşı təbliğat xeyli güclənib. Bütün bunların nəticəsi idi ki, bu günlərdə İspaniya parlamenti Azərbaycanla bağlı xoşagəlməz addım atdı. Ona görə də müharibəni udmuşuq deyə arxayın olmaq olmaz”.
Bu baxımdan İAT sədri hesab edir ki, Azərbaycan diplomatik müstəvidə səylərini artırmalıdır.
Vidadi ORDAHALLI
