Qafqaz Müsəlmanları İdarəsinin sədri, Şeyxülislam Allahşükür Paşazadə müsahibəsində İranın son addımlarını kəskin tənqid edib.
Şeyx deyib ki, İran İslam Respublikasının bizim sərhədlərdə manevr etməsi yolverilməzdir: “Mən televizorda gördüm ki, hərbçilər hətta təyyarəyə oturanda bir din xadimi gəlib Qurani-Kərimlə xeyir-dua verir. Bu nəyə xeyir-dua verir? Hara göndərir? Azərbaycana? Müsəlman dövlətinin sərhədinə, ona əzələ göstərməyə göndərir. Bu heç də müsəlmana yaraşan hərəkət deyil. Mən bunu gözləmirdim. Bəs harada idi bunların səsi? Bir gecədə Xocalıda 600-dən çox insan qətlə yetirildi. Bunu ermənilər etmədilərmi? Niyə bir dəfə bu manevri Ermənistan sərhədində aparmadınız? Biz bunu 30 il gözlədik. Torpaqlarımız işğal olundu, məscidlərimiz yandırıldı”. Şeyx qeyd edib ki, İranda dostları, qardaşları, soydaşları var və bu dedikləri həqarət kimi qəbul edilməməlidir:
“Mən indiyədək elə bilmişəm ki, mənə bir şey olsa, qardaşlarım gəlib məni xilas edəcəklər. Amma bu gün mənim o ümidim qırıldı. Mən kimə inanım? Mənim qardaşım məni erməniyə satdı. Milyonlarla şiənin burada ümidi qırıldı”.
İran mahiyyət etibarı ilə teokratik bir ölkədir. Əsas məqsədi də İslam dininin şiə təriqətinin təbliği, bu dövlət modelini dünyaya ixrac etməkdir. Dünyada ən çox şiələrin yaşadığı ölkələrdən biri də Azərbaycandır. Artıq İranın addımları onların özündə belə böyük qıcıq yaradır. Bir vaxtlar din qardaşları kimi yanaşdıqları bir ölkənin rəhbərliyi ermənilərlə onlar arasındakı seçimdə məhz məscidlərə donuz bağlayanlara önəm verir. Gör vəziyyət nə yerə çatıb ki, artıq Şeyx belə onları sərt tənqid edir və İranın əməllərindən təəssüfləndiyini bildirir. İranın Azərbaycanda şiələrin dəstəyindən tam məhrum olmasının kökündə daha hansı amillər durur?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Qafqaz Müsəlmanları İdarəsinin sədri Allahşükür Paşazadənin verdiyi müsahibədə İranın dövlət rəhbərliyi ilə bağlı söylədiyi fikirlər təqdirəlayiqdir: “Bəlkə bir az gecikmişdi, amma hər halda hamının gözlədiyi mövqedir. Nəhayət ki, ölkənin dini icmasından da İrana təpki gəldi.
İran uzun illərdir Azərbaycanda təxribatla məşğuldur, özünün ağentura şəbəkəsini yaradır, özünə tərəfdar toplayır və zaman-zaman onlardan ölkəmizə qarşı istifadə edir. Sirr deyil ki, din pərdəsi altına girərək daha çox dini cameə arasında və onlar vasitəsilə müxtəlif bölgələrdə və təbəqələr arasında iş çevirməyə çalışırlar.
Bizim də həmişə tələbimiz ondan ibarət olub ki, məhz din çevrələrinə rəhbərlik edən adamlar ortaya mövqe qoymalı, İran adlı dövlətin rəhbərliyinin Azərbaycana qarşı apardığı düşmənçilik siyasətini pisləməli, müqəddəs dini məkanlarımızı dağıdan, murdarlayan Ermənistana hər cür dəstək verən bu zərərli fars molla rejimini ifşa etməlidir.
Nəhayət ki, Allahşükür Paşazadənin mövqeyinin şahidi olduq. Fikrimcə, bunun özü də İranın fars molla rejiminə əhəmiyyətli bir təpkidir və bu təpkinin ideoloji əsasları geniş surətdə məscidlərimizdə geniş surətdə izah olunmalıdır. Nəhayət, bizim dindarlar da bilməlidir ki, İslam, şiəlik deyəndə İran ağıla belə gəlməməlidir. Çünki adını İslamın keşikcisi qoyan bir ölkə belə addımlar atmamalıdır”.
Məhəmmədəli QƏRİBLİ
