Ermənistanın baş naziri Nikol Paşinyan Rusiya Prezidenti Vladimir Putinlə Soçidə keçirdiyi görüşdə deyib ki, Ermənistan ərazisindən keçən kommunikasiyalar rəsmi İrəvanın nəzarətində olmalıdır. Paşinyan Putinə bildirib ki, delimitasiya işləri üçün sərhəddə təhlükəsizlik təmin edilməlidir.
Ermənistan Baş naziri qeyd edib ki, Ermənistan və Azərbaycan arasında münasibətlərin qurulması, eləcə də Qarabağ məsələsi ilə bağlı Rusiyanın təklif etdiyi layihə İrəvan üçün məqbuldur:
"Ermənistan ərazisindən keçən kommunikasiyalar isə Ermənistanın nəzarətində olmalıdır".
Göründüyü kimi, Paşinyan Rusiyanın variantlnı məqbul sayır, həm də deyir ki, kommunikasiyalar bizim nəzarətdə olmalıdır. Məntiqlə yanaşsaq, onda belə çıxır ki, Rusiya da dəhliz yox, yol variantına razıdır?
Politoloq Elşən Mustafayev “Bakı-Xəbər”ə açıqlamasında bildirdi ki, 10 noyabr bəyanatından sonra Paşinyan bu mövzuda açıq manipulyasiyalar adır: “Ən əsası da söz oynatmaqla məşğuldur. Gah deyir ki, Bəyanatda dəhliz sözü yalnız Laçına şamildi, digər kommunikasiyalara yox. Bu necə məntiqdir. Həmin yolla Ermənistanın bir hissəsindən digər hissəsinə keçib gedilmir, Ermənistandan Azərbaycanın ermənilər yaşayan şəhər və kəndlərinə gedilir. Zəngəzur dəhlizi isə məhz Azərbaycanın bir hissəsindən digər hissəsinə keçib getmək üçündür. Onun dəhliz statusu üçtərəfli bəyanata öz əksini tapıb. Rusiya buna qarşı olsaydı həmin bəyanata imza atmazdı.
Xatırladaq ki, 2021-ci il yanvarın 11-də Rusiya, Ermənistan və Azərbaycan liderlərinin Moskvada keçirilən görüşü zamanı regional kommunikasiyaların açılması barədə razılıq əldə olunub. Bu məqsədlə tərəflər üç ölkənin baş nazirinin müavinləri səviyyəsində regionda nəqliyyat və iqtisadi əlaqələrin qurulmasına diqqət yetirəcək işçi qrupunun yaradılması barədə qərar qəbul ediblər. Ancaq nədənsə Ermənistan bundan boyun qaçırır. Paşinyan deyir ki, Ermənistan öz ərazisində heç kimə dəhliz yaratmaq fikrində deyil, lakin bütün qonşuları, o cümlədən Azərbaycan üçün kommunikasiyalar açmağa hazırdır. Bunun adı cığallıqdır. İndi də öz əməllərinə Rusiyanı şərik etmək istəyir”.
Ekspertin sözlərinə görə, dəhliz olsa, bu xəttin təhlükəsizliyinə Rusiya, yol olsa isə Ermənistan sərhədçiləri nəzarət edə bilər : “Görünən odur ki, Paşinyan hökuməti “dəhliz” məsələsində güzəştə getmək istəmir. Ancaq Rusiya Zəngəzur dəhlizini istəyir. Əgər, Zəngəzur dəhlizi həyata keçərsə, Rusiya bu koridora nəzarət imkanı qazanır.
Putinin elə əsas hədəfi də budur. Sadəcə, Paşinyan da istəyir ki, sabah Rusiyanın təzyiqi nəticəsində Zəngəzur dəhlizi açılarsa, bu, onun iqtidarına problem yaratmasın.Yəni, Paşinyan öz iqtidarına şərt kimi qarantiya almaq istəyir. Bu mövzunu alver predmetinə çevirib. Bu baxından Paşinyanın Rusiyanın adından danışmasına yalandan başqa ad verə bilmərik”.
Məhəmmədəli QƏRİBLİ
