Azərbaycan Prezidenti İlham Əliyevin, Rusiya prezidenti Vladimir Putinin və Ermənistanın Baş naziri Nikol Paşinyanın iştirakı ilə Soçidə keçirilən üçtərəfli görüşdə bəzi maraqlı məqamlar yaşanıb.
Diqqət çəkən ştrixlərdən biri çətir məsələsi olub ki, bu da həm mediada, həm də sosial şəbəkələrdə geniş müzakirə olunur. Bildiyimiz kimi, ikitərəfli görüşə gələndə Putinlə Paşinyan ikisi bir, həm də Putinin çətiri altında dayandılar, İlham Əliyev isə Putinlə görüşə gələndə hər kəs öz çətirləri altında idi.
Bu hadisə daha çox simvolik mənaları və bədən dili ilə ötürülən mesajları ilə diqqəti çəkdi. Bu məsələnin simvolik anlamı diqqət çəkib, müzakirə edilir. Maraqlıdır, hətta Azərbaycan Prezidentin çətirinin rəngi də başqa idi.
“Bu şəkilin simvolik mənası odur ki, Putinlə Əliyev bərabər tərəflər kimi dayandılar”
Siyasi şərhçi Azər Həsrət “Bakı-Xəbər”ə şərhində bildirdi ki, doğrudan da, bu ştrix özlüyündə böyük simvolik məna daşıyır. O, qeyd etdi ki, Paşinyan Putinin çətiri altinda idi, özü də Putinlə birgə dayanmışdı, Azərbaycan Prezidenti isə öz çətiri altında durmuşdu. A.Həsrət hesab edir ki, burada çox ciddi mətləblərdən söhbət gedir. “Çətir məsələsi elə ilk andan diqqətləri çəkdi. Xatırlayırsınızsa, Paşinyanla Putinin görüşü əvvəl oldu və görüşün ardınca da Paşinyanla Putinin məlum şəkili paylaşıldı. Təbiidir ki, mən də daxil olmaqla bir çoxlarımız bunu Putinin Paşinyan öz çətiri altında tutmaq cəhdi kimi qiymətləndirdi. Eyni zamanda da bunu Paşinyanın özünü Rusiyanın çətiri altında göstərmək cəhdi kimi dəyərləndirirəm. Ardından da Prezident İlham Əliyevlə Putinin çətirli şəkilləri paylaşıldı və əlbəttə ki, orada da simvolik məna var idi. Yəni hər kəs öz çətirinin altında idi. Azərbaycan Prezidenti öz şəxsi çətirini tutmuşdu, Putin də öz çətirini. Yəni bu şəkilin simvolik mənası odur ki, Putinlə Əliyev bərabər tərəflər kimi dayandılar. Paşinyanla Putinin çətir məsələsinin simvolik mənası belədir ki, böyük Rusiya Ermənistanı öz çətirinin altında tutur. İlham Əliyevlə Putinin çətir məsələsində isə hər ikisi bərabər tərəflər kimi hər kəs öz çətirinin altında idi. Üstəlik də, İlham Əliyevin çətirinin rəngi də fərqli idi. Əlbəttə ki, onun çətirinin rəngi türklüyün rəng simvolu olan tünd mavi rəngdə idi. Yəni bununla da İlham Əliyev bir növ demək istədi ki, bizim altında ola biləcəyimiz çətir türk birliyinin çətiridir. Bütün bunlarla yanaşı bir daha Paşinyanla İlham Əliyev arasında siyasi liderlik və siyasi bacarıqlar baxımından nə qədər fərqin olduğu ortaya çıxır”.
A.Həsrət qeyd etdi ki, Paşinyan o səfərə gedərkən yetərincə hazırlıqlı olmadığına görə başqasının çətirinin altına sığınmalı oldu. “Prezident Əliyev isə öz təcrübəsindən, uzaqgörənliyindən çıxış edərək şəxsi çətiri ilə o görüşə getdi. Prezident İlham Əliyev bu məsələdə də kifayət qədər uzaqgörən davrandı. Bilirsiz ki, bu cür mesajlar verilib, verilir və veriləcək də. Bu baxımdan, bir daha əmin olduq ki, Azərbaycan dövlətinin rəhbəri dövlətimizi, xalqımızı kiminsə, özəlliklə də bizim üzərimizdə ağalıq etmək istəyənlərin çətiri altına salmaq fikrində deyil. Əlbəttə ki, bu şəkil həmin görüşə damğa vuran şəkil idi və bu şəkillərin müqayisəsi geniş aparıldı, bu gün də aparılır. Yəqin ki, gələcəkdə də aparılacaq. Bu da ilk belə hadisə deyil. Ümumiyyətlə, tarixdə həmişə böyük liderlər öz davranışları, mimikaları, bədən dili ilə mesajlar verib”.
A.Həsrətin fikrincə, bu mənada Azərbaycan Prezidenti bu davranışı ilə əslində çox böyük mesaj verib və Azərbaycanın yalnız türk birliyinin çətiri altında dayana biləcəyinə işarə edib.
İradə SARIYEVA
