İran xüsusi xidmət orqanları tərəfindən Azərbaycan Respublikası vətəndaşlarının gizli şəkildə ölkə hüdudlarından kənarda hərbi təlimlərə cəlb olunması, onların maliyyələşdirilməsi və fəaliyyətlərinin istiqamətləndirilməsi, Azərbaycan Respublikasının dövlət təhlükəsizliyi maraqlarına zidd olaraq istifadə edilməsi məqsədilə şantaj və digər zorakı üsullarla təsir dairəsində saxlanılması halları ilə bağlı Dövlət Təhlükəsizliyi Xidməti tərəfindən kompleks araşdırma tədbirləri həyata keçirilir.
DTX-dan verilən məlumata görə, əməliyyat-istintaq tədbirləri ilə müəyyən edilib ki, İran xüsusi xidmət orqanının nəzarəti altında, radikal-ekstremist dini ideyaların aşılanması yolu ilə Azərbaycan Respublikası vətəndaşlarından ibarət gizli yaradılmış qanunsuz silahlı birləşməyə rəhbərlik analoji cinayət əməllərinə görə 2018-ci ildən barələrində məhkəmənin qərarı ilə həbs qətimkan tədbiri seçilərək beynəlxalq axtarışa verilib, hazırda İranda gizlənən İbrahimbəyli Tohid Alim oğlu, Əsədov Rövşən Elçin oğlu, Məmmədov Orxan Kəmran oğlu, Hacıyev Elşad Elçin oğlu (Əkrəm Hacızadə) və digərlərinə həvalə edilib…
Araşdırmalar zamanı həmçinin qeyd olunan hərbi təlimlərə cəlb edilmiş Məmmədov Fəqan Sədrəddin oğlunun daha sonra İranın Azərbaycandakı səfirliyinə məxsus avtomaşınla Azərbaycana çatdırılan, üzərində dini məzmunlu şüarlar yazılmış köynəklərin respublikanın bəzi rayonlarında keçirilməsi planlaşdırılan aksiyaların iştirakçılarına paylanmasını təşkil etməsinə əsaslı şübhələr müəyyən edilib.
Məlum olub ki, qeyd olunan xüsusi xidmət orqanlarının nümayəndələri Ermənistan silahlı birləşmələrinin işğalçı əməllərinə bəraət qazandırmaları ilə əlaqədar aralarında fikir ayrılığı yaranan Azərbaycan Respublikası vətəndaşlarını sonra da təsir dairəsində saxlamaq üçün onları cəlb edildikləri hərbi təlimlərə dair videokadrlarla və digər üsullarla şantaj ediblər. Hazırda kompleks əməliyyat-istintaq tədbirləri davam edir.
Dövlət Təhlükəsizliyi Xidməti hər hansı qanunsuz silahlı birləşmələrdə iştiraka cəlb edilən Azərbaycan Respublikası vətəndaşlarına qarşı ən kəskin tədbirlərin görüləcəyini, onların ciddi cinayət məsuliyyəti ilə üzləşəcəklərini vurğulayır, xarici xüsusi xidmət orqanlarının hər hansı formada təsir dairəsinə düşmələri barədə ölkənin təhlükəsizlik orqanına vaxtında məlumat vermələrinin zəruriliyinə dair onları xəbərdar edir.
Deməli, İran həm də ölkə daxilində kütləvi ixtişaşlar törətməyi də planlayırmış. Erməniyə açıq dəstək, sərhəddə qoşun yığmaq, üstəlikdə belə əməl hansı qonşuluğa, müsəlmanlığa yaraşır?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, İran bizin 44 günlük müharibədəki qələbəmizi həzm edə bilmir: “Biz müstəqəllik qazanandan sonra, həmişə bizə badalaq vurub, özünə tabe etdirmək istəyib. Buna görə də, böyük pullar xərcləyərək, dini xurafatı yayır. Çalışır ki, burada da özü mahiyyətinə uyğun bir hakimiyyət yaratsın. Bizim DTX dəfələrlə əməliyyatlar keçirərək, İran agenturasını , onun məkirli niyyətlərini ifşa edib. 44 günlük müharibədən sonra İran daha da aktivləşib. Onlara bizim qələbəmiz sərf etmirdi. Çünki işğal altında olan ərazilərimizdə nə varsa, İran talayıb aparırdı. 30 illik işğal ərzində İran molla rejimi bir dəfə də olsun Ermənistana sərt etiraz etmədi. Bizim qələbəmizdən qorxuya düşən molla rejimi Azərbaycanda dini zəmində inqlab həyata keçirmək istəyir. Bu da təbii ki, alına bilməz. Çünki biz sivil və dünyəvi ölkəyik. Onlar əsasən dini fanatiklərdən istifadə edirlər. Təəssüf ki, bizim şeyximiz Allahşükür Paşazadə İran rejiminin iç üzünü gec tanıdı. Onların bizi ermənilərə satdığını bəyan etdi. Bizdə olan dindar kəsimin belə ayılması yaxşıdır. Onlar əvvələr cinayət yörətmiş adamları pulla ələ alırlar. Sonra onları xaricə və ya İrana aparıb, hərbi təlim keçirlər. Sonra onlardan ölkəmizdə istifadə etməyi planlayırlar. Bu koordinasiyanı həyata keçirənlər arasında hazırda beynəlxalq axtarışa verilən Azərbaycan vətəndaşları da az deyil. Məqsədləri burada dini dövlət qurmaqdır. Paşinyanı quçaqlayıb sinələrinə basmaqlarından, hansı məqsədləri güddükləri aydın görünür. DTX-nın bu əməliyyatı təqdirə layiqdir. Bu çətin faliyyətdə xüsusi xidmət orqanlarımıza uğurlar arzulayırıq. Əminliklə deyə bilərik ki, İranın bütün təxribatlarına layiqli cavab veriləcək”.
Məhəmmədəli QƏRİBLİ
