Belarus Prezidenti Aleksandr Lukaşenkonun Lukaşenkonun Qarabağla bağlı KTMT toplantısında səsləndirdiyi fikirlər Ermənistanı əməllicə bir-birinə vurub.
Ermənistan Xarici İşlər Nazirliyinin (XİN) mətbuat katibi Vahan Hunanyan Lukaşenkonun İrəvana ünvanladığı “xaotik və danışıqların məntiqindən uzaq” bəyanatlarını şərh etməyi yersiz hesab edib: “Biz Belarus prezidentinin danışıqlar məntiqindən uzaq, müttəfiq və tərəfdaş münasibətlərinə zidd olan xaotik bəyanatlarını şərh etməyi məqsədəuyğun hesab etmirik”.
Ermənistan Xarici İşlər Nazirliyindən bildirilib ki, bu bəyanatlar KTMT üzvünün Lukaşenko tərəfindən imzalanmış öhdəliklərini şübhə altına alır. Ermənistanın keçmiş xarici işlər naziri Zohrab Mnatsakanyan Lukaşenkonu diktator adlandırıb: “KTMT öz üzvləri üçün kollektiv təhlükəsizlikdən başqa hər şeydir. Belarus açıq şəkildə onu Azərbaycan üçün kollektiv təhlükəsizlik təşkilatına çevirir. Belarus diktatorunun açıq-aşkar mühakimələri və qəzəb püskürməsi təhlükəlidir...”.
Belarus Xarici İşlər Nazirliyinin mətbuat katibi Anatoli Qlaz İrəvanın ittihamlarına cavab olaraq bildirib ki, Lukaşenkonun Ermənistan-Azərbaycan münaqişəsinə yanaşması reallığa əsaslanır və başa düşüləndir: “Belarus bütün tarixi boyu sözdə deyil, əməldə müttəfiqlik öhdəliklərinə sadiqliyini təsdiqləyib. Ona görə də biz dostlarımıza və tərəfdaşlarımıza Belarus dövlət başçısının bu çətin, lakin həll oluna bilən məsələ ilə bağlı çoxsaylı çıxışlarını diqqətlə oxumağı və yenidən oxumağı tövsiyə edirik”.
Qeyd edək ki, Lukaşenko Ermənistanın baş naziri Nikol Paşinyanı Rusiyanın vasitəçiliyi altında Azərbaycan Prezidenti İlham Əliyevlə danışıqlar masasına oturmağa çağırıb. KTMT-nin oktyabrın 28-də keçirilən növbədənkənar sessiyasında Lukaşenko Ermənistanın Baş naziri Nikol Paşinyana sərt cavab verib. Onun fikirləri Ermənistanda birmənalı qarşılanmayıb.
Maraqlıdır, Lukaşenkonun o mövqeyində rəsmi İrəvanı qıcıqlandıran nə var?
“Lukaşenko tək özünün yox, dolayısı ilə Putinin də mövqeyini sərgilədiyi üçün ermənilər məyusdurlar”
Sözügedən məsələyə aydınlıq gətirən Aydınlar Partiyasının sədr müavini Qorxmaz İbrahimlinin fikrincə, Lukaşenko müəyyən mənada Rusiya prezidenti Vladimir Putinin adından danışdığı üçün ermənilər bu dərəcədə narahat və məyusdular: “Əvvəla, Lukaşenko Azərbaycana xoş münasibəti olan dövlət başçısıdır. Belarusla Azərbaycan arasında çox yaxşı siyasi-iqtisadi münasibətlər var. Düşünmürəm ki, erməni tərəfi Lukaşenkonun Azərbaycana yönəlik dost münasibətinə görə belə məyusdular. Qətiyyən yox. Lukaşenko məlum tədbirdə tək özünün yox, dolayısı ilə Putinin də mövqeyini sərgilədiyi üçün ermənilər məyusdular. Çünki onlar yaxşı bilir ki, Lukaşenko bununla Putinin mövqeyini ifadə edir. Putinin deyə bilmədiyini Lukaşenko deyir. Bax məsələnin kökündə dayanan məqam budur. Ermənilər bütün bunların fərqindədilər. Bu o deməkdir ki, Ermənistan KTMT-yə arxayın olmamalıdır. Hesab edirəm ki, bütün bunlar Vətən müharibəsindən sonra Azərbaycanın möhkəmlənən mövqeyi ilə bağlıdır. Bu, həm də onu göstərir ki, Rusiya Paşinyan hakimiyyətindən narazı olduğu üçün Ermənistanı cəzalandırır”.
Vidadi ORDAHALLI
