“...Zəngəzur dəhlizi Ermənistanın öhdəliyidir, öz üzərinə öhdəlik götürüb...” Bunu noyabrın 8-də Prezident İlham Əliyev Zəfər Günü münasibətilə Şuşada təşkil olunan tədbirdə çıxışı zamanı deyib. Azərbaycan Prezidenti çıxışında bir daha bəyan etdi ki, Zəngəzur dəhlizinin açılması Ermənistanın öhdəliyidir.
Bəli, Ermənistan bu öhdəliyi mütləq yerinə yetirməlidir. Lakin bunu yerinə yetirmək əvəzinə, ermənilər yenidən pozuculuq etmək istəyir, amma heç nədən boyun qaçıra bilməzlər, bu onların öhdəliyidir. Qeyd ediliyi kimi, Ermənistan yenə pozuculuq edir. Belə ki, Ermənistan parlamentinin Xarici Əlaqələr Komissiyasının sədri, hakim “Vətəndaş müqaviləsi” partiyasından olan deputat Eduard Ağacanyan “Azadlıq” radiosunun erməni xidmətinə açıqlamasında “Ermənistanın Zəngəzur dəhlizi vermək öhdəliyi yoxdur. Ermənistan Zəngəzur dəhlizi ilə bağlı heç vaxt belə bir öhdəlik götürməyib. Söhbət yolların açılmasından gedir. Dəhlizi Ermənistan üçün qırmızı xətdir. Laçın dəhlizi heç bir halda Zəngəzur dəhlizi ilə müqayisə oluna bilməz. Bu məsələ ilə bağlı mövqeyimiz heç vaxt dəyişməyib və dəyişməyəcək”- deyə sərsəmləyib.
“Sonda Ermənistan həmin öhdəlikləri həyata keçirmək məcburiyyətində qalacaq”
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru Mətin Məmmədli “Bakı-Xəbər”ə şərhində bildirdi ki, noyabrın 10-da üçtərəfli bəyanatın imzalanmasından iki il ötür və bəyanatın bəndlərindən biri də regional kommunikasiyaların açıqlması ilə bağlıdır. “Daha dəqiq desək, Zəngəzur dəhlizinin açılması məsələsini Ermənistanın hökumət başçısı üçtərəfli bəyanatla öhdəlik olaraq öz üzərinə götürüb. Təəssüf ki, həmin bəyanatın bəzi bəndləri Ermənistan tərəfindən həyata keçirilməyib, o cümlədən də Zəngəzur dəhlizinin, regional kommunikasiyaların açılması. Ermənistanda istər baş nazir səviyyəsində, istərsə də, digər dövlət rəsmiləri, o cümlədən də, qeyd etdiyiniz kimi, parlamentdə hakim partiyanın təmsilçisi belə bir fikirlər səsləndirib ki, Laçın dəhlizi ilə Zəngəzur dəhlizi müqayisə oluna bilməz, Zəngəzurda dəhliz açıla bilməz və sair. Bu, baş nazir də daxil olmaqla, Ermənistan hakimiyyət nümayəndələrinin iki ildir davam etdirdiyi bir mövqedir. Təbii ki, bu mövqenin heç bir əsası yoxdur. Qeyd etdiyimiz kimi, üçtərəfli bəyanatın 9-cu bəndində Zəngəzur dəhlizinin açılaması məsələsi açıq-aydın ifadə olunub. Yəni burda dəhliz sözü işlədilməsə də, maneəsiz gediş-gəlişdən bəhs olunur. Maneəsiz gediş-gəliş də beynəlxalq hüquqda dəhlizin hüquqi rejiminə aid olan məsələdir. Təbii ki, Ermənistan üzərinə götürdüyü öhdəliyi həyata keçirməməklə bütövlükdə bölgədə kövrək olan sülh proseslərinə də zərbə vurur. Bununla da iki ölkə arasında münasibətlərin normallaşmasına əngəl olur. Azərbaycanın mövqeyi isə dəyişməzdir. Bəli, biz üçtərəfli bəyanatın tam olaraq həyata keçirilməsində maraqlıyıq. Bu gün Azərbaycan öz üzərinə götürdüyü öhdəlikləri yerinə yetirib. Cənab Prezident də o kontekstdə qeyd edir ki, Ermənistan üzərinə götürdüyü öhdəlikləri tam olaraq yerinə yetirməlidir. Yetirməyəcəksə, bölgədə təbii ki, gərginliklər də artacaq”.
M.Məmmədlinin sözlərinə görə, Azərbaycan diplomatiyasının da hədəfi son iki ildə və perspektivdə buna yönəlib və yönələcək ki, üçtərəfli bəyanat Ermənistan tərəfindən tam olaraq həyata keçirilsin. “Ermənistan hökumətinin müxtəlif bəhanələr gətirərək bu öhdəliyi həyata keçirməməsi nə Ermənistana, nə də bölgədə sülh təşəbbüslərinə xidmət edir. Ancaq düşünürəm ki, hər halda sonda Ermənistan həmin öhdəlikləri həyata keçirmək məcburiyyətində qalacaq”- deyə M.Məmmədli vurğuladı.
İradə SARIYEVA
