İranda etiraz aksiyalarının mindən çox iştirakçısına hökm çıxarılıb. Bu barədə İran məhkəmə sisteminin sözçüsü Məsud Sitayişi deyib.
İttiham hökmü ərəfəsində İran parlamentinin deputatları açıq məktubla İranın Ali Milli Təhlükəsizlik Şurasına müraciət edərək, etirazçılarla mümkün qədər tez məşğul olmağa, onları terrorçularla müqayisə etməyə və qisas almağa çağırıblar:
“Biz - bu xalqın nümayəndələri ölkənin bütün hakimiyyət orqanlarından, o cümlədən ədliyyə orqanlarından İŞİD üzvləri kimi vətəndaşlarımızın təhlükəsizliyini soyuq və odlu silahlarla təhdid edən yaraqlılarla tez bir zamanda mübarizə aparmağı xahiş edirik”.
Bu fakt İranda diktaturanın hökm sürdüyünü subut edən mötəbər dəlil sayıla bilərmi?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, sentyabrın 13-də hicab taxmadığı üçün döyülərək komaya düşən və sentyabrın 16-da dünyasını dəyişən Məhsa Əmini ilə bağlı etiraz aksiyaları hələ də davam edir: “Bu aksiyalar zamanı İran fars molla rejimi əsasını qadınlar təşkil edən üç yüzə qədər etirazçını qətlə yetirib. 15 minə yaxın etirazçı həbs olunub. Bu onun göstəricisidir ki, İran molla rejimi dövləti idarə edə bilmir. Əhali artıq bu rejimdən doyub, bezib və etiraza qalxıb. Burda söhbət baş örtüsü ilə yanaşı, ümumiyyətlə indiki hakimiyyətin dövləti idarə edə bilməməsindən gedir. Artıq milli azadlıq hərəkatı başlayıb. İran dövləti yaranandan bugünə özlərini islam dövləti kimi göstərməyə çalışsa da, onların əsli hamıya bəllidir. Erməniylə qardaş olan, eyni dinə, eyni amala xidmət edən fars molla rejimi erməni faşistləri ilə birləşərək, 30 il müddətində Azərbaycan xalqına çox zülmlər ediblər. Bizim torpaqlarımızın zəbt olunmasında ermənilərə yardımçı olaraq, onlara silah - sürsat, ərzaq veriblər. İran öz varlığı ilə ətrafda olan ölkələrə ciddi təhdidlər yaradır. Ermənistanın təhlükəsizliyi bizim təhlükəsizliyimizdir deyən fars molla rejimi öz din qardaşlarına arxa çevirərək, erməniləri özlərinə qardaş bilir. İran hər zaman terroru dəstəkləyib və öz xalqına belə zülmlər edib. Artıq xalq bu əzabdan qurtulmaq istəyir. Ona görə də, hakimiyyətin dəyişilməsi qaçılmazdır. Təsəvvür edin ki, 15 minə yaxın saxlanılan var. İran parlamentinin 290 nəfərdən ibarət üzvündən 227 - si həbs olunanlara ən ağır cəza - edam verilməsini tələb edir. Bu heç zaman mümkün ola bilməz. Artıq bu barədə ABŞ prezidenti Co Bayden etirazçılara səslənərək, "Biz sizi azad edəcəyik" dedi. Azərbaycan Prezidenti İlham Əliyev İran rəhbərliyinin riyakar olduğunu dilə gətirdi. Azərbaycan din rəhbəri Şeyxlüslam Allahşükür Paşazadə din qardaşlarının arxadan zərbə vurduqlarını etiraf etdi. Yəni bütün bunlar onu göstərir ki, artıq İranda başlanan etiraz aksiyaları milli azadlıq hərəkatına çevriləcək. İran yaxın zamanda Cənubi Azərbaycan, Kürd və Fars Respublikalarına parçalanmalıdır. İndiki hakimiyyətin ömrünü uzadacaq heç bir yol yoxdur. Təbii, bəzi siyasi ekspertlər, politoloqlar bildirirlər ki, İran bu vəziyyətdən çıxmaq üçün ancaq hansısa ölkə ilə müharibə edə bilər. Onu demək istəyirəm ki, İranın Səudiyyə Ərəbistanına qarşı belə bir istəyi var. Ərəbistanı darmadağın etməyi düşünürlər. Amma bu da onların sonunu gətirəcək bir məsələ olacaq. Ona görə də, əminlikə bildirə bilərəm ki, terrorizmə daim dəstək verən, terrorla məşğul olan İran adlı bir ölkə yaxın zamanda tarixdə olmayacaq”.
Məhəmmədəli QƏRİBLİ
