Azərbaycan xalqı 44 günlük Vətən müharibəsində qazandığı möhtəşəm zəfərin ikinci ildönümünü qeyd etməyə hazırlaşır. Bu qələbənin əldə olunmasında vətənpərvərlik ruhunda böyüyüən gənclərin də rolu danılmazdır.
Cəmiyyətdə, xüsusən də gənc nəsil arasında vətənpərvərlik bu gün Azərbaycanda dövlətin həyat qabiliyyətinin əsasını təşkil edir və cəmiyyətin inkişafı. Bu faktor ölkəmizdə şəxsiyyətin fəal vətəndaş mövqeyi sərgiləmsi, Vətənin rifahı naminə xidmət etməyə hazır olması üçün daxili səfərbəredici resurs kimi çıxış edir.
Azərbaycanın gələcəyi əmin əllərdədir
Azərbaycan təcrübəsi gösətrir ki, vətənpərvərlik bir sosial hadisə kimi millətin və dövlətçiliyin mövcudluğu, inkişafı üçün möhkəm təməldir. Bu baxımdan dövlətin, ölkənin sabitliyinin şərtlərindən biri də gənclərin vətənpərvərlik tərbiyəsidir. Gənc nəsildə məqsədyönlü şəkildə tərbiyə olunan vətənpərvərlik şəxsiyyətin mənəvi-əxlaqi əsaslarını, onun vətəndaş mövqeyini, Vətənə layiqli və fədakar xidmət çərçivəsini formalaşdırır. Düzdür, gənc nəsil arasında vətənpərvərlik tərbiyəsi uzun və mürəkkəb prosesdir. Amma Vətən sevgisi olmadan güclü Azərbaycan qurmaq mümkün deyil. Eləcə də öz tarixinə, yaşlı nəslin miras qoyduğu ənənələrə hörmət etmədən layiqli vətəndaşlar böyütmək də mümkünsüz işdir. Bu səbəbdən Azərbaycanda qeyd edilən məqamlara dövlət tərəfindən xüsusi diqqət yetrilir. Ölkəmizdə bu gün vətənpərvərlik getdikcə daha çox insan tərəfindən milli maraqların müdafiəsi, sosial ədalətin həyata keçirilməsi, cəmiyyətin hüquqi əsaslarının möhkəmləndirilməsi istiqamətində hakimiyyət orqanlarının səylərinin dəstəklənməsi fonunda da özünü büruzə verir. Mənəvi istiqamətlər axtarışı kontekstində vətənpərvərlik milli ideyaya çevrilib. Məqsədli təşkil olunmuş vətənpərvərlik tərbiyəsi sayəsində Azərbaycan gəncləri müasir dünyada öz yerini və rolunu daha yaxşı dərk edirlər. Onlar vətənpərvərlik kimi anlayışın normativ və dəyər məzmununu da tam başa düşür, ölkənin konsolidasiyasında daha böyük rol oynayırlar. Azərbaycanlı kimliyini bu fonda daha yaxşı qoruyurlar. Bunlar ölkəmzin tərəqqisi üçün çox önəmlidir. Çünki ölkə əhalisinin yarıdan çoxunu gənclər təşkil edir. Həmin nəsillə məqsədyönlü iş azərbaycançılıq məfkurəsi ruhunda tərbiyə almış gənclərin dövlətimizin inkişafında mühüm rol oynamasına imkan verir. Bunların fonunda 44 günlük İkinci Qarabağ müharibəsi Azərbaycan gənclərində torpaq, Vətən sevgisinin nə qədər böyük olduğunu ortaya qoydu. Döyüşlər zamanı canından, qanından keçən gənclərimiz milli maraqlarımız, dövlətçilik uğrunda yetişdiklərini təsdiq etdilər. Təsdiq etdilər ki, Azərbaycan gəncləri milli, vətənpərvər ruhdadır və dövlətçiliyimizin, milli maraqlarımızın, haqq və hüquqlarımızın keşiyindədir. Bu isə həm də ondan xəbər verir ki, bundan sonra da milli maraqlarımızı, dövlətçiliyimizi, ərazi bütövlüyümüzü, ümumilikdə suverenliyimizi qoruyacaq layiqli gənclərimiz var. Azərbaycan prezidenti İlham Əliyev hələ ötən il Şuşada - Cıdır düzündə xalqa müraciət edərkən bu xüsusda bildirirdi: “Siyasi, iqtisadi, hərbi, mənəvi istiqamətlərdə, gənc nəslin tərbiyə edilməsi istiqamətində məqsədyönlü siyasət aparılırdı və elə gənc nəsil yetişdi ki, canını fəda etdi torpaq uğrunda. Elə gənc nəsil yetişdi ki, öz qanı-canı bahasına torpağımızı düşmənin əlindən aldı. Müharibədə bütün nəsillərin nümayəndələri iştirak ediblər, qəhrəmanlıq göstəriblər. Amma hər kəs bilməlidir ki, əsas missiyanı mənim prezidentlik dövrümdə yetişən gənclər yerinə yetiriblər, 2003-cü ildə uşaq olan gənclər yerinə yetiriblər. İlk növbədə, biz onlara borcluyuq, bütün Azərbaycan xalqına borcluyuq. Bütün xalqımız bu Qələbəni yaxınlaşdırırdı və bütün amillər birləşərək bu müharibənin nəticələrini şərtləndirdi". Beləliklə, gənclərimizin milli, vətənpərvərlik ruhu onu deməyə əsas verir ki, Azərbaycanın gələcəyi əmin əllərdədir. Artıq Azərbaycanda yüksək intellektual səviyyəyə, yüksək vətənpərvərlik hissinə , milli düşüncəyə malik gənc nəsil formalaşıb. Azərbaycan gənclərinin ölkənin ictimai-siyasi həyatında rolu günü-gündən artır.
Ölkədə vətənpərvərlik tərbiyəsinə xidmət edən genişmiqyaslı fəaliyyət həyata keçirilir
Bu gün vətənpərvərliyin formalaşması təkcə təbliğatla, öz keçmişinin əhəmiyyətini qabartmaqla və ya media vasitəsilə ictimai rəyi istiqamətləndirməklə mümkün deyil. Hal-hazırda Azərbaycan etnosunun daxili nüvəsini, cəmiyyətin bütövlüyünü və şəxsiyyətini qorumağa yönəlmiş müasir davranış formalarını yaratmaq qabiliyyətini aktivləşdirmək üçün dərin iş tələb olunur. Dövlət də bunun fərqindədir.
Vətənpərvərlik tərbiyəsinin məqsədyönlü reallaşdırlması müasirlərimizə Vətən, dövlətçilik, sosial ədalət kimi anlayışların normativ və dəyər məzmununu, onların ölkənin möhkəmlənməsində rolunu da ətraflı izah etməlidir. Bu məqsədlə həyata keçirilən tədbirlər, maarifləndirmə və təbliğat işləri bilavasitə gənclərin mənəvi, fiziki, psixoloji hazırlığının təmin edilməsinə, onlarda Vətənə, doğma torpağa məhəbbət hissinin yüksəldilməsinə, eləcə də müasir dünyamızda qloballaşmanın geniş vüsət aldığı bir zamanda milli-mənəvi dəyərlərin qorunub saxlanmasına yönəldilir. Son illərdə ölkədə gənclərlə aparılan vətənpərvərlik tərbiyəsi işinin artıq mükəmməl bir sistemi formalaşıb. Bu iş məzmun və forma cəhətdən xeyli zənginləşib, həyata keçirilən tədbirlər silsilə xarakter alıb. Bütün bunlar isə təbii ki, aparılan tərbiyə işlərinin nəticəyönümlülüyünə müsbət təsir edir. Gənclərlə aparılan vətənpərvərlik tərbiyəsi işinin mühüm istiqamətlərindən birini də ayrı-ayrı şəxsiyyətlərin, milli qəhrəmanların şəxsi nümunələrindən istifadədir. 44 günlük Vətən müharibəsi bu baxımdan da çoxaylı nümunələr təqdim edir. həmin müharibədəki bu tarixi zəfər Azərbaycan xalqının, xüsusən onun gənclərinin milli vətənpərvərlik ruhunun yüksək olduğunu, millətimizin Vətən, dövlət, dövlətçilik, milli bayraq sevgisini, dövlət başçısı və xalq birliyini parlaq şəkildə nümayiş etdirdi. O da fakdır ki, hər bir millətin milli-mənlik şüurunun formalaşması, mənəvi-siyasi cəhətdən yetişməsi həm də onun vətənpərvərlik səviyyəsi ilə müəyyən edilir. Bu mənada Azərbaycan dünyanın öndə gələn ölkələrindən biri hesab edilir. Cəmiyyətin bütün təbəqələrində, xüsusilə gənclər arasında vətənpərvərliyin gücləndirilməsi istiqamətində görülən işlər öz səmərəli nəticələrini verir.
Tahir TAĞIYEV Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
