“...Biz heç kimdən qorxmuruq, heç kimdən çəkinmirik”.
Bunu Silahlı Qüvvələrin Müzəffər Ali Baş Komandanı, Prezident İlham Əliyev noyabrın 8-də Şuşada hərbçilər qarşısında çıxışı zamanı deyib. “Müharibədən keçən iki il ərzində biz öz siyasətimizi davam etdirmişik. Biz iki il ərzində böyük quruculuq işləri görmüşük, Qarabağı və Şərqi Zəngəzuru faktiki olaraq yenidən qururuq və quracağıq. Eyni zamanda, Ordumuzu gücləndiririk və gücləndirəcəyik. Ermənistan bilməlidir ki, bizi indiki çərçivələrdə saxlayan Ermənistanın hansısa havadarının bəyanatı deyil, bizim öz siyasətimizdir. Biz heç kimdən qorxmuruq, heç kimdən çəkinmirik. Əgər biz kimdənsə qorxsaydıq, heç vaxt İkinci Qarabağ müharibəsinə start verməzdik. Biz hər birimiz ölümə gedirdik, öldü var, döndü yoxdur, ya azadlıq, ya ölüm! İndi də ölümə getməyə hazırıq öz haqlarımızı tələb edərək. Çünki hələ də, - müharibə iki il bundan əvvəl başa çatsa da, - narahatedici məqamlar var və erməni xalqına müraciət edib sözümü demək istəyirəm. Onlar bu otuz ilin işğalının acılarını indi görürlər. İşğal nədir, itki nədir, indi görürlər. Biz, sadəcə olaraq, onlara cavab vermişik, biz öz torpağımızda vuruşmuşuq, işğalçını torpaqlarımızdan qovmuşuq. Onlar bunu anlamalıdırlar ki, xaricdə oturan və bu bölgəyə bir oyun meydançası kimi baxmaq istəyən dairələrin qurbanına ikinci dəfə çevrilməsinlər. Biz burada əsas söz sahibiyik, biz burada əsas güc sahibiyik. Bizim Ordumuz qəhrəmanlıq, peşəkarlıq, fədakarlıq göstərib. Lazım olarsa, bir daha göstərərik, istədiyimizə nail olarıq, bunu hər kəs bilir və bizim sərhədimizdə Ermənistana dəstək olaraq hərbi təlim keçirənlər də bilsinlər. Bizi heç kim qorxuda bilməz. Ermənistan yaxşı qonşuluq siyasəti aparmaq istəyirsə, birincisi, 2020-ci ilin 10 noyabr Bəyanatının bütün müddəalarını yerinə yetirməlidir. Azərbaycanla sülh üzrə aparılan danışıqlarda səmimi olmalıdır. Süni şəkildə vaxt uzatmamalıdır, hansısa möcüzəni gözləməməlidir ki, kimsə gəlib bunların yerinə vuruşacaq. Heç kim gəlib onların yerinə vuruşmayacaq, gəlib vuruşsa da, qarşısında yenə də Azərbaycan Ordusunu görəcək", - dövlət başçısı bildirib.
“...Ən xırda ehtiyatsız addım İranın fəlakəti ilə nəticələnə bilər”
Azərbaycan Naminə Alyans Partiyasının sədri Abutalıb Səmədov baki-xeber.com-a şərhində bildirdi ki, Azərbaycan Prezidenti sərhədlərimizdə təlim keçirənləri xəbərdar etməklə bir də hamının nəzərinə dövlətimizin, ordumuzun heç nədən çəkinmədiyini çatdırdı. “Məlumdur ki, son dövrlərdə İran Azərbaycanı hədələmək xəttini seçərək çox yanlış davranışlar sərgiləyir. Ayrı-ayrı rəsmi şəxslərin hədə-qorxu dolu bəyanatları, Azərbaycanın ünvanına söylənilən şər-böhtanlar, nəhayət sərhəddə İran ordusunun keçirdiyi təlimlər son dərəcə yanlış addımlardır və Azərbaycan İran münasibətlərinin pozulmasına xidmət edir. Bu addımların yalnız bir nəticəsi olacaq ki, Azərbaycan İranın dost dövləti olmadığını və Azərbaycanın düşmənləri ilə, ilk növbədə Ermənistanla əməkdaşlıq etdiyini açıq şəkildə bəyan etmək məcburiyyətində qalacaq. Azərbaycan Prezidenti də Şuşada bu həqiqətləri dilə gətirdi. Eyni zamanda İranın təlimlərinə qarşı sərhəddə Azərbaycan ordusunun, xüsusi təyinatlılarımızın keçirdiyi təlimlər çox sərrast bir cavab oldu. Azərbaycan ordusu heç kimdən çəkinmir. Bu cür ucuz vasitələrlə Azərbaycanı qorxutmağa çalışmaq, ən azı, qeyri-ciddi davranışdır. Üstəlik, İran nəzərə almalıdır ki, bu gün iri dövlətlərin hədəfindədir və ən xırda ehtiyatsız addım İranın fəlakəti ilə nəticələnə bilər. Azərbaycan tək deyil, yanında Türkiyə var və ona dəstək verən böyük güclər var. İran bunları düşünməlidir”.
A.Səmədovun vurğuladığına görə, Azərbaycan Prezidenti bu bəyanatını təkcə İrana yönəltmədi, eyni zamanda digər dövlətlərə də xəbərdarlıq etdi ki, Azərbaycanı tutduğu mövqedən çəkindirəcəyinizə ümid etməyin. “Bunu Azərbaycan Prezidenti son günlər dəfələrlə sübut etdi. Praqa görüşündə Makrona və onun dəstəyinə ümid edən Paşinyana, Soçi görüşündə Putinə və yenə də Paşinyana qarşı qəti mövqe nümayiş etdirməklə bir daha hamısının nəzərinə çatdırdı ki, Azərbaycan heç kimdən çəkinmir. Azərbaycanın mövqeyi beynəlxalq hüquqa uyğun mövqedir və bu mövqedən bir addım da geri çəkilmək fikri yoxdur. Baxmayaraq ki, həm Praqada, həm Soçidə bəzi dövlətlərin rəhbərləri Azərbaycana təzyiq göstərmək və bununla da ermənilərin maraqlarına cavab verən müəyyən təklifləri keçirmək yolunu seçmişdilər. Nail ola bilmədilər. Bundan sonra da, təbiidir ki, bu cəhdlər davam edəcək. Azərbaycan çox böyük diplomatik mübarizənin içərisindədir, bu mübarizəni uğurla aparır və Prezident İlham Əliyevin Şuşada verdiyi bəyanatlar təkcə İranı yox, digər dövlətləri də düşündürməlidir. Onlar da ermənipərəst mövqe tutmağa deyil, beynəlxalq hüququn yanında olmağa, beynəlxalq hüququ əldə rəhbər tutmağa çalışmalıdırlar. Əks halda onların bütün cəhdləri nəticəsiz qalacaq. Bu cəhdlərin qarşısında güclü Azərbaycan-Türkiyə ittifaqı və Silahlı Qüvvələrimiz dayanacaq”- deyə A.Səmədov vurğuladı.
İradə SARIYEVA
