“Məscidləri dağıdan müsəlman ölkələri ilə dost ola bilməz. Məscidləri dağıdana müsəlman ölkələrinin rəhbərləri qucaq aça bilməz, bilər? Onları qucaqlayıb öpə bilər?”
Bu sözləri Silahlı Qüvvələrin Müzəffər Ali Baş Komandanı, Prezident İlham Əliyev noyabrın 8-də Şuşada hərbçilər qarşısında çıxışı zamanı deyib.
“Biz müsəlman ölkələri ilə sıx əlaqələr qurduq və onlara izah etməyə nail olduq ki, Ermənistan təkcə bizə qarşı yox, bütün müsəlman aləminə qarşı təcavüzkar siyasət aparır. Məscidləri dağıdan müsəlman ölkələri ilə dost ola bilməz. Məscidləri dağıdana müsəlman ölkələrinin rəhbərləri qucaq aça bilməz, bilər? Onları qucaqlayıb öpə bilər? Bu, riyakarlıqdır, bu, satqınlıqdır. Bunun başqa adı yoxdur. Ona görə müsəlman aləmində biz Ermənistanı əsas dayaqlardan təcrid etdik. Düzdür, tam təcrid edə bilmədik, bunun başqa səbəbləri var - bax, dediyim riyakarlıq. Ancaq bütövlükdə Ermənistan müsəlman aləmində məscidləri dağıdan, təhqir edən ölkə kimi tanındı və bunu biz etdik”, - dövlət başçısı əlavə edib.
“İslam düşməni olan, məscid soyqırımı törədən Ermənistanla dostluq edən, özünü sözdə müsəlman adlandıran istənilən ölkə riyakardır, saxtakardır”
Prezident İlham Əliyevin sözügedən bəyanatının tamamilə düzgün hədəfləndiyini deyən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli baki-xeber.com-a bildirdi ki, bəzi ölkələr “müsəlman”, “islam” adını daşısalar da, hər zaman riyakar mövqe tutublar, ermənidən artıq erməni olmağa çalışıblar. “Ölkə başçısı bəzi müsəlman ölkələrinin riyakar mövqeyini bəyan etməklə, əslində onların ermənilərlə bir yolda olduqlarını diqqətə çatdırıb. Bu kimi riyakarlıq edən “müsəlman” adlanan ölkələrin də başında Tehran rejimi gəlir. Dövlət başçısı İlham Əliyevin Şuşada hərbçilər qarşısında çıxışı zamanı riyakarlıq edən müsəlman ölkələri ilə bağlı mesajlar verməsi diqqəti çəkir. Bu ölkələr həm özlərini “müsəlman”, “islam” adlandırırlar, həm də riyakarlıq edərək məscidlərimizə donuz bağlayan ermənilərlə eyni mövqedə dayanırlar. Bu çox böyük riyakarlıq və ikiüzlülükdür. Bu ölkələr Azərbaycanın torpaqlarını 30 il işğalda saxlayan, məscidlərini dağıdan, heyvan saxlanan yerə çevirən Ermənistanla münasibətlərini davam etdirirlər. Təəssüflər olsun ki, məscidlərimizi dağıdan, murdarlayan Ermənistanla nə İran, nə də bəzi digər müsəlman ölkələri əlaqələrini kəsmək istəyir. Bu riyakarlığın ən bariz nümunəsini mollakratiya rejimi, İran adlanan ölkə sərgiləyir. Biz bunu gördük, bu gün də görürük. Başda İran olmaqla, bəzi ölkələr “müsəlman” adı daşıyır, amma siyasi riyakarlıqlarını ortaya qoyublar. Əgər onlar gerçək müsəlman ölkələridirsə, bəs onda niyə kafir Ermənistanın faşist əməllərinə şərik olurlar? Müsəlman ölkəsinin məscidlərini dağıdıblar, murdarlayıblar, heyvan saxlanılan yerə çeviriblər, terror həyata keçiriblər, amma necə ola bilir ki, bu ölkələr buna sakit yanaşırlar? Ermənistan xristian ölkəsi olmaqla yanaşı, həm də bir terror dövlətidir, terrorizmi dəstəkləyir, başqa bir ölkənin ərazisini də uzun illər işğalda saxlamışdı. Əlbəttə, islam düşməni olan, məscid soyqırımı törədən Ermənistanla dostluq edən, özünü sözdə müsəlman adlandıran istənilən ölkə riyakardır, saxtakardır”.
F.Ələkbərli hesab edir ki, Prezident Əliyevin bəyanatından Ermənistanla can bir qəlbdə olan müsəlman ölkələri nəticə çıxarmalı və bu ölkə ilə əlaqəni kəsməlidirlər. Ekspert hesab edir ki, bu ölkələr də məscidlərimizə qarşı soyqırım törədən Ermənistanın beynəlxalq məhkəmələrdə cəzalandırılması üçün addımlar atmalıdır, çünki bu daha anlamlı olardı, nəinki terrorçu Ermənistanın yanında olmaq.
İradə SARIYEVA
