“Bütövlükdə götürəndə, 44 gün ərzində müharibə ilə bağlı beynəlxalq yanaşma müsbət idi”. Bunu Prezident İlham Əliyev Zəfər Günü münasibətilə Şuşada təşkil olunan tədbirdə hərbçilər qarşısında çıxışı zamanı deyib.
Ölkə başçısının sözlərinə görə, bəzi ermənipərəst ölkələr bizə qarşı bəzi siyasi addımlar atmağa çalışsalar da, bu bir səmərə vermədi: “Bir çox ölkələrlə ikitərəfli formatda sıx əməkdaşlıq əlaqələri yaratmışıq, həm yerləşdiyimiz bölgədə, həm də digər qitələrdə. Beynəlxalq əlaqələr və Azərbaycanın beynəlxalq nüfuzu bizə imkan verdi ki, daha çox dostlar qazanaq, eyni zamanda, Qarabağ həqiqətlərini, erməni işğalı ilə bağlı həqiqətləri dünya birliyinə çatdıraq və çatdırdıq. Bütövlükdə götürəndə 44 gün ərzində müharibə ilə bağlı beynəlxalq yanaşma müsbət idi. Düzdür, bəzi ermənipərəst ölkələr və Ermənistanla yaxın əlaqələrdə olan ölkələr bizə qarşı bəzi siyasi addımlar atmağa çalışırdılar. Amma onlar da heç bir səmərə vermədi. Çünki biz bu illər ərzində güclü beynəlxalq dəstək qazandıq. Biz Qoşulmama Hərəkatına sədr seçildik. Bizim sədrliyimiz yekdil qərarla təsdiqləndi. Sədrliyimiz yekdil qərarla daha bir il uzadıldı. Bu da dünya birliyinin əksər hissəsini birləşdirən beynəlxalq təsisatdır. Bu təsisata 120 ölkə üzvdür”.
Görünən odur ki, Vətən müharibəsi dönəmində Ermənistanla yaxın əlaqələri olan bəzi dövlətlər Azərbaycana qarşı müəyyən siyasi addımlar atmağa çalışsalar da məqsədlərinə çata bilməyiblər. Maraqlıdır, onların bu addımlarının səmərəsiz olması nəyin hesabına olub?
Məsələyə münasibət bildirən “İki sahil” qəzetinin baş redaktoru Vüqar Rəhimzadə hesab edir ki, bir sıra faktorların hesabına bəzi dövlətlərin Azərbaycana qarşı siyasi addımları fiaskoya uğradı: “Başlıca səbəb o idi ki, Azərbaycan beynəlxalq hüquqa söykənərək ərazi bütövlüyünü təmin edirdi. Ortada BMT-nin 4 qətnaməsi var idi. Ölkəmiz məsələnin sülh yolu ilə həll edilməsi ilə bağlı nə mümkündürsə onu etdi. Ancaq Ermənistan tutduğu destruktiv mövqedən geri çəkilmədi. Belə olan halda Azərbaycanın müharibə yolu ilə öz ərazilərini azad etməkdən başqa çıxış yolu yox idi. Bununla yanaşı, Azərbaycan etibarlı tərəfdaş olduğu üçün bəzi dövlətlərin planları baş tutmadı. Məsələ ondadır ki, Prezident İlham Əliyevin uğurlu xarici siyasəti sayəsində Azərbaycanla tərəfdaşlıq edən ölkələrin sayı artdı. Ölkəmizin beynəlxalq müstəvidə nüfuzu artdı. Ərazi bütövlüyümüzlə bağlı təkcə sözdə deyil, əməldə də konkret mövqe sərgiləyən ölkələrin sayı çoxaldı. Xüsusən də Qoşulmama Hərəkatında təmsil olunan ölkələrin Azərbaycanla bağlı sərgilədikləri həmrəylik bu baxımdan mühüm əhəmiyyət kəsb edir. Məhz həmin dövlətlərin ortaya qoyduğu mövqe müharibə dövründə BMT-də Azərbaycana qarşı qətnamə qəbul olunmasına imkan vermədi. Çünki Azərbaycan həmin ölkələr içində böyük nüfuza malikdir. Həmin dövrdə Azərbaycanla bağlı ədalətsiz mövqedən çıxış edən ölkələr bu gün də o mövqedədilər. Məsələn, Fransa. Müharibə dönəmində də ölkəmizə qarşı siyasət aparırdı, bu gün də ona uyğun olaraq Ermənistana himayədarlıq edir”.
Vidadi ORDAHALLI
