Tehran rejimi hər zaman Azərbaycanın dövlət müstəqilliyinin əleyhinə olub və çox təəssüflər olsun ki, bu təxribatçı planını gerçəkləşdirmək üçün sözdə Azərbaycan vətəndaşları olanlardan da istifadə edib. Bilirik ki, Birinci Qarabağ Müharibəsi dövründə və ondan sonrakı müəyyən bir dönəmdə quzey Azərbaycanda molla rejminin müxtəlif “xeyriyyə fondları” işə salındı.
Onlar məqsədlərinin azərbaycanlı qaçqınlara kömək olduğunu iddia etsələr də, əslində bu vəsait mollaların, Xomeyniçilərin ciblərinə axırdı. Məlumatlar yayılırdı ki, həmin dövrdə də, sonradan da Azərbayanda molla rejiminin burada filialını açdığı “xeyriyyə” fondlarına bizim vətəndaşlar arasında da ianə edənlər olub. Mətbuatda yer alan fikirlərə görə, bu gün də Azərbaycanda Xomeyni Fonduna ianələr göndərənlər var. Çox təəssüf ki, islam dininə, şiəliyə zidd olan Xomeyniçilərin qidalanmasında bəzi vətəndaşlarımız da var, yaxud olub. Təbii, onları aşkarlamaq əlaqədar qurumların işidir və yəqin ki, bu işlə məşğul olacaqlar. Sözsüz ki, ianə etmə məsələsi ölkəmizdə də İranın 5-ci kalonunun əli ilə edilib və onlar öz ölkələrinə xain çıxıblar.
Siyasi ekspert Rövşən Rəsulov bizimlə söhbətində bildirdi ki, Azərbaycanda bir sıra maraqları özlərində birləşdirən 5-ci kalon təmsilçiləri mövcuddur. “Bildiyimiz kimi, Qərb ölkələrinə, Soros fonduna bağlı olan dailər var ki, onlar aldıqları qrantlar müqabilində tamamilə həmin fonddun sifarişi ilə 5-ci kalon rolunu oynayırlar. Lakin bütün bunlarla yanaşı digər istiqamətlərdə də Azərbaycanın dövlət müstəqilliyinə, suverenliyinə qarşı fəaliyyət göstərən qüvvələr, 5-ci kalonun təmsilçiləri mövcuddur. Onlar kimlərdir? Biz son vaxtlar molla rejimində cərəyan edən hadisələri diqqət mərkəzində saxlayırıq. Bu gün Tehran rejiminin Cənubi Azərbaycanda milli azadlıq hərəkatına qarşı apardığı amansız repressiv siyasəti izləyirik, soydaşlarımıza qarşı hansı qəddarlıqların törədildiyinin şahidinə çevirilirik. Tehrandakı mollakratiya, yaxud fars şovnizmi rejimini dəstəkləyən cinahlar təəssüf ki, Azərbaycanda da var. Biz bu günlərdə Dövlət Təhlükəsizlik Xidmətinin həmin qrupun bir hissəsini zərərsizləşdirməsini, saxlamasını izlədik. Hələ bunlar 5-ci kalonun alt tərəfləridir, 5-ci kalonun üst tərəfləri də mövcuddur. Onlar da işfa ediləcəklər.
“Xomeyni Fondu”na ianələr edən vətəndaşlarımızın olması təəssüf doğurur və təbii ki, onların 5-ci kalonla ciddi əlaqələri var. Xatırlayırsınızsa, illər əvvəl “İmdad cəmiyyəti” fəaliyyət göstərirdi. Həmin “İmdad cəmiyyəti” hətta ofisi də mövcud idi. O “cəmiyyət” sözdə ehtiyacı olan insanlara ərzaq, maliyə yardımı paylamaq kimi göstərilirdi. Əslində, “İmdad Cəmiyyəti”nin yaradılmasıməqsədinin də kökündə özlərinə burada yer edib Azərbaycanda 5-ci kalon formalaşdırmaq cəhdləri dayanırdı. Amma bir neçə il əvvəl həmin “cəmiyyət” Azərbaycandan uzaqlaşdırıldı. Bu gün həmin “cəmiyyət” başqa ölkələrdə fəaliyyət göstərir, Rusiyadan, digər qonşu ölkələrdən ora müxtəlif ianələr edilir. Azərbaycanda da fars rejiminə dəstək göstərən bir qrup satqın həmin “cəmiyyətlə” əlaqələr saxlayır, ora ianələr göndərirlər. O vəsaitlərdən də hansı məqsədlərlə istufadə edildiyi məlumdur”.
İranın 5-ci kalonunun təhlükəli tərəfinə diqqət çəkən R.Rəsulov vurğuladı ki, onların məqsədi Tehranın teokratiya rejiminin “islam” pərdəsinə bürünən siyasətini Azərbaycanın ayrı-ayrı nöqtələrində tətbiq etmək etmək: “Amma İranın 5-ci kalonun çirkin niyyətlərinin qarşısı aidiyyatı qurumlar tərəfindən alınır. Azərbaycanın müstəqil dövlət siyasətinə qarşı təhlükə saçan istənilən amilin qarşısı dərhal alınır. Bu baxımdan, həmin fonda ianə edənlərin tapılaraq üzə çıxarılması, ifşa olunması zərurətə çevirilib. Çünki biz Tehran rejimindən Azərbaycana qarşı hansı hədyanların səsləndirildiyini də müşahidə edirik. Söz yox ki, bunlar bir-biri ilə əlaqəli, rabitəli insanlardır, onlar daim mollakratiya ilə əlaqə saxlayırlar, Tehran rejiminin kirli maralarının Azərbaycanda yer etməsi üçün cəhdlər göstərirlər”.
R.Rəsulov hesab edir ki, Tehran rejiminin Azərbaycandakı 5-ci kalonu sayılan şəxslər, təşkilatlar daha ciddi şəkildə araşdırılmalı, lazım gələrsə onlar dərhal ifşa edilərək məsuliyyətə cəlb olunmaları ilə bağlı addımlar atılmalıdır.
İradə SARIYEVA
