Xankəndidə ermənilər geniş etiraz aksiyası keçirib. Azərbaycanın tərkib hissəsi olmaq istəmədiklərini bildirən ermənilər qondarma rejimin Qarabağın heç vaxt müstəqil Azərbaycanın bir hissəsi olmayacağını bildirən bəyanat qəbul ediblər.
Xankəndinin mərkəzi meydanına təyin olunmuş aksiyanı separatçıların qondarma "parlamenti" çağırıb. Bildirilir ki, aksiyanın məqsədi Qərbin Qarabağla bağlı təklif etdiyi "sülh variantı"na etiraz etmək, eyni zamanda Ermənistanın baş naziri Nikol Paşinyana 31 oktyabrda keçiriləcək üçtərəfli görüş öncəsi təzyiq göstərməkdir.
Separatçı rejim bəyan edib ki, Qarabağ erməniləri Qərbin deyil, Rusiyanın təklif etdiyi variantın qəbul olunmasını istəyir, yəni Qarabağ məsələsi həll olunmamış qalır və status məsələsinə baxılmalıdır.
Ermənilər bu təzyiq üsulu ilə nəyəsə nail ola bilərmi?
Demokratik Dəyişim Partiyasının (DDP) sədri Əli Mustafa “Bakı-Xəbər”ə açıqlamasında bildirdi ki, bu təklifin meydana çıxması bilavasitə Rusiyanın təsiri ilə bağlıdır: “Rusiya Qarabağ üzərindən 30 ildir oynadığı oyunları yenə davam etməkdədir. Bu ümumiyyətlə rus dövlətinin, rus dövlətçiliyinin əxlaqı ilə, tarixi missiyası ilə, bizə olan münasibəti ilə bağlı olan bir şeydir. Vaxtilə erməniləri ora köçürəndə orda olan azərbaycanlıları, türkləri hansı vəhşiliklə qırıbsa, bugünə qədər də həmin nifrəti, kini yaşadır. Çox təəssüf ki, hələ də rus imperiyasından qurtulmaq varkən, biz qurtula bilmirik. Mən düşünürəm ki, ən vacib məsələ Rusiyanın nüfuz dairəsindən çıxmaq və Rus vəhşiliyindən uzaqlaşmaqdır. Ermənilərin bu cəhdlərinə gəldikdə isə, burada əsas ilham verən Rusiyadır. Ancaq Qərbdən, Fransa, digər dövlətlərin də açıq və gizli dəstəkləri var. Hətta belə bir model ermənilərin projesi sayılır: Ermənistan Qərbə doğru gedir. Qarabağı verirlər Rusiyaya. Rusiya orada bir dövlət qurur. Rusiya da məhv olub gedəndən sonra Qarabağda müstəqil erməni dövləti yaranır. Bütün bu fitnə-fəsadın arxasında gizlənən oyun budur. Bu baxımdan müvəqqəti olaraq Ermənistanın Qərbə doğru getməsi və Qarabağı Rusiyanın kurasiyasına verməklə bir növ oyun oynayırlar. Guya Qarabağda olan ermənilər ayrı bir xalqdır, adı da arsaxdır. Bunlar hamısı ənənəvi, klassik erməni fitnə-fəsadı ilə rus vəhşiliyinin birləşməsi hesab olunur. Düşünürəm ki, bunların heç bir nəticəsi olmaz. Əlbəttə, Azərbaycan dövlətinin mövqeyindən də çox şey asılıdır. Qənaətim budur ki, birmənalı olaraq bu səyləri pisləməli və qarşı çıxmalıyıq. Əsasən də dünya birliyinə müraciət etməliyik. Qarabağ mənim ərazimdir. Burada olan separatçı ünsürlərin qarşısı alınmalıdır. Qarabağda ermənilərin özbaşınalığı Azərbaycanın suverenliyini pozur. Nəhayət, bu əhali ya Azərbaycan qanunlarına tabe olmalıdır, ya da çıxıb getməlidir. Onlar yerli xalq deyil, köçürülüblər. Köçmənlərin gəlib burada özbaşınalıq etməsi nə beynəlxalq hüquqa, nə də Azərbaycan qanunvericiliyinə uyğundur. Bu səylər heç bir nəticə verməyəcək. Əlbəttə, bizim israrımızdan və kəsərli mövqeyimizdən də çox şey asılıdır. Sülhməramlı ruslara da bildirmək lazımdır ki, ya bu fitnəkarlıqları aradan qaldır, ya da sən bu separatçılıqları dəstəkləyəcəksənsə, o zaman mənim ölkəmdə heç bir işin yoxdur. Biz erməniləri başa salarıq, öz qanunlarımıza hörmət etdirməyi bacararıq. Məncə, Azərbaycanın ciddi mövqeyindən çox şey asılıdır. O halda separatçılar da öz yerini biləcək. Ermənistan da artıq anlayıb. Bunu Qarabağda olanlara və onların nümayəndələrinə də anlatmaq lazımdır”.
Məhəmmədəli QƏRİBLİ
