Artıq bir neçə ildir ki, Ermənistan hakimiyyəti köhnə rus silahlarından imtina edərək, yeni, müasir hərbi texnikanı başqa ölkələrdən almaq üçün məxfi danışıqlar aparır.
Bu sözləri Ermənistan İctimai televiziyasında yayımlanan siyasi tok-şou zamanı hərbi analitik Mariam Petrosyan deyib:
“Hamımızın yadındadır ki, Ermənistan İordaniya ilə necə gizli razılığa gələ bildi. Razılaşma silah tədarükü ilə bağlı idi. O zaman (2020-ci ilin əvvəlində) Ermənistana İordaniyadan birinci partiya silah göndərilən kimi Bakı İordaniyanın Azərbaycandakı səfirinə nota təqdim etdi və bu dövlət Ermənistana silah göndərməkdən imtina etdi. Amma İrəvan silah tədarükü üçün gizli danışıqları dayandırmadı. Bizdə olan məlumata əsasən, Hindistan və İrandan bu gün üçün artıq müəyyən şifahi razılıqlar alınıb. Ermənistan bu ölkələrdən müasir silahlar almağı qarşısına məqsəd qoyub”.
Ermənistanın bu davranışlarına rusların münasibəti necə ola bilər və Azərbaycan İordaniya etdiyi preysinqi Hindistanla İrana qarşı da edib, hansısa nəticə əldə edə bilərmi?
Hərbi-siyasi ekspert Ramil Məmmədli qəzetimizə bildirdi ki, Hindistanın Ermənistana silah satmağının bir neçə səbəbi var: “Ermənistan mediasının özü yazır ki, Hindistan Ermənistana 270 milyon ABŞ dolları dəyərində silah və hərbi texnika satıb. Sentyabrın əvvəlində Ermənistan ordusunu fasiləsiz silah və sursatla təchiz etmək üçün rəsmi İrəvanla Dehli arasında dövlətlərarası müqavilə imzalanıb. Əslində ciddi siyasi və iqtisadi əlaqələri olmayan, coğrafi baxımdan da xeyli uzaq olan Hindistan və Ermənistan arasında yeni münasibətlər düşünməyə vadar edir. Bunun səbəblərindən biri Pakistan amili ilə bağlıdır. Pakistanla Hindistan bir-biri ilə düşmən səviyyəsində olan ölkələrdir. Pakistan birmənalı şəkildə bizə dəstək verirsə, Hindistan da balans yaratmaq üçün Ermənistana dəstək əlini uzadır. Rusiya ilə münasibətləri son günlər gərginləşən rəsmi İrəvanın uzaq diyarlardan silah istəməsinin səbəbləri az deyil.
Hindistan yüksək kompüter texnologiyaları sahəsində müasir məhsullar istehsal etməyə başlayan, böyük irəliləyişlərə malik olan, sürətlə inkişaf edən bir ölkədir. Amma indi Hindistan tədricən hərbi-sənaye kompleksini inkişaf etdirir. Və bu səbəbdən Hindistan öz silahlarını satmaqla və silahlarını reklam etməklə qazanc əldə etməkdə çox maraqlıdır. Ermənistanın maliyyəsi olmadığını nəzərə alsaq, silahlar Fransa və ya Amerikanın pulları ilə alınır. Fransa və ABŞ istəmir ki, onların pulu Rusiya silahlarının alınmasına getsin. Məhz bu səbəbdən onlar Paşinyana qadağa qoyublar ki, Rusiyadan silah almasın. Başqa yerlərdən və Hindistandan silah almağa isə icazə veriblər”.
Ekspertin fikrincə, İranın isə Ermənistana silah satmaqda maraqlı olması Azərbaycan amilinə görədir: “İran birmənalı şəkildə Ermənistanın məğlub olmağını istəmir. Bunun çox geniş siyasi səbəbləri var. Ola bilər ki, İran Ermənistana müəyyən silahları pulsuz da versin. Təbiidir ki, Azərbaycan bütün bunlara öz etirazını bildirir və bundan sonra da öz narazılığını ifadə edəcək. Bu etirazlar İranı bu məsələdə geri çəkilməyə vadar edə bilər”.
Məhəmmədəli QƏRİBLİ
