Rusiyanın “RİA Novosti” agentliyi növbəti dəfə Azərbaycan qanunlarına, onun suverenliyinə və ərazi bütövlüyünə hörmətsizlik göstərərək, təxribatçı məlumat yayıb. Azərbaycanda yayımı qadağan edilən “RİA Novosti” Rusiyanın Qarabağ separatçılarına “yardıma” göndərdiyi Ruben Vardanyanın “Dağlıq Qarabağın dövlət naziri” təyin olunması barədə xəbər yayıb.
Xəbərdə Azərbaycanın tərkib hissəsi olan bu ərazi “respublika” kimi təqdim olunur və qeyd olunur ki, bu qondarma rejimin “prezidenti” Araik Arutyunyan digər separatçı Artak Beqlaryanı “vəzifəsindən” azad edərək, Vardanyanı onun yerinə təyin edib. Qeyd edək ki, bundan öncə Rusiyanın “Kommersant” qəzeti Vardanyandan böyük bir müsahibə götürüb və orada da gözlənildiyi kimi, Azərbaycanın ərazi bütövlüyünə, suverenliyinə qarşı hədyanlara, şər-böhtanlara gen-bol yer verilib.
Sanki Rusiya Ermənistanın əlindən çıxdığını görür və Qarabağda daha da möhkəmlənmək istəyir. Qarabağın ermənilər yaşayan hissəsində gedən qanunsuz proseslərə Rusiyanın dövlət resurslarında verilən informasiya dəstəyinin başqa nə adı ola bilər?
Media məsələləri üzrə ekspert, əməkdar jurnalist Azər Həsrət “Bakı-Xəbər”ə açıqlamasında bildirdi ki, əvvəlcə, Ruben Vardanyanın Rusiya vətəndaşı olaraq gəlib Qarabağda yerləşməsi mütləq araşdırılmalıdır: “Hansı əsasla o, gəlib Azərbaycanın icazəsi olnadan bizim ərazimizdə məskunlaşıb? Onun Moskvanın planı əsasında Qarabağa yerləşdirildiyi faktı ortadadır. Təbiidir ki, bu qərarı o özbaşına verməyib. Görünür Kremlin onunla bağlı planları var. Üstəlik də, lazım olan etapda Vardanyanı “yem” olaraq ortaya atacaqlar. Cənab Prezident dəfələrlə deyib, sonuncu dəfə Putinlə olan Soçidəki görüşdə də bildirdi ki, Qarabağ məsələsi iki il əvvəl həll edilib. Bundan sonra bu istiqamətdə müzakirəyə də ehtiyac yoxdur. Amma Qarabağdakı erməni əhalimizlə inteqrasiya məsələlərini müzakirə etməliyik. Üçüncü tərəfi cəlb etmədən, Azərbaycan dövlətinin müvafiq vəzifəli şəxsləri Qarabağdakı erməni əhalimizlə maarifləndirici iş aparmalı olacaq. Erməni icmasının rəhbəri olan Arayik Arutunyan bizim tərəfdən cinayət törətmiş şəxs kimi tanınır və onunla hər hansı müzakirə aparıla bilməz. Vardanyanla hansısa məsələləri müzakirə etmək mümkün görünür. Rusiyanın dövlətə aid media resurslarının bu mövzu ətrafında manipulyasiya etməsi də Kremldən qaynaqlanır. Moskva bir tərəfdən Azərbaycanın haqlı mövqeyini dəstəklədiyini bildirir. Digər tərəfdən isə əlinin altında olan media quruluşlarına belə yazılar yazdırır. Bütün bunlar Azərbaycanla Rusiya arasındakı münasibətləri xoş olmayan məcraya aparır. Bundan sonra kimsə Rusiyadan soruşsa ki, niyə Azərbaycan bizimlə əvvəlki kimi mehriban deyil, həmin adama veriləcək cavabı bu cür media qurumlarının fəaliyyətində axtarmalı olacaqlar. Kreml bizim ərazi bütövlüyümüzə hörmət etmirsə, Azərbaycan da uyğun reaksiya verməlidir və verir də. Bu cür məsələləri ortaya atmaqda Rusiyanın bizdən daha çox pay qoparmaq məqsədləri var. Yəni, Qarabağ ermənilərinin inteqrasiya prosesində Rusiya bizim də bilmədiyimiz iddialara düşüb. Bunları reallaşdırmaq üçün kirli informasiyalarla üstümüzə gəlirlər”.
Məhəmmədəli QƏRİBLİ
