ABŞ Dövlət Departamenti Ukraynada minaların təmizlənməsinə kömək etmək üçün Kaliforniya şirkətinə 47,6 milyon dollar ayırıb.
Bunu ABŞ Dövlət Departamentinin sözçüsü Ned Prays bəyan edib: “Biz Ukraynaya təcili mina təmizləmə yardımı göstərmək üçün Kaliforniyanın Pasadena şəhərindəki Tetratec Inc şirkətinə 47,6 milyon dollar məbləğində vəsait ayrıldığını elan edirik”.
Avropa İttifaqının xarici xidmətinin nümayəndəsi Nabila Massrali bəyan edib ki, Ukraynada hərbi əməliyyat başlayandan bəri təşkilat Kiyevə silah tədarükü üçün Avropa Sülh Fondundan 3,1 milyard avroya yaxın vəsait ayırıb. Bu ilin yayında isə ABŞ Ukraynada minaların təmizlənməsi ilə bağlı 89 milyon dollar ayırıb.
Görünən odur ki, Ukraynada müharibə hələ bitmədiyi halda, ABŞ minaların təmizlənməsinə vəsait ayırır. Adətən beynəlxalq təşkilatlar, böyük dövlətlər müharibə bitəndən sonra bu kimi işlərə vəsait ayırırlar. Azərbaycanda 2 ildir müharibə bitib. İşğaldan azad olunmuş ərazilər kütləvi şəkildə minalanıb. Özü də Qarabağda ərazilərin minalarla çirklənmə səviyyəsi həddən artıq böyükdür. Nəzərə almaq lazımdır ki, minaların təmizlənməsi uzun vaxt və böyük vəsait tələb edir. O zaman ABŞ niyə Azərbaycana minaların təmizlənməsi ilə bağlı vəsait ayırmaq istəmir? İndiyə qədər bu məqsədlə çox cüzi həcmdə yardım edilib. ABŞ-la yanaşı, bir sıra beynəlxalq qurumlar da Azərbaycanın minalanmış ərazilərinin təmizlənilməsinə biganə yanaşırlar.
“ABŞ-ın mina təmizləmə məqsədi ilə Ukraynaya vəsait ayırması əsasən siyasi səbəblərlə bağlıdır”
Məsələyə münasibət bildirən hərbi ekspert İbrahim Rüstəmlinin fikrincə, bunun başlıca səbəbi Azərbaycana münasibətdə mövcud olan ikili standartlarla bağlıdır: “Qərb 30 ilə yaxın işğal altında olan əraziləri görməzdən gəldi. Bir dəfə olsun Ermənistanın işğalçılıq siyasətini kəskin pisləmədilər. Ermənistanın ərazilərimizi kütləvi şəkildə minalaması məcburi köçkünlərin geri dönüşünü, yaşayış məntəqələrinin bərpasını, oradakı torpaqların dövriyyəyə cəlb olunmasını yubadır. İki il ərzində 200-dən çox mülki vətəndaşımız minaya düşərək ya həyatını itirib, ya da şikəst olub. Ancaq bütün bunlar əfsuslar olsun ki, beynəlxalq qurumları narahat etmir. Azərbaycan öz resursları hesabına əraziləri minalardan təmizləyir. ANAMA ilə yanaşı, Müdafiə Nazirliyinin, Dövlət Sərhəd Xidmətinin və Fövqəlada Hallar Nazirliyinin istehkamçıları mina təmizləmə işlərini həyata keçirir. İndiyə qədər Avropa İttifaqı, Böyük Britaniya və ABŞ çox az miqdarda Azərbaycanda minaların təmizlənilməsinə vəsait ayırıblar. Beynəlxalq təşkilatlar bunu onunla əsaslandırırlar ki, Azərbaycan Ottava Konvensiyasına qoşulmadığı üçün yardım edə bilmirlər. Ancaq hesab edirəm ki, bu, bəhanədir. Azərbaycan müstəqillik əldə edəndə ərazilərində müharibə gedirdi. Daha sonra ərazilərimiz işğal olundu. Ondan sonra da tərəflər arasında sülh sazişi yox, atəşkəs imzalandı. Belə şərtlər altında Azərbaycan Ottava Konvensiyasına necə qoşula bilərdi? ABŞ-ın mina təmizləmə məqsədi ilə Ukraynaya vəsait ayırması əsasən siyasi səbəblərlə bağlıdır. Biz nəzərə almalıyıq ki, Ukraynada Rusiya ilə vuruşan həm də Birləşmiş Ştatlardır. ABŞ-ın hərbi-iqtisadi, logistik və digər yardımları olmasaydı, Ukrayna Rusiya qarşısında duruş gətirə bilməzdi”.
Vidadi ORDAHALLI
