Böyük Britaniya parlamentinin Lordlar palatasında Azərbaycan-Ermənistan məsələsinə dair debat keçirilib. Palatanın üzvü, parlamentin Ermənistan qrupunun həmsədri Baronessa Koks Azərbaycan əleyhinə yönəlmiş növbəti bir təşəbbüs göstərsə də, onun bu təşəbbüsü baş tutmayıb.
Sualı hökumət adından xarici işlər nazirinin müavini Lord Ahmad cavablandırıb. O, iki ölkə arasında sülhün əhəmiyyətinə toxunub, siyasi həllin lazım olduğunu deyib. Lord Ahmad Britaniya hökumətinin Avropa İttifaqının (Aİ) gördüyü işləri tam dəstəklədiyini qeyd edib. Debat zamanı, Baronessa Koks istisna olmaqla, Lordlar Palatasının digər üzvləri tərəfindən həm neytral xarakterli, həm də Azərbaycanı dəstəkləyən fikirlər səslənib.
Məsələn, Lord Hüseyn Ermənistan və Azərbaycan arasında son toqquşmaların bu iki ölkə arasında Aİ-nin rəhbərliyi altında sülh və normallaşma prosesinin sürətləndirilməsinə təcili ehtiyac yaratdığını qeyd edib, yekun sülh sazişinin imzalanmasının vacibliyinə diqqət çəkib. Lord David Evans isə mina partlayışları məsələsinə diqqət çəkib. O, son iki ildə partlayışların əksəriyyətinə minaların səbəb olduğunu deyib və bildirib ki, Azərbaycanda 262 mülki şəxs həlak olub. Lord David Evans onu da qeyd edib ki, itkin düşmüş kimi qeydiyyatda olan 3890 azərbaycanlı var və Ermənistan onlar haqqında hər hansı bir məlumat verməkdən imtina edir. Debat zamanı Baronessa Udin oktyabrın 6-da Praqada keçirilən son müzakirələri alqışladığını deyib, üçtərəfli atəşkəs sazişindən sonra Ermənistan tərəfinin itkin düşmüş azərbaycanlılarla bağlı məlumatları hələ də vermədiyini vurğulayıb.
Bütün bunlar həm də Böyük Britaniyanın Qarabağ məsələsində ədalətli mövqedən çıxış etməsinə işarədir. Belə olmasaydı, çox güman, Lordlar Palatasında Azərbaycan əleyhinə müzakirələrin şahidi olardıq. Beləliklə, uzun illərdir ermənilərin maraqlarından çıxış edən Baronessa Koksun budəfəki canfəşanlığı iflasa uğradı.
“Avropa dövlətlərinin maraqları tələb edəndə, erməni lobbisi bizim mənafeyimizə zidd qərarlar qəbul etdirə bilmir”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, bu, Böyük Britaniya ilə Azərbaycan arasında olan yaxın münasibətlərin göstəricisidir: “Azərbaycanla İngiltərə arasında həm siyasi, həm də iqtisadi sferada ciddi əməkdaşlıq var. Bu səbəbdən erməni lobbisinin planları iflasa uğrayır. Digər Avropa dövlətləri Britaniya qədər Azərbaycanla yaxından əməkdaşlıq etmədiyi üçün, bəzən ölkəmizin mənafeyinə toxunan qərarlar qəbul olunur. Əsas odur ki, Avropa dövlətlərinin maraqları tələb edəndə, erməni lobbisi bizim mənafeyimizə zidd qərarlar qəbul etdirə bilmir. Maraqlara uyğun olmadıqda, bunun əksini görürük. Azərbaycana bəzi Avropa dövlətlərinin fərqli münasibəti bununla bağlıdır. Yəni hansı dövlətlərin Azərbaycanla yaxın iqtisadi-siyasi əlaqələri var, orada bizə qarşı hansısa qətnamə qəbul edə bilmirlər. Sanki dünyada bir şərti bloklaşma var. Hansı dövlət Azərbaycandan umacağını ala bilmirsə, o zaman erməni lobbisinə meydan verir. Bir növ bundan təzyiq vasitəsi kimi istifadə edirlər. Bütün bunlar böyük siyasətin tərkib hissəsidir. Lord Baronessa Koks uzun illərdir erməni lobbisinin Böyük Britaniyada maraqlarını ifadə edir. Yaşı kifayət qədər çox olsa da, bu şəxsdə ədalət deyilən bir şey yoxdu. Bütün siyasi fəaliyyəti Azərbaycanı qaralamaqdan ibarətdir”.
Əli Mustafayev onu da əlavə etdi ki, Azərbaycan davamlı olaraq böyük dövlətlərlə işləməli və dövlət maraqlarımızı qorumalıyıq.
Vidadi ORDAHALLI
