Biz bu iki il ərzində heç bir ölkədən, heç bir təşkilatdan, heç bir donordan bir manat belə yardım almamışıq. Bunu Prezident İlham Əliyev Zəfər Günü münasibətilə Şuşada təşkil olunan tədbirdə hərbçilər qarşısında çıxışı zamanı deyib.
Dövlət başçısının sözlərinə görə, indi dünyada müxtəlif yerlərdə gedən iqtisadi proseslər, çətinliklər, böhranlar onu göstərir ki, Azərbaycan iqtisadiyyatı dayanıqlı iqtisadiyyatdır: “Belə ağır müharibədən çıxmış ölkə azad edilmiş torpaqlarda iki il ərzində genişmiqyaslı quruculuq işləri aparır. Bütün bu işlərin də maliyyə mənbəyi Azərbaycan büdcəsidir. Biz bu iki il ərzində heç bir ölkədən, heç bir təşkilatdan, heç bir donordan bir manat belə yardım almamışıq. Əlbəttə, əgər kimsə yardım etmək istəsə, biz etiraz etmərik. Ancaq heç kim bizə yardım etmir və etməyəcək. Güclü iqtisadiyyat ordu quruculuğunda əsas amillərdən biridir. Biz bunu etdik, yaratdıq və iqtisadi asılılığı tamamilə aradan qaldırdıq. Əgər biz kimdənsə iqtisadi cəhətdən asılı olsaydıq, müharibəni uğurla başa vura bilməzdik”.
Həqiqətən də müharibədən sonra bərpa və digər işlərlə bağlı Azərbaycana beynəlxalq donor təşkilatları, böyük dövlətlər maliyyə yardımı etmir. Halbuki, bu onlar üçün adi bir işdir.
Maraqlıdır, Azərbaycana müharibədən sonra maliyyə yardımının edilməməsinin səbəbi nə ilə bağlıdır? Bunun kökündə nə dayanır?
“Beynəlxalq donor təşkilatları bütün bunları görməzdən gəlir və erməni lobbisinin əlində alətə çevriliblər”
Sözügedən məsələyə aydınlıq gətirən politoloq Tural İsmayılov buna bir neçə aspektdən yanaşdı: “Bütün bunlar Azərbaycana münasibətdə dünyadakı ədalətsizliyi ortaya qoyur. Əslində müharibədən sonra Azərbaycanın üzləşdiyi erməni terrorunun miqyasının nə qədər böyük olduğu ortaya çıxdı. Məsələ ondadır ki, torpaqlarımız işğal altında olanda Qarabağda təkcə infrastruktur məhv edilməyib. Eyni zamanda Azərbaycanın ekologiyasına, təbii sərvətlərinə qarşı böyük bir cinayət həyata keçirilib. Həmçinin həmin ərazilərin kütləvi formada minalanması onların təmizlənməsi ilə əlaqədar böyük vəsaitlər tələb edir. Düzdür, Azərbaycanın regionun ən güclü dövləti olması səbəbindən bizim kiminsə iqtisadi yardımına ehtiyacımız yoxdur. Ancaq bu heç də o demək deyil ki, bərpa işlərinə, minaların təmizlənməsinə xarici yardım olmamalıdır. Bu düzgün deyil. Ona görə də beynəlxalq təşkilatlar minaların təmizlənilməsi, ekologiyaya vurulan ziyanın aradan qaldırılması, bərpa işləri məsələsində Azərbaycana yardımlar etməlidir. Ancaq biz görürük ki, beynəlxalq donor təşkilatları bütün bunları görməzdən gəlir. Erməni lobbisinin əlində alətə çevriliblər. Başqa bir tərəfdən, Azərbaycan və Türkiyənin güclənməsi, bu iki ölkənin birliyinin dünyadakı siyasi proseslərə nizam verməsi beynəlxalq təşkilatları narahat edir. Azərbaycana indiyə qədər vəsaitin ayrılmamasının bir səbəbi də bununla bağlıdır. Bu, həm də dünyada beynəlxalq hüquq anlayışının işləmədiyini ortaya qoyur”.
Bir sözlə, politoloq hesab edir ki, sözügedən məsələdə Azərbaycana çox ədalətsiz yanaşma var.
Vidadi ORDAHALLI
