İran qonşu dövlət olmasına baxmayaraq, mütəmadi olaraq Azərbaycana qarşı ən müxtəlif üsullardan istifadə etməklə təhdidlər yağdırır, dövlətimizə qarşı təxribatlar törədir. Bu günlərdə İran dövlət televiziyasında İsrail və Azərbaycanı təhdid edən video nümayiş etdirilib. Bu barədə "Arab News" məlumat yayıb.
Nəşrin məlumatına görə, videoda “İrana yanlış tərəfdən baxan hər kəs məhv edilməlidir” ifadələri yer alıb.
Video İslam İnqilabı Keşikçiləri Korpusunun Azərbaycanla sərhəddə keçirdiyi təlimlərindən bir neçə gün sonra nümayiş etdirilib.
“İsrail... öz yolundan çox da sapma, öz əlinlə öz qəbrini qazma... İran bunu bəyan edir ki, Azərbaycan bilsin və başa düşsün... İrana yanlış tərəfdən baxan hər kəs məhv edilməlidir” sözlərinin yer aldığı mahnı İranın "Səhər" telekanalında yayımlanıb.
CaucasusWarReport kəşfiyyat qrupu bildirib ki, “təhdid ilk dəfə İran hökumətinin “Səhər” kanalında açıq şəkildə və ziddiyyətli manerada ifadə edilib, belə ki, kanalın əsas auditoriyası İran azərbaycanlılarıdır. Bu barədə mediada qeyd edilib.
“Molla rejimi heç bir mənada Azərbaycanla bacaracaq gücdə deyil”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, İranın bu kimi təhdidlərinin artması təsadüfi deyil, çünki molla rejimi günü-gündən güclənən, nüfuzu artan müzəffər Azərbaycan dövlətini həzm edə bilmir. “Əlbəttə, İranın təhdidlərinin çoxlaması təsadüfi deyil. Buna əsas səbəb Azərbaycanın ən yüksək səviyyədə öz mövqeyini ortaya qoymasıdır. Daha dəqiq desək, İranın təhdidlərinə qarşı Azərbaycan öz mövqeyini göstərir və bu ölkənin sərhəddəki davranışlarına, Qafanda konsulluq açılmasına, eyni zamanda Təbrizdə Ermənistanın baş konsulluğunun açılacağı barədə bəyanata Azərbaycan ən üstün səviyyədə reakiya verib. Bu, dövlətimizin etirazına səbəb olub. Bilirik ki, İsrail də ABŞ-la əməkdaşlıq çərçivəsində İranla münasibətlərinə bir daha yenidən baxır, başqa sözlə, İsrailin baxışlarında da İrana yeni sanksiyaların tətbiq edilməsinin nəzərdən keçirilməsi burada ABŞ-İsrail birliyinin təzahürüdür. Həm Azərbaycan və Türkiyənin bölgədə güclənən mövqeyi, eyni zamanda İsrail-Türkiyə münasibətlərinin yeni bir dönəmə daxil olması İranı ciddi narahat edir. İran adlanan ölkə və onun dini, siyasi rəhbərliyi bütün anlamlarda sonun gəldiyini yaxşı anlayır. Çünki ölkə daxilində, demək olar ki, sabitlik pozulub. Artıq orada insanlar əvvəlki kimi yaşamaq istəmirlər. Ən əsas məsələ odur ki, burda ancaq milli zəmində deyil, həm də insan haqları məsələsində çox ciddi problemlər yaşanmaqdadır. Bütün bunların günahkarı molla rejimi özü olduğu halda günahkarı kənarda, gah Azərbaycanda, gah ABŞ-da, gah İsraildə, hətta Türkiyədə belə axtarır. Bütün bunların nəticəsi olaraq da molla rejimi müxtəlif təbliğat yönlərinə əl atır. Molla rejimi Azərbaycanı, İsraili, ABŞ-ı və Türkiyəni ittiham etməklə daxili auditoriyada özlərinə dəstək qazanmağa çalışır”.
F.Ələkbərli qeyd edir ki, burada yaşayan azərbaycanlılar da, digər xalqlar da molla rejimi ilə yollarının ayrılacağını bilirlər və daha tez şəkildə bundan xilas olmağa çalışırlar. O vurğuladı ki, insanlar molla rejimindən xilas olmaq üçün mübarizə aparır: “İranın müxtəlif üsullardan istifadə etməklə Azərbaycana və İsrailə qarşı təbliğatını gücləndirməsi, təhdid etməsi heç nəyi dəyişməyəcək. Yəni molla rejimi heç bir mənada Azərbaycanla bacaracaq gücdə deyil. Mən hələ İsraili, ABŞ-ı, Türkiyəni demirəm. Baxmayaraq ki, Azərbaycan həmin ölkələrlə müqayisədə bir qədər geridə görünə bilər, ancaq Azərbaycan da kifayət qədər Ermənistanla müharibədə öz gücünü ortaya qoydu. Azərbaycan dövlətinin də ən əsas gücü Güney Azərbaycandır, oradakı türklərdir. Baxın, bütün bunlar onu göstərir ki, İran adlanan ölkənin bu təhdid mesajı əslində özünə aiddir, özü məhv olur. İran rejimi özü məhvə doğru nə dərəcədə yaxınlaşdığını yaxşı anlayır. İsrailə və Azərbaycana ünvanlanmış “məhv edərik” mesajı İranın daxili auditoriyasında heç bir əhəmiyyət kəsb etmir. Bu baxımdan, bu kimi mesajlar da artıq öz əhəmiyyətini itirir. Çünki artıq İran adlanan ölkənin özünün sonu gəlib və artıq insanlar molla rejimi ilə yollarına davam etməyəcəklər. Çox yaxın zamanlarda yeni bir dönəm başlayacaq”-deyə F.Ələkbərli qeyd etdi.
İradə SARIYEVA
