Məlum olduğu kimi, noyabrın 1-də Prezident İlham Əliyev Ərəb Dövlətləri Liqasının 31-ci Sammitinə ev sahibliyi edən Əlcəzair Xalq Demokratik Respublikasının Prezidentinin dəvəti ilə Zirvə toplantısında Fəxri qonaq statusunda iştirak etmək üçün bu ölkəyə səfərə edib.
İlham Əliyevin Əlcəzairdə keçirilən Ərəb ölkələri Liqasının 31-ci zirvə görüşünə dəvət edilməsi nə ilə bağlıdır? Bunun səbəbləri və əhəmiyyəti nədir? Azərbaycana hansı nöqteyi-nəzərdən bu cür münasibət nümayiş etdirilib? Ərəb ölkələri liqasına İlham Əliyevi niyə dəvət ediblər?
“Bu təşkilatın 31-ci zirvə görüşünə Azərbaycan Prezidentinin dəvət olunması onun apardığı düzgün xarici siyasətlə, prinsipial məqamlarda tutduğu cəsarətli mövqe və regiondakı çəkisi ilə bağlıdır”
Mövzunu şərh edən Azərbaycan Naminə Alyans Partiyasının sədri Abutalıb Səmədov “Bakı-Xəbər”ə bildirdi ki, Ərəb Ölkələri Liqası təşkilatı dünyanın nüfuzlu təşkilatlarından biridir. “Bu təşkilatın 31-ci zirvə görüşünə Azərbaycan Prezidentinin dəvət olunması onun apardığı düzgün xarici siyasətlə, prinsipial məqamlarda tutduğu cəsarətli mövqe və regiondakı çəkisi ilə bağlıdır. Son illər Azərbaycan atdığı prinsipial addımlarla bütün dünyanın diqqətini cəlb edə bilib. Ukraynaya qarşı Rusiyanın təcavüzü baş verərkən Azərbaycan yeganə düzgün mövqe tutdu. Bir tərəfdən tərəfsizliyini qorudu, o biri tərəfdən Ukraynaya açıq şəkildə mümkün yardımları göstərdi. Dünya üçün çox böyük əhəmiyyətə malik olan Rusiya təhlükəsinin azaldılmasına Azərbaycan da öz töhfəsini verdi. Avropa Rusiya qazından imtina etmək üçün xüsusi proqram tərtib etdi.
155 milyard kub metr rus qazından imtina etmək üçün Azərbaycana xüsusi yer ayırdı. Çünki Rusiyanı neft-qaz gəlirlərindən məhrum etmədən onun təcavüzkar planlarını pozmaq mümkünsüzdür. Azərbaycan burda ehtiyatlı mövqe də tuta, Rusiya təhlükəsini nəzərə alıb Azərbaycanın Avropaya satdığı qaz miqdarını artırmaq təklifindən imtina edə bilərdi. Ancaq bunu Azərbaycan Prezidenti etmədi. Avropa İttifaqı ilə imzalanan memorandumda öz üzərinə 2027-ci ilə qədər Avropaya göndəriləcək qazı iki dəfə artırmaq öhtəliyi götürdü. Bu da təbiidir ki, dünyada qiymətləndirildi. Baxmayaraq, Rusiya Xarici İşlər Nazirliyi bəyanat verdi ki, biz buna etiraz etmirik, bu Azərbaycan Rusiya müttəfiqlik münasibətlərinə zidd deyil. Sözsüz ki, bu Rusiyanı həddən artıq qıcıqlandırdı. Nəhayət, İranın regionda tutduğu son dərəcə yanlış mövqeyə qarşı Azərbaycan öz prinsipial münasibətini bildirdi, heç bir təzyiqi qəbul etməyəcəyini İran hakimiyyətinin nəzərinə çatdırdı, “sən mənim daxili işlərimə qarışa bilməzsən” dedi. Kiminlə münasibət qurmaq məsələsini Azərbaycan özü həll edir. Bu zaman İranın göstərişlərinə, tövsiyələrinə Azərbaycanın heç bir ehtiyacı yoxdur. Üstəlik, İranın sərhəddə keçirdiyi təxribatçı təlimə qarşı Azərbaycan eyni tədbirlə cavab verdi. Bununla bir daha həm İrana, həm də bütün dünyaya nümayiş etdirdi ki, Azərbaycan heç nədən, heç kimdən çəkinmir. Bu da dünyada qiymətləndirildi”.
A.Səmədovun sözlərinə görə, bu ilk növbədə İranla münasibətlərdə ciddi problemləri olan ərəb dövlətləri tərəfindən yüksək qiymətləndirildi: “Azərbaycan “Opek+ tədbirlərində atılan cəsarətli addımlara dəstək verdi, ilk növbədə ərəb ölkələri ilə birgə çıxış etdi. Təbiidir, bu da dünya tərəfindən, xüsusən də ərəb ölkələri tərəfindən müsbət qiymətləndirildi. Nəhayət, Praqa görüşündən sonra Makronun son dərəcə yanlış və təxribatçı bəyanatına Azərbaycan Prezidenti kəskin cavab verdi, Fransanın cinayətlərini xatırlatdı. Bu cəsarət, bu prinsipiallıq da dünya, Fransanın işğalçılıq, müstəmləkəçilik hərəkətlərindən ziyan çəkmiş ərəb ölkələri tərəfindən yüksək qiymətləndirildi. Biz əlbəttə, ilk növbədə Əlcəzairi nəzərdə tuturuq. Azərbaycan Prezidentinin bu nüfuzlu təşkilatın Sammitinə dəvət olunması bir daha göstərdi ki, Azərbaycan düzgün, cəsarətli və prinsipial xarici siyasət yeridir. Bu siyasət də onun nüfuzunun artmasına xidmət edir. Azərbaycan dünyada güvənilən bir ölkəyə çevirilib və hamı bilir ki, Azərbaycan bir sənədə qol çəkirsə, bir öhtəliyi öz üzərinə götürürsə o mütləq icra olunacaq. Azərbaycanın, Azərbaycan Prezidentinin mövqeyi Ermənistan Baş Nazirinin mövqeyi kimi gah o tərəfə, gah bu tərəfə dəyişilməyəcək. Bütün bunlar da təbiidir ki, Azərbaycanın dünyada çəkisinin, nüfuzunun artmasına xidmət edir. Təsadüfi deyil ki, Azərbaycan dünyanın ən böyük beynəlxalq təşkilatlarının birinə-Qoşulmama Hərəkatına rəhbərlik edir. Bu rəhbərlik müddəti həmin ölkələr tərəfindən bir il də uzadılıb, bu da Azərbaycanın beynəlxalq çəkisinə verilən obyektiv qiymətdir”.
İradə SARIYEVA
