Bu gün molla rejimin qan ocağına çevirdiyi İran adlanan ölkədə korrupsiyaya, rüşvətxorluq mollakratiyanın nəfəs mənbələrindən biridir. Adına “islam”, “şiə dövləti” sözünü yapışdıran Tehran rejimi korrupsiya bataqlığında çırpınır. Təsəvvür edin ki, ziyarətgahlarda yığılan pullar birbaşa mollaların cibinə daşınır.
Kərbəla, Nəcəf, Məşhəd, Qum ziyarətgahlarından əldə olunan vəsaitlərin heç birinin hesabatı verilmir, xalq bu pulların üzünü belə görmür, xalqın rifahına xərclənmir. Milyonlarla pul mollaların qarnına tökülür, mollakratiyanın məmurları bu pulu şəxsi yaşayışlarına, dəbdəbəli həyatlarına sərf edirlər. Bilirik ki, İranda camaat çox pis vəziyyətdə yaşayır, xalqın rifahını düşünən yoxdur. Ancaq korrupsiyaya, rüşvət, xüsusən də dini ziyarətgahlardan yığılan pulların xərclənməsində böyük qeyri - şəffaflığa yol verilir, məmurların övladları yaramaz-yaramaz işlərlə məşğul olur, özlərinə xarici banklarda hesablar açırlar, milyardları banklara qoyurlar. Ölkənin içində insanların haqqı tapdanır, səsləri boğulur, amma məmurlar, onların balaları haram yolla əldə etdikləri pullarla keyf edirlər. Bu vəsait eynu zamanda xaricdəki müxtəlif terror əməllərinə sərf edilir. Xaricdə özlərinə Xomeyniçilər dəstəsi düzəldirlər pulu ona sərf edirlər, halbuki bu sadə vətəndaşların əməyidir. İran adlanan ölkədə vəziyyət o həddə çatıb ki, insanlar molla rejimin əməllərinə etiraz edərək küçələrə axışıblar. 50 gündən artıqdır ki, korrupsioner, rüşvətxor, qatil Tehran rejiminə qarşı etiraz mitinqləri davam edir.
“SƏS” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində fars şovinst rejiminin korrupsiya əməlləri ilə bağlı fikirlərini bildirdi. “Reallığa qalanda İran adlandırılan ölkədə əslində hansı idarəçilik sisteminin mövcud olması böyük sual altındadır. Düzdür, onlar “İslam Respublikası” adı altında teokratik formalaşma olduqlarını nümayiş etdirirlər, amma fakt ondadır ki, bu, sadəcə görüntü xarakteri daşıyır. Dövlət idarəçiliyinin fəaliyyəti mexanizmi isə tamamilə başqa səmtlərə doğru yönəlib”.
Qonşu ölkədə cərəyan edən kütləvi xalq etirazlarına və üsyanlara münasibətini açıqlayan B.Quliyev Tehran rejiminin korrupsioner əməlləri nəticəsində baş verənlərə də toxundu: “Əyalətlərdə hökm sürən aclıq və səfalət, kütləvi korrupsiya halları, insan hüquqlarının, xüsusilə qadınların hüquqlarının pozulması, edam və s. ağır cəzaların artması insanları küçələrə çıxmağa, etirazlar səsləndirməyə, mövcud quruluşdan imtina etməyə səbəblər yaratdı. Misal üçün, əgər bu gün sən əmmamə və əbada, çadrada deyilsənsə, demək ki, mövcud rejim üçün təhlükə mənbəyi hesab olunursan. Və maraqlısı da budur ki, İranın din xadimləri, ayətullahları namazlarda insanları doğru yola dəvət edirlərsə, reallığa qalanda onların özləri müxtəlif dini ocaqlardan, ziyarətgahlardan yığılan külli miqdarda vəsaitləri mənimsəyirlər, xalqa da heç bir hesabatlar vermirlər. Onda sual yaranır: bəs hansı doğruluq, düzgünlük, ədalət və s.? Axı İslam qanunlarının tələblərindən biri də budur ki, ziyarətgahlarda toplanan ianələrin, vəsaitlərin bir hissəsi ehtiyacı olan insanlar arasında bölünməli, onlar üçün xərclənməlidir. Amma göründüyü kimi belə deyil. Fakt budur ki, dövlət idarəçiliyinin başında oturan hakimlərin, rəhbərlik strukturlarının övladları xarici ölkələrdə min bir cür oyunlardan çıxırlar. İnternet resurslarında bunları təsdiq edən yüzlərlə materiallar mövcuddur. İçki, eyş-işrət məclisləri, qumar oyunları, dəbdəbəli və zəngin həyat tərzi – ümumiyyətlə, İslam dininə tamamilə yad olanların hər bir əməl bu adamların övladlarında, hətta onların özlərində də var”.
“Yerdə qalan vəsaitlər isə məhz haqlarını tələb edən insanlara qarşı yönəldilir”, deyən siyasi ekspert bu gün etirazçılara qarşı tutulan divanı da həmin məsələyə aid edib: “Baxın və görün vəziyyət nə həddə gəlib-çatıb ki, rejimin silahlı dəstələri kütləvi qiyamlara fiziki cəhətdən tab gətirə bilmirlər, bunun üçün isə Yaxın Şərq ölkələrindəki xomeyniçi, hizbullahçı və s. iranmeyilli terror təşkilatlarından qatillləri, cinayətkarları gətirərək xalq üsyanını yatırmaq üçün istifadə edirlər. İndi təsəvvürünüzə gətirin, sülh və əmin-amanlıq dini olan İslam yolunda verilən ianələr hansı qanlı məqsədlər üçün istifadə olunmaqdadır”.
Baş redaktor sözlərinə əlavə olaraq onu da qeyd edib ki, İranda soydaşlarımıza qarşı uzun illərdir ki, amansız repressiyalar tətbiq olunmaqdadır: “Kiçik bir xatırlatma edərək demək istərdim ki, soydaşlarımızın kompakt yaşadıqları Təbriz şəhəri hər zaman İran hakimiyyətləri üçün sanki qorxu, təhlükə mənbəyi hesab olunub və yalnız Təbriz deyil, azərbaycanlıların yaşadıqları digər şəhərlər də davamlı olaraq repressiv qüvvələr tərəfindən diqqət mərkəzində saxlanılıb, hər hansı bir etiraz halları baş verərkən onlar amansızlıqla, silah və zor gücü, qətliamlar vasitəsi ilə yatırılıb. Çünki yaxşı bilirlər ki, Cənubdan Səttarxan, Xiyabani, Pişəvəri və s. kimi milli soyunu qoruyan, müdafiə edən mübariz şəxsiyyətlər çıxıb və bundan sonra da çıxacaq. Biz bu xüsusda 21 Azər Hərəkatını da xatırlaya bilərik. Yəni hazırda İranda baş verən hadisələr fonunda Cənubi Azərbaycanın Milli Hökumət tələblərinin də yaranması gözlənilən idi. Bundan sonra isə baş verə biləcəkləri, gözləntiləri isə zaman özü göstərəcək”.
“Bu gün İran özünütəcrid siyasəti ilə əslində dünyanın da diqqətini özünə cəlb edib və əgər oradakı siyasi idarəçiliyin xalq etirazları vasitəsi ilə rədd edilməsi artıq bir sıra aparıcı dövlətlərin də münasibət bildirmələrinə səbəblər yaradıb”, deyən Bəhruz Quliyev sonda qeyd edib ki, İranda baş verən məlum olaylar region ölkəsi kimi Azərbaycanı, xalqımızı narahat etməyə bilməz və bu baxımdan da oradakı soydaşlarımızın hisslərinin, fikirlərinin müdafiə olunması təbii hal kimi qarşılanmalıdır. Çünki onlar bizlərin canıbir, qanıbir soyumuzdurlar.
İradə SARIYEVA
