Bu gün Azərbaycan xalqı Zəfər bayramını qeyd edir. 8 noyabr Zəfər Gününü təkcə Azərbaycan dövlətində yaşayan azərbaycanlılar keçirmir, dünyanın hər yerində soydaşlarımız bu günü bayram edirlər. Əlbəttə, iki il bundan əvvəl Ali Baş Komandan İlham Əliyevin rəhbərliyi ilə müzəffər Azərbaycan ordusunun qazandığı Qarabağ zəfəri xalq olaraq həyatımızda mühüm rol oynadı. Bilirik ki, bu gün Cənubi Azərbaycanda milli azadlıq hərəkatı başlayıb, soydaşlarımız mollakratiyanın buxovlarından azad olmaq üçün küçələrə, meydanlara axışır. 55 günə yaxındır ki, soydaşlarımız öz milli mübarizələrindən əl çəkmir və günü-gündən bu mübarizə daha da alovlanır.
Qarabağın azad olunması, Qarabağ zəfəri Cənubi Azərbaycanda soydaşlarımızın milli azadlıq hərəkatında nə kimi motiv rolunu oynayacaq?
“Zəfər amili yaxın gələcəkdə Azərbaycanın bütövləşməsinin gerçəkləşməsinə də dəstək olacaq”
AVCİYA-nın vitse-prezidenti, siyasi şərhçi, professor Məhərrəm Zülfüqarlı baki-xeber.com-a şərhində bildirdi ki, Qarabağ Zəfəri Cənubi Azərbaycanda başlayan milli azadlıq hərəkatına nəinki təsir göstərir, geniş mənada ona yön, stimul verir. “Müzəffər ordumuzun qazandığı Qarabağ Zəfəri güneyli soydaşlarımızın özünə, öz mübarizəsinə inamını daha da gücləndirir, onları məqsədlərinə doğru yaxınlaşdırır. Yəni ordumuzun 44 günlük Vətən müharibəsində qazandığı qələbə digər qələbələrimiz kimi cənublu qardaşlarımızı, soydaşlarımızı ruhlandırır. Vətən müharibəsində soydaşlarımız ordumuzu Arazın o biri tayından böyük coşğu ilə alqışlayırdı. İndiyə qədər baş verən bütün inqilabların mərkəzi həmişə Təbriz olub. İndiki prosesdə də Cənubi Azərbaycan əhalisi çox fəal iştirak edir. Çünki İran əhalisinin təxminən 53 faizi Azərbaycan türklərindən ibarətdir. Qafqazda böyük və güclü, nüfuzlu dövlət olan, müharibədə möhtəşəm Zəfər qazanan Azərbaycan cənublu soydaşlarımızın iftixar etdiyi, güvəndiyi dövlətdir. Prezidentimiz də qeyd edib ki, biz təkcə Azərbaycan vətəndaşlarının deyil, dünyadakı 50 milyon azərbaycanlının hüquqlarını müdafiə etməliyik. Bu mənada Azərbaycan Ordusunun, Azərbaycan dövlətinin Zəfəri cənublu soydaşlarımızı daha da ruhlandırır, onların milli azadlıq mübarizəsinə ciddi stimul verir. Hesab edirəm ki, bu amil həm də gələcəkdə Cənubi və Şimali Azərbaycanın birləşməsinə zəmin yaradır”.
M.Zülfüqarlı hesab edir ki, bütöv Azərbaycanın formalaşmasında, yaranmasında Şimali Azərbaycanda gedən proseslər mühüm rol oynayır. Dəfələrlə Cənubi Azərbaycanda olduğunu deyən M.Zülfüqarlının sözlərinə görə, bu proseslərdən əvvəl də orada milli ruhun şahidi olub. O vurğuladı ki, 6-7 il əvvəl Təbrizdə bəzi restoranların və başqa iaşə müəssisələrinin adları latın əlifbası ilə Azərbaycan dilində yazılmağa başlayıb. “Fars-molla rejiminin repressiyasına baxmayaraq, Cənubi Azərbaycanda milli ruh güclüdür. Şimali Azərbaycanda baş verən bütün proseslər də onların həyatına müsbət mənada təsir edir, milli ruhlarını və milli mübarizələrini daha da gücləndirir. İnanıram ki, Zəfər amili yaxın gələcəkdə Azərbaycanın bütövləşməsinin gerçəkləşməsinə də dəstək olacaq”-deyə M.Zülfüqarlı qeyd etdi.
İradə SARIYEVA
