Qarabağda mövcud olan separatçılar bütün vasitələrdən istifadə etməklə, müəyyən cəfəngiyyatlar irəli sürməklə özlərinə təsəlli tapırlar desək, yəqin ki, yanılmarıq. Faktiki olaraq, onların adları heç “it dəftərində” də yoxdur, amma cəhdlər edirlər ki, nələrsə etsinlər.
Son günlər separatçılar yenidən özlərini aktivləşən kimi göstərirlər... Qarabağ separatçısı, “Azad vətən” fraksiyasının rəhbəri Artur Arutyunyan sərsəm açıqlama verib: “Biz Rusiya Federasiyasının təqdim etdiyi təklifləri məqbul hesab edirik.
Qarabağ öz milli kimliyini qorumaq və yaşamaq üçün əsrlər boyu mübarizə aparıb. Və bu müddət ərzində onun həm uğurları, həm də təəssüf ki, uğursuzluqları olub. Bu gün də problemlərlə üzləşirik.
Qarabağ xalqı daim öz ədalətli tələblərini beynəlxalq ictimaiyyətə çatdırmağa çalışırdı (?). Lakin təəssüf ki, müxtəlif subyektiv səbəblərdən bu, onlar tərəfindən eşidilmir...”
Bu separatçı sözün həqiqi mənasında sayıqlayıb və onlara dəxli olmayan məsələlərdən bəhs edib. Özlərini elə təqdim edirlər ki, guya bu prosesin bir parçasıdırlar. Ermənistanla Azərbaycan arasında sülh danışıqlarının getdiyi bir vaxtda separatçılar da başlarını başlara qoşmağa cəhd edirlər. Guya bunların rəyi kiməsə lazımdir. Hər şey aydin olduğu halda bunlar niyə yenə özlərini tərəf kimi göstərməyə çalışırlar? Nəyə ümid edirlər ki?
“...Bu ümidlərinin də puça çıxacağını yaxşı bilirlər”
Siyasi ekspert Rövşən Rəsulov qeyd etdi ki, bu cəhdlər də separatçıların son çırpıntılarıdır, onlar bilərəkdən özləri özlərini aldadırlar. “Qarabağdakı separatçılar və onların “sözçüləri” artıq son ümidlərini işə salıblar. Halbuki, bu ümidlərinin də puça çıxacağını yaxşı bilirlər, amma əllərinə düşən bütün imkanlardan istifadə edib Rusiyaya sırınırlar. Onlar yeganə çıxış yollarının Rusiya olduğunu anlayırlar. Burada bir məsələ var, Rusiya Qarabağdakı separatçıların çağırışlarına, daha dəqiq desək, sərsəmləmələrinə müsbət cavab verəcək, yoxsa verməyəcək? Əslində, separatçılar əllərini Ermənistandan da üzüblər. Çünki Ermənistan hakimiyyəti bilir ki, yenidən separatçılarla hər hansı bir bağlarını davam etdirsələr, bu, Azərbaycanın suveren ərazilərinə müdaxilə kimi qiymətləndiriləcək və Azərbaycan ordusu hər dəqiqə bu cür təxribatların qarşısını almaq üçün addım atacaq, antiterror əməliyyatları keçirəcək”.
R.Rəsulovun sözlərinə görə, bununla belə, biz Ermənistanın Qarabağ separatçılarından tamamilə əl çəkdiyini də deyə bilmərik. O qeyd etdi ki, artıq Ermənistan parlamentində də istər hakimiyyət, istərsə də müxalifət təmsilçiləri tərəfindən müəyyən fikirlər səslənir. “Ermənistanda hələ də revanşist hisslər qalmaqdadır. Xüsusilə Nikol Paşinyanın Qarabağdakı Rusiya sülhməramlılarının orada qalma müddətinin artırılmasına “razılıq verəcəyi” barədə fikirləri də müəyyən suallar doğurur. Yəni Ermənistanın Baş nazirinin Azərbaycanın ərazilərində kimin harda necə hərəkət etməsi haqda fikir bildirməsi, hətta “razılıq verəcəyi” barədə bəyanat səsləndirməsi heç bir çərçivəyə sığmır. Şübhəsiz, onun cavabı da veriləcək. O sadəcə, boğazadan yuxarı danışır. Yaxşı bilir ki, Qarabağla bağlı onun hər hansı bir fikir ifadə etməsi qəbuledilməzdir. Qaldı ki, separatçıların Rusiyanın ətəyindən yapışmaq cəhdlərinə, bu da əslində bütövlükdə ermənilərə beynəxalq ictimaiyyət tərəfindən göstərilən müxtəlif yanaşmalarda çaşqınlıq yaradır. Ermənistan hakimiyyəti Qərbin əlindədir, Qərbin oyuncağıdır, Qarabağdakı separatçılar isə Rusiyanın ətəyindən yapışırlar. Bu bir daha sübut edir ki, erməni adlanan toplum yalnız çıxılmaz vəziyyətdə deyil, həm də çox etibarsızdır, onlara bel bağlamaq olmaz. Bu gün əgər Qərb separatçılara öz dəstəyini ifadə etsə, onlar Rusiyadan üz döndərib onlara tərəf qaçacaq. Eyni zamanda da Rusiya özü əlini onların üstündən çəkərsə Qərb Qarabağa müəyyən müdaxilələr etməyə cəhd göstərəcək və bu da Rusiyaya sərf etmədiyi üçün Rusiya məcbur olub Qarabağda öz mövcudluğunu sübut etməyə çalışacaq. Bu baxımdan, nəinki separatçıların, bütövlükdə ermənilərin siyasi qəlizlikləri onların öz başlarına müxtəlif oyunlar gətirə bilər. Bu müxtəlif oyunlardan biri də budur ki, rəsmi Bakının səbri tükənir. Qarşıda cəmi iki ay var. İlin sonuna qədər vaxt verilib ki, sülh müqaviləsi imzalansın və Ermənistan Qarabağı Azərbaycanın suveremn ərazisi kimi tanısın. Əgər bu baş verməsə, nəyin baş verəcəyini indidən təsəvvür edə bilərik. Bu, Azərbaycan ərazilərinin tam olaraq erməni separatçılarından, qanunsuz silahlılarından təmizlənməsi ilə nəticələnəcək, eyni zamanda qarşıda dayanan digər məqsədlər də reallaşdırılacaq”-deyə R.Rəsulov qeyd etdi.
İradə SARIYEVA
