Azərbaycan Prezidenti, Silahlı Qüvvələrin Ali Baş Komandanı İlham Əliyevin tapşırığına əsasən müdafiə naziri general-polkovnik Zakir Həsənov və nazirliyin digər rəhbər heyəti respublikamızın cənub rayonlarında yerləşən hərbi hissə və birləşmələrin döyüş hazırlığını yoxlayıb. Müdafiə naziri Xüsusi Təyinatlı Qüvvələrin hərbi hissələrinin qeyd olunan ərazilərdə keçirilən təlimini izləyib.
Diqqətçəkən məqamlardan biri də sözügedən təlimi Zakir Həsənovla yanaşı olaraq Türkiyə Quru Qoşunlarının əməliyyat üzrə rəisi, general-mayor Bəxtiyar Ersayın (Bəxtiyar Paşa) da izləməsi olub.
Cari ilin döyüş hazırlığı planına əsasən Xüsusi Təyinatlı Qüvvələrin hərbi hissələri ilə cənub bölgəsində keçirilən təlimdə gecə və məhdudgörmə şəraitində müxtəlif xüsusi tapşırıqlar icra edilib. Müdafiə Nazirliyindən verilən xəbərə görə, təlimin ssenarisinə uyğun olaraq xüsusi təyinatlılar kəşfiyyat məlumatları əsasında şərti düşmənin dərinliyinə sızaraq pusqu, basqın, təxribat təlim döyüş tapşırıqları yerinə yetiriblər.
Xüsusi təyinatlılar tərəfindən aşkar edilmiş sığınacaqlarda və şərti cəbhənin digər istiqamətlərində bilavasitə təmas vəziyyətində düşmən texnikası və canlı qüvvəsinin məhv edilməsi tapşırıqları yerinə yetirilib.Düşmən arxasında qarşılaşa biləcək maneə sistemlərinin kiçik bölmələr halında dəf edilməsi, yaşayış məntəqələrində döyüşün aparılması və ələ keçirilməsi fəaliyyətləri icra edilib.
Qeyd edək ki, Vətən müharibəsində qazanılan döyüş təcrübəsi nəzərə alınmaqla gecə və gündüz keçirilən təlimlərdə əsas məqsəd xüsusi təyinatlıların peşəkarlıq səviyyəsinin daha da artırılması və praktiki vərdişlərinin təkmilləşdirilməsidir.
Sərhədlərimizdə genişmiqyaslı hərbi təlimlər həyata keçirən İran bundan hansı nəticələri çıxarmalıdır?
Emin Həsənli: “Bu təlimlərdən İran dövləti özünə lazım olan mesajı alacaq”
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, son dövrlər İran da Azərbaycanla sərhəddə hərbi təlimlər keçirir: “30 ildir Azərbaycan torpaqları işğalda qaldığı zaman İran heç vaxt hərbi təlimlər keçirmirdi. Ölkəsinin başqa sərhədlərində keçirirdi. İndi isə, ardı-ardına təlimlər keçirdir, sərhədlərin dəyişilə bilməyəcəyinə dair bəyanatlar verirlər. İran Azərbaycan torpaqları iğalda olanda, məscidlər, məzarlıqlar dağılanda, islam abidlərinə zərbə dəyəndə islam dövləti kimi səsini belə çıxartmırdı.
Əksinə, islam məscidlərinin, islam məzarlıqlarının, islam abidələrinin dağılması üçün, ermənilərə həm hərbi, həm maddi və silah-sürsatla dəstək olurdu. Ermənistan İran üzərindən mövcudluğunu davam etdirirdi. Azərbaycan dövləti öz ərazi bütövlüyünü, müstəqilliyini qorumaq üçün, güclü orduya malikdir. Ordusunun güclənməsi, müasir silah-sürsatla təmin edilməsi üçün bütün zəruri tədbirlər Ali Baş Komandan cənab Prezident İlham Əliyev tərəfindən görülüb. Bu gün bizim fəxr yerimiz xüsusi təyinatlarımızdır. Azərbaycan ordusunun xüsusi təyinatları son vətən müharisindən şərəflə çıxdı. Şuşa zirvəsini azad edərək, Azərbaycan xalqına böyük qələbə bəxş edib. Bu döyüşlərdə nə qədər, cəsur, qəhrəman, vətənpərvər olduqlarını sübut etdilər. Təlimlərdə iki nüfuzlu generalın - Hikmət Mirzəyev, Bəxtiyar Paşanın iştirak etməyi təsadüfi deyil. Türkiyə silahlı qüvvələri ilə Azərbaycan silahlı qüvvəri həm Türkiyədə, həm Azərbaycanda birgə təlimlər keçirib. Şuşa Bəyənnaməsindən sonra Türkiyə və Azərbaycan bir-birinə hərbi dəstək verəcəklərini öz üzərlərinə götürdülər. Hər iki ölkənin parlamenti bunu təsdiqlədi. Türkiyə ilə Azərbaycan bir-birlərinə qarşı olacaq hansısa bir təcavüzə, işğala birgə cavab verəcəklərini, bütün mənalarda bir-birinə dəstək olacaqlarını bəyan ediblər. Ona görə də, türkiyəli generalın bu təlimlərdə iştirak etməsi hər kəsə bir mesajdır. Türkiyənin daim Azərbaycanın yanında olması mesajıdır. Bu təlimlərin keçirilməsi həmçinin dosta, düşmənə mesajdır. Açıq bildirilir ki, Azərbaycan öz müstəqilliyini, ərazi bütövlüyünü, şəhidlərimizin qanı bahasına alınan torpaqlarımızı əbədi olaraq qoruyacaq. Bunun üçün bütün zəruri addımlar atılacaq. Azərbaycan bütün qonşuları ilə sülh-əminamanlıq içində yaşamaq istəyir. Dünyada sülhün və təhlükəsizliyin qorunması, dinlərarasl normal münasibətlərin yaranması üçün ölkəmizdə istənilən şərait var. Azərbaycan Qosulmama Hərəkatının sədri kimi də islam həmrəyliyi üçün də çox böyük töhvə verib. Təəssüflər olsun ki, bəzi dövlətlər, əsas da İran islam adı altında başqa xoşagəlməz fəaliyyətlər həyata keçirdir. Ən yumşaq şəkildə desək, islam dininin prinsiplərinə ziddlik təsşkil edən fəaliyyətlə məşğuldur. Bütün bunlar bir çox hallarda Azərbaycanın milli və dövlət maraqlarına ziddir. Biz milli maraqlarımızı, dövlət maraqlarımızı hər şeydən üstün tuturuq və hər zaman olduğu kimi, yenə də bizim maraqlarımızı Azərbaycan xalqı, Azərbaycan gəncliyi qoruyacaq. Cənubda yaşayan 30 milyondan çox soydaşımız da öz dövlətləri olan Azərbaycan Respublikasına mənəvi, psixolojo dəstək olacaqlarını bəyan ediblər. Son proseslərdə biz bütün bunları bir daha gördük. Hesab edirəm ki, bu təlimlərdən İran dövləti özünə lazım olan mesajı alacaq”.
Məhəmmədəli QƏRİBLİ
