Azərbaycan Naminə Alyans Partiyası Vətən müharibəsində Ermənistan üzərində tarixi qələbəmizin ikinci ildönümü və “Zəfər günü” ilə əlaqədar bəyanat yayıb.
Bəyanatda deyilir:
"İki il əvvəl, 2020-ci ilin noyabr ayında Ali Baş komandan İlham Əliyevin rəhbərliyi altında qəhrəman Azərbaycan ordusu erməni silahlı birləşmələrini darmadağın edərək 30 ilə yaxın müddətdə işğal altında olan torpaqlarımızı azad etdi. Son dərəcə ağır və çıxılmaz duruma düşən Ermənistan rəhbərliyi noyabrın 9-dan 10-na keçən gecə “təslim aktı”na qol çəkmək məcburiyyətində qaldı.
Azərbaycan tarixinin ən şərəfli səhifələrindən olan bu möhtəşəm qələbə ilk növbədə dünyanın ən güclü ordularından birinə çevrilmiş silahlı qüvvələrimizin şəxsi heyəyinin vətənpərvərliyi, qəhrəmanlığı, hərbi ustalığı sayəsində, 3000-ə qədər şəhidimizin qanı bahasına qazanıldı.
Müharibənin davam etdiyi günlərdə xalqımız və onun təmsilçiləri olan təşkilatlar Azərbaycan prezidentinin ətrafında yumruq kimi birləşdilər və “dəmir yumruq” dövlətimizin və xalqımızın birlik rəmzinə çevrilərək qələbənin qazanılmasında müstəsna rol oynadı.
Erməni silahlı qüvvələrinin hücumunun başladığı və Azərbaycan ordusunun əks-hücuma keçdiyi ilk anlardan hərbi əməliyyatlara rəhbərliyin bütün məsuliyyətini və ağırlığını öz üzərinə götürən prezident İlham Əliyev bu qələbənin qazanılmasında həlledici rol oynadı. Dövlət başçımız bir tərəfdən Ali Baş komandan kimi ordumuza rəhbərliyi həyata keçirdi, digər tərəfdən həqiqətləri dünya liderlərinə və xalqlarına çatdırmaq üçün istirahət bilmədən çalışdı, eyni zamanda dünyanın aparıcı dövlətlərinin liderlərinin təzyiqləri qarşısında dayanmağı, qətiyyətli mövqe nümayiş etdirməyi bacardı.
Prezident İlham Əliyev bu gün də aparılan diplomatik danışıqlarda eyni qətiyyəti göstərir və Ermənistan rəhbərliyinin bütün təxribatlarına baxmayaraq qısa müddət ərzində sülh sazişinin imzalanmasına nail olmaq üçün əlindən gələni edir. Son iki ildə Moskvada, Brüsseldə, Soçidə, Praqada keçirilən danışıqlarda qazanılan uğurlar dövlət başçımızın yüksık hazırlığı, müdrikliyi və qətiyyəti sayəsində mümkün olmuşdur.
Bununla belə, etiraf olunmalıdır ki, bu diplomatik mübarizənin gedişində İran, Rusiya, Fransa və digər dövlətlərin təxribat xarakterli addımları davam etməkdədir və bu hərəkətlər sərhəddə erməni təxribatları ilə birləşərək Azərbaycana əlavə problemlər yaradır. Bu şəraitdə hər birimizin borcu dövlət başçımızın yanında olmaq, ona bu şərəfli mübarizədə dəstək olmaq üçün əlindən gələni etməkdir.
Azərbaycan Naminə Alyans Partiyası Zəfər günü münasibətilə xalqımızı ürəkdən təbrik edir, bu müqəddəs bayramı bizə bəxş edən qəhrəman şəhidlərimizə allahdan rəhmət diləyir və hamını prezident İlham Əliyev ətrafında birləşməyə, ona əlindən köməyi göstərməyə çağırır”.
