Rusiyanın Ermənistandakı fövqəladə və səlahiyyətli səfiri Sergey Kopırkin öz diplomatik səlahiyyətlərindən kənara çıxıb. Rusiya səfiri bəyan edib ki, Moskvanın qənaətinə görə, Dağlıq Qarabağın statusu məsələsini gələcək nəsillərə saxlamaq lazımdır.
Kopırkin deyib ki, Azərbaycan və Ermənsitan arasında müqavilə tənzimləmənin sülh müqaviləsinə hansı bəndlərin daxil edilməsinə dair hələlik yekdil fikir yoxdur: olmalıdır. “Bizim nəzərimizcə, Dağlıq Qarabağın statusu elə bir məsələdir ki, onu gələcək nəsillərə, bu məsələnin hamıya məqbul ədalətli həlli üçün şərait formalaşan vaxta saxlamaq lazımdır”.
“Doğrudanmı Əliyevi bəyanatda Qarabağın statusu məsələsinin olmasına inandırmaq olmazdı” sualına cavab olaraq səfir deyib ki, onda heç bir əlavə məlumat yoxdur və o yalnız ehtimal edə bilər.
Bununla belə Koprkin Soçidə keçirilən üçtərəfli görüşü "vacib" adlandırıb. Bununla belə, səfir razılaşdırılmayan məsələlərə eyham vurub: “Sülh müqaviləsi və ora daxil edilməli olan müddəalara gəlincə, Soçi görüşün nəticələrinə əsasən, hələ razılaşdırıla bilməyən, lakin işin davam etdiriləcəyi məsələlər var”.
Görünən odur ki, bununla bir növ səfir Rusiya dövlətinin Qarabağ bağlı əsil siyasətini faş etdi. Məlum olur ki, statusla bağlı məkrli oyun gedir Moskva bunu gündəlikdən birdəfəlik çıxarmaq istəmir.
“Münaqişə başa çatıb və kimlərinsə nə deməyindən asılı olmayaraq İlham Əliyev öz qətiyyətli fikrini vurğulayıb”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyev hesab edir ki, Kopırkinin fikirlərinə ciddi yanaşmaq olmaz: “Prezident İlham Əliyev Soçidə Rusiyanın dövlət başçısı Vladimir Putinlə görüşərkən sözügedən mövzu ilə bağlı kifayət qədər açıq və aydın şəkildə öz fikirlərini çatdırıb. Artıq Qarabağ münaqişəsi iki ildir başa çatıb və bundan sonra hər hansı münaqişə, yaxud status barədə danışmaq əhəmiyyətsizdir. Münaqişə başa çatıb və kimlərinsə nə deməyindən asılı olmayaraq İlham Əliyev öz qətiyyətli fikrini vurğulayıb. Əgər hər hansı bir ölkənin diplomatik nümayəndəsi, səfiri, yaxud digər aşağı ranqlı şəxsi belə bir açıqlama ilə çıxış edirsə onların sözlərini rəsmi olaraq qəbul etmək doğru deyil. Çünki yalnız Azərbaycan Prezidenti deyil, eləcə də Rusiya Federasiyasının dövlət başçısı da görüşlərdən sonra mətbuat konfransı keçirərkən etiraf etdi ki, münaqişə başa çatıb və indi münaqişədən sonra qəbul olunmuş üçtərəfli razılaşmada qeyd edilən bəndlərin icra olunması gündəmdə saxlanılmalıdır. Görünür, Kopırkin səfir olmasına baxmayaraq ölkəsinin rəhbəri Putinin həmin bəyanatından xəbərsizdir. Bu da onun öz problemidir ki, status məsələsini qabardıb, eləcə də onun gələcək nəsillərə saxlanılması kimi əhəmiyyətsiz bir ideya irəli sürüb. Düşünürəm ki, bənzər açıqlamalara, rəylərə ciddi bəyanat donunu geyindirmək yersizdir. Prezident İlham Əliyev Soçidə növbəti dəfə öz qətiyyətini nümayiş etdirdi. Üstəlik Ermənistanın baş naziri Nikol Paşinyanın status da daxil bir neçə tələblərinin görüşdən sonra birgə qəbul edilmiş sənəddə yer almasına imkan vermədi”.
Politoloq hesab edir ki, Rusiya son məlum proseslərdə regiondakı mövqelərinin zəifləməsindən ehtiyat edərək bir sıra məqamlarda öz yerini və rolunu saxlamağa çalışır: “Bu baxımdan, düşünürəm ki, istər Rusiyada fəaliyyət göstərən bəzi TV-lərin, habelə politoloqlarının, istərsə də Kopırkin tipli dipmissiya nümayəndələrinin nə demələrindən asılı olmayaraq proses davam edir. Onu da unutmamalıyıq ki, Prezident İlham Əliyev Brüssel və Parqa görüşlərində Ermənistanın doğru seçim etməsi üçün ilin sonuna qədər vaxtı olduğunu vurğulayıb. Soçi görüşü də bunun üçün qarşı tərəfə bir xatırlatma mesajı oldu”.
Bir sözlə, politoloq narahatçılığa elə bir əsas olmadığı qənaətindədir.
Vidadi ORDAHALLI
