Dövlət Təhlükəsizliyi Xidməti (DTX) Mədəniyyət Nazirliyində xüsusi əməliyyat keçirdiyinə dair məlumat yayılıb. Hələ ki, son günlər dövriyyədə olan bu məlumat rəsmi dairələr tərəfindən təkzib edilmir.
Bildirilir ki, əməliyyat nəticəsində mədəniyyət nazirinin birinci müavini Elnur Əliyev də saxlanılıb. Mədəniyyət nazirinin birinci müavini vəzifəsinə təyin edilənədək Elnur Əliyev nazirin müşaviri idi.
Gəlin Elnur Əliyevin maraqlı tərcümeyi halına diqqət edək.
Elnur Əli oğlu Əliyev 1979-cu ildə Bakı şəhərində anadan olub. Azərbaycan Dövlət İqtisad Universitetində bakalavr (1999-cu il) və magistr (2001-ci il) dərəcələrini əldə edib. 2009-2013-ci illərdə Böyük Britaniyanın Mançester Biznes Məktəbinin Maliyyə üzrə Biznes İdarəedilməsi (MBA) proqramını müvəffəqiyyətlə bitirib.
O, 2000-2004-cü illərdə Xarici İşlər Nazirliyində çoxtərəfli diplomatiya sahəsində çalışıb, regional təşkilatlar çərçivəsində (Aİ, QDİƏT, GUAM, ECO və s.) əməkdaşlığa töhfə verib və bir sıra regional əməkdaşlıq qruplarında sədrlik edib.
2004-2008-ci illərdə Azərbaycanın Belçika Krallığındakı Səfirliyində işləyib və müxtəlif sahələrdə Azərbaycan və Aİ arasında əməkdaşlığın əlaqələndirilməsinə məsul olub. E.Əliyev 2008-2017-ci illərdə Ciddədə yerləşən İslam İnkişaf Bankına müxtəlif vəzifələrdə, o cümlədən beynəlxalq ticarətin maliyyələşdirilməsində MDB üzrə baş menecer vəzifəsində çalışıb.
Elnur Əliyev 2017-2020-ci illərdə Azərbaycan Respublikasının Birləşmiş Ərəb Əmirliklərindəki (BƏƏ) Səfirliyində ticarət nümayəndəsi vəzifəsində çalışıb.
2017-ci ildə Azərbaycan Respublikasının Prezidentinin müvafiq Sərəncamı ilə E.Əliyevə ikinci dərəcəli fövqəladə və səlahiyyətli elçi diplomatik rütbəsi verilib. 2020-ci ildə Azərbaycan Respublikası mədəniyyət nazirinin müşaviri vəzifəsinə təyin edilib. O, bu vəzifədə 2021-ci ilə qədər çalışıb.
Elnur Əliyev 2021-ci ildə Azərbaycan Respublikasının Prezidentinin müvafiq Sərəncamı ilə mədəniyyət nazirinin birinci müavini vəzifəsinə təyin edilib.
E. Əliyev ingilis, rus, fransız dillərində danışır.
Evlidir, üç övladı var.
Tərcümeyi halda olduqca maraqlı detallar var. Sanki xüsusi olaraq Elnur Əliyevin fəaliyyəti şişirdilir ki, harasa yaxşı təyinat alsın. Məsələn, tərcümeyi halda belə bur detal var : “Xarici İşlər Nazirliyində çoxtərəfli diplomatiya sahəsində çalışıb”. Hər halda, vəzifənin konkret adı olmalıdır, “çoxtərəfli diplomatiya sahəsi” deyəndə, nə başa düşülə bilər? Eyni zamanda, anlamaq olmur ki, bu adam diplomatdır, yoxsa iqtisadçı? Bütün bunlardan hansı nəticələri çıxarmaq olar?
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, olduqca acınacaqlı bir vəziyyətlə üz-üzəyik:
“ Təəssüflət olsun ki, bu gün Azərbaycanın ictimai-siyasi həyatında, müxtəlif nazirliklərin, komitələrin strukturlarında belə bir qeyri-müəyyən tərcümeyi hala malik insanlar fəaliyyət göstərir. Hətta, müxtəlif yoxlamalar nəticəsində məlum olur ki, hansısa bir hüquq- mühafizə orqanlarında çalışmış insanların belə diplomları saxta çıxır. Burada sözsüz ki, Elnur Əliyevin də avtobioqrafiyasında real görünən yalnız İqtisad Universitetində onun magistr və bakalavr təhsil almasıdır. Amma, ondan sonrakı pillələrdə çox ciddi qeyri-müəyyənliklər var. Mən hesab edirəm ki, bu həm də bir gəncin korrupsiyalaşmasına, bir gəncin gələcək taleyinin qaranlıq istiqamətə yönləndirilməsinə xidmət edən bir məsələdir. Bu cür qısa müddət inkişaf yolu keçib, hakimiyyət pillələrinə, hətta nazir müavini postuna qədər gəlib çıxmasında müəmmalar çoxdur. Bir şəxsin bu statusa gəlməyində ölkə Prezidentinə qədər olan aralıqda müxtəlif səlahiyyət sahibi olan insanların qohumluq, yaxınlıq, ailə münasibətləri təsirləri rol oynayıb. Bu gün ölkə Prezidentinin sərəncamı ilə həmin şəxs işdan azad olunursa, həbs olunursa və haqqında cinayət işi qaldırılırsa, bu onun göstəricisidir ki, həmin şəxsin tərcümeyi halı ilə bağlı ölkə Prezidentinə yalnış məlumatlar verilib. Sonra da onun birbaşa sərəncamı ilə nazir müavini vəzifəsinə təyin edilib. Mən düşünürəm ki, dövlət qurumlarının rəhbərləri də diqqətli olmalıdırlar. Yeni bir idarəetmə sistemi formalaşdırılmalıdır. Elə bir ciddi islahatlar aparılmalıdır ki, həm də xalqın və millətin seçimi öz rolunu oynamış olsun. Nəticə eribarı ilə Azərbaycan mentalitetinə , Azərbaycan mənəvi dəyərlərinə sahib olmayan insanların vəzifə pillələrinə gəlib çıxa bilməsi, vergi ödəyicilərinin imkanları əsasında formalaşdırılmış dövlət büdcəsinin talanmasına səbəb olur. Tərcümeyi haldakı
“çoxtərəfli diplomatiya sahəsi” nin hansı anlam kəsb etdiyini mən də anlaya bilmədim. Qəsdən belə dolaşıq detallar yazırlar ki, qeyri-müəyyənlik olsun”.
Məhəmmədəli QƏRİBLİ
