Tehran rejimi Azərbaycan dövlətinin uğurlarına hər zaman qısqanclıqla yanaşıb və ölkəmizdə qarışıqlıq yaratmaq üçün bütün vasitələrdən istifadə edib. O cümlədən də ölkəmizdə öz casus şəbəkəsini formalaşdırmaq üçün əlindən gələni edib.
Gizli deyil ki, mollakratiyanın emissarları müxtəlif adlar altında mövcud olub. Çox eşitmişik ki, molla rejimi əlaltılarını maliyyələşdirir və onlara vəsait ödəyir. Mətbuatda gedən məlumata görə, İran Bakıdakı əlaltılarına yüz minlərlə avro göndərib. Bu barədə “Azfront”un məlumatında qeyd edilir ki, İran Azərbaycandakı əməliyyatçılarına yüz minlərlə avro ödəyib. Məlumata görə, İranın “Black Rewards” haker qrupu bu ölkənin Mədəniyyət və İslami Əlaqələr Təşkilatının Azərbaycandakı iranlı əməliyyatçılara ödənişləri ilə bağlı daxili sənədlərini dərc edib. Bu sənədlər adıçəkilən təşkilatın rəsmi blankında Məhəmməd Fəth Əliyə (xarici işlər nazirinin maliyyə və inzibati işlər üzrə müavini) ünvanlanmış məktublardır.
Sənədlərdə iranlı əməliyyatçıların müxtəlif ölkələrdəki hesablarına yüz minlərlə avronun köçürülməsi tələbi var. O cümlədən, 2022-ci ilin yanvar və mart aylarında Bakıya 47 158 və 75 000 avro, Naxçıvana isə 15 083 və 30 000 avro köçürülüb. 2022-ci ilin aprelində Bakıya daha 40.000 avro köçürülüb. 2022-ci ilin aprelində Moskvaya da 40.000 avroluq transfer var.
Köçürmələr İran Dövlət Bankından həyata keçirilib.
“Hətta beş-altı il bundan əvvələ qədər Azərbaycanda fəaliyyət göstərən şiə axundlarının əksəriyyətinə Ocaqnejati tərəfindən...”
Mövzuya şərh verən Milli Cəbhə Partiyasının sədr müavini, tanınmış ilahiyyatçı Tural İrfan “Bakı-Xəbər”ə bildirdi ki, İranın Azərbaycandakı əlaltılarına pul göndərməsi, onları maliyyələşdirməsi məsələsi yeni deyil: “Son vaxtlar bu şəbəkə ifşa olunub, sənəd ortaya çıxıb, konkret fakt təqdim edilib. Əvvəllərdən məlumdur ki, İran Azərbaycanda öz maraqlarını həyata keçirmək, əsasən məzhəb intriqası yaratmaq üçün öz emissarlarına pul göndərir, onların hesabına vəsait yatırır. İran bunu təkcə Azərbaycanda yox, başqa ölkələrdə də edir. Bu uzun illərdən bəridir ki, mövcuddur. Son dövrlərdə İrandan gələn maliyyəyə nəzarət gücləndikdən sonra hətta Rusiya vasitəsilə buradakı adamlarına pul göndərməyə başladılar. Tehran rejiminin Rusiyada da kifayət qədər adamları var. Mümkündür ki, İrandan Rusiyaya, Rusiyadan da Azərbaycana müxtəlif yollarla pul gətirilir. Molla rejimi burada müxtəlif “Hüseyniyyə”lər, məscidlər, dini ocaqlar açılması, həmin şəxslərin burada intriqa, məzhəb düşmənçiyi yaratması üçün həmin maliyyəni yatırıb. İrandan maliyyə alıb onun əlaltısı olan şəxslər ölkəmizin müxtəlif yerlərində bu cür təxribatlara başlayıblar. Məsələn, dinlə, islamla heç bir əlaqəsi olmayan təsadüfi adamlara “seyidlik” şəcərəsi düzəldiblər, onların həyətlərində gətirilib qəbir qurulub ki, guya bura pirdir, ziyarət yeridir. Bütün bunlar İranda hazırlanıb. Hətta qondarma seyidlərin həyətində ziyarətgahlar da düzəldilib. Yəni molla rejimi tərəfindən agentura şəbəkəsinin bir hissəsinə ölkəmizdə belə şəraitlər yaradılıb. Dini zəmində olanlara belə dəstək olunub. Başqalarına da bəzi işlər tapşırılıb və bu işlərin icrası üçün də həmin pullar gətirilib. Hətta beş-altı il bundan əvvələ qədər Azərbaycanda fəaliyyət göstərən şiə axundlarının əksəriyyətinə Ocaqnejati tərəfindən təxminən 120 manata yaxın pul verilirdi. Bunu Qafqaz Müsəlmanları İdarəsi də, başqa qurumlar da bilirdi. Bunu hansısa ad altında edirdilər ki, guya bu, din adamlarına onların yardımıdır. Bakı İslam Universiteti yeni fəaliyyət göstərən vaxtlarda ora İranın maliyyə yardımı olmuşdu. İrandan gələn puldan təqaüd verilirdi. Düzdür, müstəqilliyimizin əvvəllərində din adı ilə verilən vəsaitlər başqa şəkildə qəbul olunurdu. Ərəblərin çadır şəhərciklərində yaşayanlara dəstəyi vardı, eyni zamanda onlar da dini mədrəsələr açmışdılar. Deyək ki, Türkiyənin də bir çox təriqətçi ruhani təbəqəsinin Azərbaycanda məktəbləri, mədrəsləri vardı. Bunlar ölkəmizin zəif dövrlərində belə idi. Biz də etibar edirdik ki, müsəlman qardaşlarımızdır, bunlar gəlib burada bizə kömək edir. Düzdür, müəyyən işlərə yardım göstərsələr də, sonradan gördük ki, bunlar din pərdəsi altında ayrı-ayrı işlər görürlər. O vaxt İranın özünün burada “İmdad” Cəmiyyəti vardı, guya ki, qızlara cehiz alırdılar, kasıb adamlara ev tikirdilər və sair. Sonradan məlum oldu ki, onlar həmin adamları öz əlaltılarına çevirmək, özündən asılı etmək üçün fəaliyyət göstərirlər. Siz təsəvvür edin ki, xarici ölkələrdən birində olarkən belə bir məsələ ilə rastlaşdım: İrana məxsus bir dini təhsil ocağı vardı. Oranın qəbul şərtlərindən biri nə olsa yaxşdır? Kim ora qəbul olub oxuyursa, bu məktəbi yarımçıq tərk edəcəkcə o məktəbin ona çəkdiyi xərcin hamısını geri ödəməlidir. Ödəmədiyi təqdirdə adam öldürtdürülür. Lazım gəlsə, o təhsil ocağının adını da çəkə bilərəm. Bilmirəm indi o fəaliyyət göstərir, yoxsa göstərmir”.
O vaxt bu məktəbin din pərdəsi altında agent yetişdirdiyini deyən T.İrfan bildirdi ki, İranın Azərbaycana necə, hansı yollarla və kimlərə vəsait göndərdiyi, maliyyə dəstəyi verdiyi araşdırılmalıdır. “Bilirsiz ki, şəxsən mənim özümü də Qumdan dəfələrlə təhdid ediblər. İndi axtarışda olan Əkrəm Hacızadə adlı o şəxs və irançılar illər əvvəl də, son dövrlər də məni təhdid etdilər, hətta məni Yasamal qəbirsitanlığına çağırdılar…Ziya Bünyadovun qətlindən tutmuş bir çox cinayətlərin törədilməsində əslində İranın əli var. Bunun da hamısının arxasında maliyyə dayanır. Tehran rejimi tərəfindən maliyyələr, şübhəsiz ki, kimisə qətlə yetirtmək, kimisə terror etmək, Azərbaycan dövlətinin əleyhinə təxribat həyata keçirmək üçün həmin şəxslərə göndərilib. Onlara yeyib-işmək üçün o pullar göndərilməyib. Təəssüf edirəm, deyəsən bu ölkədə İran və Rusiya meylli müəyyən məmurlar var ki, onların əlaltıları kimi bu məsələlərə göz yumublar. Biz də müşahidə etmişik ki, bu adam İranın agentura şəbəkəsinin üzvüdür və dövlətimizin altına bomba qoyur, amma bəzi məmurlar bunu gördükləri halda görməmiş kimi davranıblar. Biz də şübhələnmişik ki, xeyir ola bu adama göz yumulur, şərait yaradılır? Nümunə də çəkə bilərik. Rayonlarda da müşahidə etmək olur ki, İran tərəfindən göndərilən maliyyə ilə özünə cah-cəlal qurub oturan şəxslər var və onlar İranın tələblərini həyata keçirirlər...”-deyə T.İrfan bildirdi.
İradə SARIYEVA
