“Müsəlman aləmində biz Ermənistanı əsas dayaqlardan təcrid etdik. Düzdür, tam təcrid edə bilmədik, bunun başqa səbəbləri var”. Bunu Prezident İlham Əliyev Zəfər Günü münasibətilə Şuşada təşkil olunan tədbirdə hərbçilər qarşısında çıxışı zamanı deyib.
Ölkə başçısının sözlərinə görə, Azərbaycan islam ölkələri ilə geniş əlaqələr qurub: “Biz müsəlman ölkələri ilə sıx əlaqələr qurduq və onlara izah etməyə nail olduq ki, Ermənistan təkcə bizə qarşı yox, bütün müsəlman aləminə qarşı təcavüzkar siyasət aparır. Məscidləri dağıdan müsəlman ölkələri ilə dost ola bilməz. Məscidləri dağıdana müsəlman ölkələrinin rəhbərləri qucaq aça bilməz, bilər? Onları qucaqlayıb öpə bilər? Bu riyakarlıqdır, bu satqınlıqdır. Bunun başqa adı yoxdur. Ona görə müsəlman aləmində biz Ermənistanı əsas dayaqlardan təcrid etdik. Düzdür, tam təcrid edə bilmədik, bunun başqa səbəbləri var - bax, dediyim riyakarlıq. Ancaq bütövlükdə Ermənistan müsəlman aləmində məscidləri dağıdan, təhqir edən ölkə kimi tanındı və bunu biz etdik”.
Bütün bu deyilənlərin fonunda Ermənistanı müsəlman aləmindən tam təcrid edə bilməməyimizin səbəbi nə ilə bağlıdır?
“Bəzi ərəb dövlətlərində ermənilər kompakt yaşadıqları üçün diaspor təşkilatları qurublar”
Sözügedən məsələni “Bakı-Xəbər”ə şərh edən Aydınlar Partiyasının sədri Qulamhüseyn Əlibəyli bunun səbəbini bir sıra faktorlarla əlaqələndirdi: “Başlıca amil İranın təcavüzkar Ermənistanı himayə etməsi ilə bağlıdır. Reallıq odur ki, İran özünü Ermənistanın qardaşı hesab edir. Görünür, farslarla ermənilərin soykökləri eynidir, bir-birinə yaxındılar. Azərbaycan sözündən qorxuya düşən fars molla rejimi Ermənistanı himayəyə götürüb. Bütün vasitələrlə Ermənistanı qorumağa çalışır. Tehran rejimi işğalçı Ermənistanı ona görə qoruyur ki, Azərbaycan sözündən qorxur. Azərbaycanı dövlət kimi görmək istəmir. Özü də bu, farsların tarixən apardıqları siyasətin tərkib hissəsidir. Birinci Qarabağ müharibəsi dövründə İran Ermənistanın silah və yanacaqla təmin olunmasına hər cür yardım edib. Həmin siyasət 44 günlük Vətən müharibəsi dönəmində də davam etdirildi. Başqa bir tərəfdən, ərazilərimiz işğal altında olanda Qarabağda qanunsuz narkotik ticarəti genişləndi. Bu məsələdə İran birbaşa olaraq iştirak edirdi. Ona görə də İranla Ermənistanın mövqeləri Azərbaycana münasibətdə uzlaşır. Çalışırlar ki, Ermənistan dünyadan təcrid olmasın. Bəzi ərəb dövlətlərinin Ermənistanla yaxınlığına gəldikdə isə, bunun müəyyən səbəbləri var. İş ondadır ki, bəzi ərəb dövlətlərində ermənilər kompakt yaşadıqları üçün diaspor təşkilatları qurublar. Məsələn, Livanda, Suriyada, İordaniyada ermənilərin lobbiləri formalaşıb. Onların illərlə apardıqların siyasətin nəticəsidir ki, Ermənistanla bəzi ərəb ölkələri arasında ənənəvi münasibətlər, əlaqələr formalaşıb. Bu səbəbdən, əfsuslar olsun ki, bəzi müsəlman ölkələri Ermənistana qucaq açır. Halbuki, Ermənistan islam irsinə qarşı vandalizmlə məşğuldur”.
Partiya sədri onu da əlavə etdi ki, Azərbaycan diplomatik müstəvidə Ermənistanın bəzi müsəlman ölkələrlə yaxın əlaqələr qurmasını önləməyə çalışmalıdır.
Vidadi ORDAHALLI
