Şər yuvası Eçmizədin kilsəsi uzun illərdir ki, öz əsas vəzifəsini unudub ermənilərə revanşizmi, təcavüzü, nasizmi və başqa separatçı davranışları təlqin edir. Maraqlıdır ki, Ermənistan sülhə yaxınlaşmağa meyl göstərən kimi Eçmizədin kilsəsi dərhal hərəkətə keçir və öz məkrli planlarını irəli sürür, erməniləri və Ermənistanı öz mənfur niyyətlərinə şərik edir.
Oktyabrın sonlarında separatçıların rus sülhməramlılarının dəstəyi ilə Xankəndidə aksiya keçirdiyi məlumdur. Bu azmış kimi indi də ermənilər İrəvanda Qarabağ aksiyası keçirməyə hazırlaşırlar. 5 noyabra təyin edilən aksiyada diqqəti çəkən məqamlardan biri Eçmizədin kilsəsi ilə bağlı məsələdir, dha doğrusu,
II Qareginin də bu mitinqə qatılacağı barədə yayılan xəbərdir. Erməni mediasının yazdığına görə, noyabrın 5-də İrəvanda Qarabağ ermənilərinə dəstək mitinqinə bütün ermənilərin katolikosu II Qaregin də qatılacaq. Bu məsələ kilsənin kardinalları arasında müzakirə edilib: “Kardinallar deyirlər ki, Patriarx şəxsən Qarabağa dəstək ifadə etmək olan mitinqə getməyə meyllidir”.
“Katolikosun bu qədər cəsarətlənməsinin səbəbi…”
II Qareginin Qarabağ ermənilərinə dəstək mitinqinə qatılacağı barədə yayılan informasiyaya və bütövlükdə bu prosesə şərh verən Milli Cəbhə Partiyasının (MCP) sədr müavini, ilahiyyatçı Tural İrfan “Bakı-Xəbər”ə bildirdi ki, erməni din xadimlərinin türk düşmənçiliyi hər zaman olub və bu gün də var. “Uzun müddətdir ki, onların türk düşmənçiliyi davam edir. XX yüzilliyin əvvəllərindən başlayaraq Birinci Qarabağ Müharibəsində də, sonrakı dönəmlərdə də, bu gün də erməni din xadimləri ermənilərin təcavüz, soyqırımlar, terror törətməsinə bizim təbrimizcə desək “fətva” veriblər. Ona görə də erməni din xadimlərinin fəaliyyətini dinlə əlaqələndirmək düzgün olmazdı. Çünki onların davranışı nə xristianlığa, nə də başqa dinlərə uyğundur. Erməni kilsə xadimləri din pərdəsinə bütünmüş, dindar donu geyinmiş terrorçulardır. Bunu başqa cür qiymətləndirmək olar. Biz bunu son dövrlər özünü müsəlman hesab edən İranın din xadimlərinin timsalında da gördük ki, özlərini din xadimi, ayatullah adlandırırlar, amma görün necə hökmlər verir, hansı hərəkətlərə imza atırlar. Erməni din xadimləri də təbii ki, belədirlər. Bu bir sıra tarixi mənbələrdə də öz əksini tapıb ki, ermənilərin dünyada törətdiyi vandalizm aktlarına, terrora, soyqırımlara məhz erməni Qriqoryan kilsəsi rəvac verib. Səhv etmirəmsə, hətta onların 14 “milli qəhrəmanından” biri də ermənilərin əvvəlki katalikosudur. Bu da təsadüfi deyil. Erməni revanşizminin, faşizminin başında Eçmizədin kilsəsi, katolikos dayanıb. Şübhəsiz ki, bununla bağlı bir növ xristian din xadimlərini tərpətmək lazımdır, bunun üçün də müsəlman din xadimləri hərəkətə keçməlidir. Bu sahədə bizim Şeyxülislamın boynuna böyük bir vəzifə düşür, necə ki, İranla bağlı gecikmiş də olsa bəyanat verdi. Yaxşı olardı ki, o xristian aləminə, eyni zamanda da geniş əlaqələrindən istifadə edib həm də müsəlman din xadimlərinə səslənsin. Dünyanın bir neçə nüfuzlu din xadimi Eçmizədin kilsəsinin, II Qareginin bu mənfur əməllərini gündəmə gətirərsə və bunun xristianlıqla, yaxud dünyadakı tolorentlıq ənənələri ilə uyğun olmadığını bəyan etsələr çox böyük nəticə əldə etmək olar. Dini tolerantıq qaydalarını pozduğuna, terrora, revanşizmə rəvac verdiyinə görə hətta erməni katolikosu II Qaregini beynəlxalq məhkəməyə də vermək olar. Bizim ölkəmizdə də xristian icmasının rəhbərləri var, katolik, provaslavların, həmçinin alban-udi dini icmasının rəhbərləri var, bizim də müsəlman dini rəhbərimiz var”.
T.İrfanın sözlərinə görə, onlar yığışıb həm ortaq bir bəyanat verə bilərlər. O, qeyd etdi ki, bir müddət əvvəl Şeyxülislam bəyanat verib, amma arzu edilən hal Azərbaycandakı bütün dini icmaların rəhbərlərinin II Qareginin əməllərinə qarşı vahid bəyanatla çıxış etməsidir. “Katolikosun bu qədər cəsarətlənməsinin səbəbi iranlı din xadimlərinin erməni din xadimlərinə verdiyi dəstəklə, vəd etdikləri arxayınlıqla bağlıdır. Çünki onların din xadimləri bir-biri ilə çox sıx əlaqədədir. Demək olar ki, İrandakı dinin də erməni katalikos məhzəbi ilə o qədər də çox fərqi yoxdur. Təhrif edilmiş dindən söhbət gedir. Təbii ki, söhbət orjinal islamdan və xristianlıqdan getmir. Hesab edirəm ki, ölkəmizdəki dini icmaların rəhbərləri həm Roma Papasına, həm də dünyanın digər nüfuzlu dini liderlərinə II Qareginin sepatçılığı təbliğ edən davranışları barədə məktublar yazmalıdırlar”.
Erməni din xadiminin Xankəndidəki separatçılara dəstək verməsi pislənilməlidir və onun erməniləri qana, terrora səsləməsi kəskin şəkildə beynəlxalq ictimaiyyətin qınağına tuş gəlməlidir: “Heç şübhəsiz ki, erməni katolikosu Ermənistan xüsusi kəşfiyyat orqanlarının və bu kimi xarici təşkilatların əlaltısıdır, alətidir. Onu dinlə əlaqələndirmək olmaz və II Qaregin şübhəsiz ki, dindar donuna bürünən bir şeytandır”-deyə T.İrfan vurğuladı.
İradə SARIYEVA
