Ermənistanın Baş naziri Nikol Paşinyan oktyabrın 29-da demişdi ki, Qarabağdakı süıhməramlıların mandatını 20 ilədək uzadılması haqda sənədi Soçidə imzalamağa hazırdır. Soçi görüşü zamanı Putin bu məsələni şərh edib.
O, deyib ki, Rusiya sülhməramlı kontingenti Qarabağda missiyasını layiqincə yerinə yetirir: “Bu, bizim 2020-ci ilin noyabrında birgə bəyanatımızda əks olunub. Əlavə ediləsi bir şey yoxdur. Bu haqda danışdıq. Ancaq bundan ötrü birgə razılaşma lazımdır”.
Onun sözlərinə görə, rusiyalı sülhməramlıların mandatını uzatmaqla bağlı qərar digər məsələlərdən – sülh sazişinin imzalanmasından, sərhədlərin delimitasiyasından asılıdır:
“Bu məsələlər həll olunsa, onda sülhməramlılar məsələsi də başqa cür qoyulacaq. Ancaq həllini tapmasa, yaxud müəyyən həcmdə həll edilsə, sülhməramlı kontingentimizin taleyi də bundan asılı olacaq”.
Oktyabrın 31-də qəbul olunmuş bəyanatda Rusiya sülhməramlılarının regionda təhlükəsizliyə töhfəsi qeyd edilib, vəziyyətin sabitləşdirilməsi istiqamətində səylərinin aktuallığı vurğulanıb.
Putin sülhməramlı kontingentin öz missiyasını vicdanla yerinə yetirdiyini deməklə, həmin kontingentin fəaliyyətinı nə dərəcədə obyektiv yanaşmış olur?
Daşdəmir Əliyev: “Təəssüf ki, biz bunu görmürük”
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, bu gün Qarabağdakı rus sülhməramlılarının üzərinə düşən missiyanı layiqincə yerinə yetirdiyini deyə bilmərik: “Bu necə fəaliyyətdir ki, separatçıların tör-töküntüləri yenidən pozuculuq fəaliyyəti ilə məşğuldurlar. Orada Azərbaycana itətsizliklə bağlı mitinq keçirirlər. O zaman sual olunur: bəs sülhməramlılar nə işlə məşğuldur?
Digər tərəfdən, Rusiya Müdafiə nazirliyi dəfələrlə öz rəsmi saytında Şərqi Zəngəzur və Qarabağ inzibati ərazisini Dağlıq Qarabağ kimi təqdim edir. Düzdür, Azərbaycanın Müdafiə Nazirliyi buna etiraz edək yanlışlığa yolverilməzliyi qarşı tərəfin diqqətinə çatdırıb. Görünən budur ki, Rusiya sülhməramlılarının əsas məqsədi bölgədə sülhə deyil, konkret geopolitik məqsədlərə xidmət edir. Onlar yaranmış durumlardan öz geosiyasi məqsədlərini güdürlər. Bir çox hallarda isə sülhməramlı qüvvələr münaqişə bölgəsində vəziyyətin dramatikləşməsinə xidmət edirlər. Belə olmasaydı sülhmıramlıların birinci işi erməni silahlılarını hımin ərazidən tırkislah edib, çıxarmaq olardı. Təəssüf ki, biz bunu görmürük. Dəfələrlə olub ki, nızarət etdikləri məntəqədən Azərbaycanın məlumatı və icazəsi olmada istədikləri adamı Ermənistandan Qarabağa buraxıblar”.
Ekspertin sözlərinə görə, sülhməramlı missiyanın vəzifə və funksiyaları beynəlxalq qanunvericiliklə və birgə üçtərəfli bəyanatla tənzimlənir: “Yəqin Rusiya sülhməramlıları da bundan xəbərsiz deyillər. Buna görə də onlar fəliyyətini öz öhdəliklərinə uyğun qurmalıdırlar. Qarabağda baş verən və gələcəkdə baş verəcək təxribatlara görə Rusiya sülhməramlıları da məsuliyyət daşıyırlar. Belə ki, onların erməni yaraqlılarının qanunsuz fəaliyyətinə, təxribatlarına göz yumması, üzərlərinə düşən missiyanı layiqincə yerinə yetirə bilməmələri erməniləri yeni təxribatlara əl atmasına sövq edir. Bununla yanaşı, tərəflər arasında yenidən gərginliyin yaranmasına, silahlı qarşıdurmaların baş verməsinə səbəb ola bilər.
Buna görə də, sülhmıramlıların öz missiyalarını tam vicdanla həyata keçirməsinə dair qənaət yalnız Putinə məxsus ola bilər”.
Məhəmmədəli QƏRİBLİ
