“Bu gün Mücahidlər Müzeyini ziyarət edərkən belə bir məlumat verildi ki, Fransa işğalı zamanı fransızlar torpağa 5 milyondan çox mina basdırıblar”. Bu fikirləri Prezident İlham Əliyev noyabrın 1-də Ərəb Dövlətləri Liqasının Əlcəzairdə keçirilən 31-ci Zirvə toplantısında çıxışında bildirib.
“Bu, mənə eyni bizim üzləşdiyimiz, hazırda əziyyət çəkdiyimiz mənzərəni xatırladır. Ermənilər bir milyondan çox minanı işğal dövründə torpağa basdırmışdı. Və müharibə bitdikdən sonra 260-dan çox Azərbaycan vətəndaşı müxtəlif bədən xəsarətləri alıb”, - deyə Azərbaycan Prezidenti qeyd edib.
“Cənab Prezident tərəfindən Fransanın və Ermənistanın bənzər olan terrorçu siyasətlərinin ifşa edilməsi diqqət çəkən məqamdır”
Azərbaycan Prezidentinin bənzətməsinin tamamilə yerində olduğunu deyən AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Fransanın Əlcəzair xalqına və digər xalqlara qarşı törətdiyi soyqırım cinayətlərinin, mina terrorunun eynisini Ermənistan, ermənilər Azərbaycan xalqına qarşı törədib. Q.Hacıyev vurğuladı ki, Fransa Əlcəzair xalqına qarşı bir əsrə yaxın zülm edib və sözün həqiqi mənasında onlara qarşı soyqırım törədib, fransızlar bununla kifayətlənməyiblər və bu ölkənin torpağında mina “əkiblər”. “Azərbaycan Prezidenti müxtəlif xarici ölkələrə səfərləri zamanı Ermənistanın təxtibatları, mina terroru, bu ölkənin sülh danışıqlarından qaçması kimi məsələlərlə bağlı mütamadi olaraq məlumat verir, çox mətləblərə aydınlıq gətirir. Ermənistanın törətdiyi və bu gün də davam etdirdiyi terror aktlarının, mina cinayətlərinin dayandırılması barədə çağırışlar edən Azərbaycan Prezidentinin səsinə ayrı-ayrı dövlətlər səs verməlidir. Ermənistanın cinayətini görməyi bacaran ölkələr buna öz siyasətlərinə uyğun cavab verməyə çalışırlar. Azərbaycan Prezidenti bütün mötəbər tribunalardan Azərbaycanın məqsəd və məramını, sülh istəyini bəyan edir. Ərəb Dövlətləri Liqasının Əlcəzairdə keçirilən 31-ci Zirvə toplantısında Prezident Əliyevin çıxışı böyük maraq doğurdu. Prezident burada da Ermənistanın mina terrorundan danışdı, bildirdi ki, ermənilər bizim ərazimizə 1 milyondan artıq mina basdırıb və biz ondan əziyyət çəkirik. Ermənistanın cinayətlərinin Ərəb dünyasından səsləndirilməsi çox təqdirəlayiqdir. Bundan Ermənistanla can bir qəlbdə olan bəzi ərəb ölkələri nəticə çıxarmalıdır ki, necə bir terrorçu, işğalçı, vandal bir dövlətlə dostluq etmişik, indi əlaqəni kəsməliyik. Bu məsələnin bir tərəfi, digər tərəfdən Prezidentin fransızların əlcəzair xalqının başına gətirdiyi oyunların, soyqırım aktlarının eynisini ermənilərin də Azərbaycan xalqının başına gətirdiyini bəyan etməsi çox mətləbləri açdı. Ermənilər azərbaycan xalqına qarşı həyata keçirdiyi terror aktlarının “ilhamvericisi” məhz Fransa olub. Faktiki olaraq, “böyük bacısı” Fransa nə tökübsə Ermənistan da onu dənləyib. Fransa öz “kiçik bacısına” mina terroru törətməyin dərsini keçib və Ermənistan da Azərbaycan torpaqlarında mina “əkib”... Ermənistan Fransanın Əlcəzair torpağında həyata keçirdiyi mina terrorunu Azərbaycan ərazilərində təkrarlayıb”.
Q.Hacıyev qeyd edir ki, dünyanın üç yerində böyük erməni icması var, onlardan ən böyüyü Fransada yerləşir və həmin icma da hər zaman terrora dəstək olub, terror qruplarına maliyə ayırıb. Q.Hacıyev qeyd etdi ki, Ermənistan Birinci Qarabağ Müharibəsində olduğu kimi, İkinci Qarabağ Müharibəsində də Fransadan da muzdlu terrorçu qruplar gətirib bizimlə döyüşdürüb. O, qeyd edir ki, o terrorçu qruplar da ermənilərlə bərabər Azərbaycan ərazilərində minalar basdırıblar. Vaxtilə erməni kilsəsinin Fransaya köçürülməsini həyata keçirən fransızlarla ermənilər bir-birilərinə dəstək olublar deyən Q.Hacıyev hesab edir ki, Əlcəzair hökuməti fransız işğalçılarının sırasında ermənilərin yer alıb almadığını araşdırmalıdır. “Çünki başqa böyük dövlətlər kimi Fransa da həmişə ermənilərdən bir alət kimi istifadə edirlər. Onlar ermənilərdən türk və islam dünyasına qarşı istifadə edirlər. Ümumiyyətlə, Fransa tarixən işğalçılığa meyil göstərən ölkələrdən biridir. İndi özünü “sivil, demokratik” adlandırmasına baxmayın, Fransa özü işğalçı və soyqırımlar törədən ölkədir. Onun siyasətində işğalçılıq həmişə öndə olub. Buna kifayət qədər sübutlar var. Əlcəzair xalqına, afrikalılara, ərəb xalqlarına fransızlar qədər divan tutan ikinci bir xalq olmayıb. Həqiqətən də dünyanın ən böyük soyqırım aktını Fransa Əlcəzair xalqına qarşı tətbiq edib. Bu barədə kitablar yazılıb, filmlər çəkilib. Əlcəzair xalqını ucdan tutma qırıblar və əraziləri boşaltmağa çalışblar, özləri oranı tərk edəndə isə ərazirlərə milyonlarla mina döşəyiblər. Fransanın döşətdirdiyi minalar saysız əlcəzairlinin həyatına son qoyub. Ortada olan rəqəmlər də bizə çox informasiyalar verir. Ermənistan mina terroru dərsini öz “böyük bacısı” Fransadan öyrənib və Azərbaycan torpaqlarına mina “səpib”” - deyə Q.Hacıyev qeyd etdi.
Q.Hacıyev vurğuladı ki, Əlcəzairdə Fransa terrorunun acı nəticələri bu gün də özünü ifadə edir, bu ağrılar muzeylərdə, abidələrdə əks olunub: “Azərbaycan Prezidenti də Mücahidlər Müzeyini ziyarət edərkən bu mənzərəni görüb və onun Ermənistanın Azərbaycana qarşı törətdiyi cinayətlərin eynisi olduğunu bəyan edib. Əlbəttə, cənab Prezident tərəfindən Fransanın və Ermənistanın bənzər olan terrorçu siyasətlərinin ifşa edilməsi diqqət çəkən məqamdır. Göründüyü kimi, Fransa və Ermənistanın siyasəti terror və işğalçılıq üzərində qurulub”.
İradə SARIYEVA
