“Vətəndaş müqaviləsi” partiyasının qurultayında Ermənistanın baş naziri Nikol Paşinyan KTMT-nin mövcud olmadığını bildirib.
O deyib ki, 2021-ci ilin yanvar razılaşmasının mühüm məqamlarından biri də Ermənistanın sərhədlərinin müttəfiqlərimiz üçün qırmızı xətt olması idi: “2021-ci il mayın 12-də azərbaycanlılar Sotk-Xoznavar hissəsində sərhədi pozanda biz beynəlxalq sənədlər əsasında qırmızı xəttin pozulduğunu və işə salınmalı olan mexanizmlərin olduğunu bildirdik. Bizə dedilər: bəli, amma sərhəd demarkasiya olunmayıb. Sərhədin haradan keçdiyini bilmədiyi barədə bəyanat bir şeyi ifadə edir - KTMT yoxdur. Çünki KTMT-nin üzv dövlətlərin sərhədləri daxilində qapalı olan məsuliyyət zonası var. Əgər dövlətlərdən birinin sərhədi yoxdursa, deməli, KTMT-nin məsuliyyət zonası yoxdur, yəni təşkilatın özü də yoxdur. Bizim mövqeyimiz belədir - sərhəd var. Ermənistanla Azərbaycan arasında Sovet İttifaqının inzibati sərhədi olan dövlət sərhədi var və o pozulub. Rusiya kimi ikitərəfli formatda öhdəlikləri olan KTMT də üzərinə düşən vəzifələri yerinə yetirməlidir”.
Görünən odur ki, Paşinyan getdikcə KTMT ilə bağlı daha da aqressivləşir. Düzdür, Ermənistanın hazırkı rəhbərliyinin KTMT-yə mənfi münasibəti yeni deyil. Ancaq Paşinyan Rusiyadan uzaqlaşmaq üçün son aylar bundan daha çox şantaj məqsədilə istifadə edir.
“Bununla o, ölkədə hərbi təşkilata qarşı ictimai rəydə nifrəti artırır”
Məsələyə münasibət bildirən hərbi ekspert Ramil Məmmədlinin fikrincə, Paşinyanın qurultayda KTMT ilə bağlı aşağılayıcı fikirləri hərbi təşkilatın son toplantısı ilə bağlıdır: “Məsələ ondadır ki, KTMT-nin sonuncu videoformat şəklində keçirilən iclasında Paşinyanın istəkləri fiaskoya uğradı. Paşinyan Azərbaycanı “təcavüzdə” ittiham edərək KTMT-nin müvafiq addımlar atmasını istədi. Ancaq qurumda təmsil olunanlar onu dəstəkləmədilər. Xüsusən də Belarus prezidenti Aleksandır Lukaşenkonun sərgilədiyi sərt mövqe Paşinyana vurulan sillə idi. Belarus prezidenti açıq bəyan etdi ki, bütün məsələləri Prezident İlham Əliyevlə həll etmək lazımdır. Hətta onu da dedi ki, bu gün qərar verməsəniz, daha pis olacaq. O cümlədən, iclasda iştirak edən Qazaxıstan prezidenti Tokayev də oxşar mövqe sərgilədi. Bildirdi ki, sərhədlə bağlı məsələlər sülh yolu ilə həll olunmalıdır. Məhz bütün bunlar fiaskoya uğradığına görə Paşinyan KTMT-yə daha da qəzzəblidir. Bununla o, həm də ölkədə KTMT və Rusiyaya qarşı ictimai rəydə nifrəti artırır. Guya KTMT məqsədyönlü şəkildə Azərbaycanın “təcavüzünü” önləmir. Paşinyan yaxşı bilir ki, KTMT-də təmsil olunan ölkələr Azərbaycanla çox yaxın münasibətlərə malikdir. Sadəcə, o, sərhəd məsələlərini şişirdərək bundan KTMT və Rusiyaya qarşı istifadə etməyə çalışır”.
Bir sözlə, hərbi ekspert hesab edir ki, Paşinyan nə qədər cəhd etsə də KTMT dövlətlərini Azərbaycana qarşı qaldıra bilməyəcək.
Vidadi ORDAHALLI
