İspaniya parlamenti Azərbaycan qarşı gözlənilməz addım atıb. Belə ki, İspaniya Deputatlar Konqresi (ölkə parlamentinin aşağı palatası) Azərbaycanla imzalanmış beynəlxalq müqaviləni ermənilərə görə təsdiq etməyib.
Bununla bağlı yayılan məlumatda deyilir: “Qeyri-adi faktdır ki, Konqres hökumət tərəfindən imzalanmış beynəlxalq müqaviləni təsdiq etmir. Erməni xalqı ilə həmrəylik əlaməti olaraq, deputatların əksəriyyəti bu ölkə ilə məxfi məlumatlarla bağlı razılaşmanın əleyhinə səs verib”.
Qeyd edək ki, 2021-ci ilin dekabrında Madriddə imzalanmış saziş Azərbaycanla məxfi məlumatların mübadiləsini və bu məlumatların qorunmasını nəzərdə tutur. Sənədin ratifikasiyası ilə bağlı 174 deputat əleyhinə, 132 deputat lehinə səs verib.
İspaniya parlamenti nadir hallarda hökumətin xarici dövlətlə imzalanan sənədi təsdiq etmir. İspaniyalı deputatlar Azərbaycanla imzalanmış müqavilənin əleyhinə səs verməklə Ermənistanla həmrəylik nümayiş etdiriblər. Baxmayaraq ki, İspaniyada elə güclü erməni diasporu yoxdur. Buna baxmayaraq, ispaniyalı deputatların əksəriyyəti Azərbaycanın əleyhinə səs verib.
“Burada xristian təəssübkeşliyi özünü göstərir və erməni diasporunun yalan təbliğatının təsiri altına düşüblər”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, İspaniya parlamentinin bu addımı ikrah doğurur: “İspaniyanın atdığı bu addım birbaşa bu ölkənin özünə ziddir. Əna azından ona görə ki, İspaniya özü separatçılıqdan əziyyət çəkir. İspaniyada Kataloniya müstəqillik istəyir, amma Madrid buna imkan vermir. 7,5 milyon əhaliyə, Ermənistandan da böyük əraziyə və min ildən çox dövlətçilik tarixinə malik olan Kataloniya 2017-ci ildə müstəqilliyini elan etdikdə, rəsmi Madrid bu akta imza atanlara qarşı çox sərt davrandı, Kataloniyanın rəhbəri Karlos Puçtemonu vəzifəsindən azad etdi. Halbuki, Kataloniya ilə Qarabağ məsələləri arasında böyük fərq var. Fərq ondan ibarətdir ki, katalonlar tarixən öz vətənlərində yaşayırlar və indi də İspaniyadan ayrılmaq istəyirlər. Ermənilər isə Rusiya imperiyası tərəfindən 19-cu əsrdə Azərbaycana köçürülmüş əhalidir. 1988-ci ildən bəri separatizm fəaliyyəti ilə məşğuldular. İspaniyanın indi atdığı addım insan haqları, xalqların öz müqəddəratını həlletmək hüququ, dövlətlərin ərazi bütövlüyü prinsipinə ziddir. Burada sadəcə olaraq İspaniya parlamentinin xristian təəssübkeşliyi özünü göstərir. Bir də erməni disporunun yalan təbliğatının təsiri altına düşüblər. Çünki İspaniyada güclü erməni lobbisi yoxdur. Hesab edirəm ki, İspaniyanın bu addımı bu ölkənin öz əleyhinə işləyəcək”.
Vidadi ORDAHALLI
