Mətbuatda yayılan məlumata görə, Türkiyənin “Milliyyet” qəzetinin yazarı Tunca Begin İranla bağlı çox ilginc fikirlər bildirib.
“…Ermənistanın 1992-ci ilin fevralında Xocalı qətliamından başlayaraq Dağlıq Qarabağ üçün alçaqlığını və işğal planını davam etdirdiyi günlərdə İran bu vəziyyətdən istifadə edərək, Azərbaycan sərhədində 10-20 kilometr dərinliyə daxil olaraq təlimlər keçirdi. Müstəqil Azərbaycanın ərazisi və nəzarət etdiyi bölgədə öz bayrağını dalğalandırmaq kimi ehtiyatsızlıq da göstərdi. Biz jurnalistlər olaraq Rusiya və İranın təkzib etdiyi bu təcavüzü gedib gördük və “Milliyet”in 13 sentyabr 1993-cü il tarixli nüsxəsində tarixə qeyd etdik!”-deyə yazar vurğulayıb.
1992-ci ildə İran niyə sərhədə qoşun yığırdı? İndi məlumdur ki, Ermənistanı daha ağır məğlubiyyətdən xilas etmək üçün bunu edir, bəs 1992-ci ildə məqsəd nə idi?
“Əbəs deyil ki, Şuşanın işğalı vaxtı İranın xüsusi missiyası olub”
Siyasi ekspert Rövşən Rəsulov “Bakı-Xəbər”ə şərhində bildirdi ki, molla rejiminin Azərbaycan dövlətinə, dövlətçiliyinə qarşı məkrli planları həmişə olub, bu gün də var. “İranın Azərbaycana, Azərbaycan dövlətçiliyinə qarşı təxribatçı addımları tarixlər boyu müşahidə olunub. Qeyd edilən bu faktdan da artıq nəticə çıxarmaq olar ki, həmin vaxtlardan başlayaraq İran Azərbaycanın işğal olunmuş ərazilərində hərbi təlimlər keçirməklə daxilində olan mənfur niyyətlərini açıq şəkildə ifadə edib. Əgər biz həmin vaxtla indiki dövrü müqayisədə etsək, eyni siyasəti, eyni mənfurluğu, xəyanəti və satqınlığı bir daha müşahidə etmiş olarıq. Qeyd edildiyi kimi, hələ 1992-ci ildə İranın Azərbaycanın işğal olunmuş ərazilərinə daxil olub orada hərbi təlimlər keçirməsi mollakratiya rejiminin Ermənistana dəstəyinin göstəricisidir. O bununla Ermənistana dəstək verib. O zamanlar baş verənlər göstərirdi ki, Azərbaycanın ərazilərinin işğal olunmasında da İran Ermənistana öz aşkar dəstəyini göstərib. İran hər zaman Ermənistana havadarlıq edib. Sizə mühüm bir faktı xatırlatmaq istəyirəm. Əbəs deyil ki, Şuşanın işğalı vaxtı İranın xüsusi missiyası olub. Həmin ərəfədə molla rejimi guya vasitəçilik edirdi, danışıqlara başlanılması üçün Azərbaycan və Ermənistan rəhbərlərini İrana dəvət etdi. Ondan qısa müddət sonra da Şuşa şəhəri təcavüzkar Ermənistan tərəfindən işğal olunub. O vaxt da, indi də İranın məqsədi Ermənistana dəstək göstərmək olub. Təsadüfi deyil ki, İranın hazırkı addımlarında biz məhz həmin məqamların, həmin nüansların təkrar edildiyini görürük. Sizi inandırım ki, İranın əlində fürsət olsa, öz mənfur addımlarını yenidən, amma daha geniş şəkildə tətbiq etməyə çalışacaq. Lakin nə Azərbaycan ozamankı Azərbaycandır, nə də dövr ozamankı dövrdür. Artıq meydanda güclü, qüdrətli Azərbaycan, güclü xalq, dövlət və Ali Baş Komandan birliyi mövcuddur. Nəinki İran və Ermənistan, eləcə də digər ölkələr Azərbaycana, dövlətimizin maraqlarına qarşı hər hansı bir addım atmağa çalışacaqsa, qarşısında güclü Azərbaycanın güclü, qüdrətli ordusunu görəcək. Buna kiminsə şübhəsi ola bilməz”.
R.Rəsulovun qeyd etdiyinə görə, ümumiyyətlə, İranın Ermənistanla bağlı mövcud siyasətində artıq bütün kartlar açılıb və əbəs deyil ki, Prezident İlham Əliyev Şuşadakı son çıxışı zamanı müsəlman ölkələri ilə bağlı fikirlərini bəyan edərkən İranın xəyanətkar, riyakar olduğuna eyham vurdu. R.Rəsulovun fikrincə, İranın bu kirli niyyətlərinin qarşısının alınması üçün bütün müvafiq tədbirlər görülür və bundan sonra da görüləcək. Onun dediyinə görə, yaxşı olar ki, molla rejimi daxilindəki problemləri çözsün, papağını qarşısına qoyaraq düşünsün. Tehran rejiminin daxilində baş verənlər mollakratiyanın səhv siyasətinin nəticəsidir. “Təbii ki, biz yaxın gələcəkdə İranla bağlı növbəti faktların üzə çıxacağını görəcəyik. Bütün hallarda molla rejiminin artıq süquta uğradığının da şahidi olacağıq. Bu baxımdan Tehrandakı əmmaməlilər, yaxşı olardı ki, öz aqibətlərini düşünsünlər, Azərbaycana dil uzatmasınlar. Əks halda həmin dillər kökündən kəsiləcək”- deyə R.Rəsulov əlavə etdi.
İradə SARIYEVA
