Sülh sazişi ilə bağlı Ermənistandan növbəti ziddiyyətli mövqe. Ermənistan parlamentinin Müdafiə və təhlükəsizlik daimi komissiyasının sədri, hakim “Vətəndaş Müqaviləsi” partiyasından olan deputat Andranik Köçəryan bəyan edib ki, sülh sazişində maraqlıdırlar, amma bunu delimitasiya və demarkasiya ilə eyni vaxtda həyata keçirmək mümkün deyil:
“Müvəqqəti məhdudiyyətlər Ermənistan-Azərbaycan sərhədinin delimitasiyası və demarkasiyası prosesinə maneəyə çevrilməməlidir. Danışıqlar masası üzərində işləyə biləcəyimiz bir sənədin olması vacibdir. Delimitasiya və demarkasiya məsələləri yuxarıdakı sənədlə kifayət qədər bağlıdır. Lakin onların eyni vaxtda həyata keçirilməsi üçün sadəcə şərait yoxdu”.
Halbuki, A.Köçəryandan bir gün əvvəl Ermənistan baş naziri Nikol Paşinyan deyib ki, ilin sonuna qədər delimitasiya işlərini bitirmək mümkündür.
Görünən odur ki, sərhədlər barədə Paşinyan bir söz, hakim partiyanı təmsil edən deputatı başqa şey deyir. Bu, Ermənistan hakimiyyətində mövcud olan ziddiyətlərdir, yoxsa erməni hiyləgərliyinə xas olaraq danışılmış oyundur?
“ABŞ və Fransanın əsas məqsədi regionda gərginliyi saxlamaqla Qarabağ münaqişəsinin çözülməsində vasitəçi...”
Sözügedən məsələyə aydınlıq gətirən Azərbaycan Kommunist Partiyası MK-nın sədri Rauf Qurbanov buna bir neçə aspektdən yanaşdı: “44 günlük Vətən müharibəsinin yekununda 10 noyabr 2020-ci ildə Azərbaycan, Ermənistan və Rusiya Federasiyası dövət başçıları arasında müharibənin qaynar fazasının dayandırılması ilə əlaqədar razılaşma əldə olundu. Əldə olunmuş razılaşma və imzalanmış sənəd məntiqə görə düşünməyə əsas verir ki, keçən dövr ərzində Qarabağ problemi 30 ildən sonra öz həllini tapmalı, tərəflər sülh sazişini imzalamaqla regionun inkişafı üçün yeni mərhələyə keçməli idilər. Lakin çox təəssüflər olsun ki, Ermənistan tərəfinin məsələyə qeyri-ciddi yanaşması, bir dövlət olaraq razılaşdığı və imza atdığı sənədə hörmət etməməsi məsələnin həllini yubadır. Qarabağ münaqişəsinin nizama salınması istiqamətində yeni bir düyünün yaranmasına rəvac verməklə, regionda nəhəng dövlətləri bir-birinə qarşı qoymaq üçün müxtəlif təxribatlara əl atır. Bundan da aydın başa düşülür ki, Ermənistan Qərbdəki havadarlarının köməyi ilə Azərbaycanın 44 günlük haqq savaşında əldə etdiyi qələbəni, torpaqlarının işğaldan azad olunmasını həzm edə bilmir. O üzdən, müxtəlif bəhanələrlə sülh müqaviləsinin imzalanmasını təxirə salır. Ermənistanın bu mövqeyindən istifadə edən, əslində isə Ermənistanın bu cür davranmasını təlimatlandıran elə Qərb dövlətlərinin özləridir. Ermənistan burda sadəcə predmet kimi istifadə olunur. Qərb dövlətlərinin, xüsusilə də ABŞ və Fransanın əsas məqsədi regionda gərginliyi saxlamaqla Qarabağ münaqişəsinin çözülməsində vasitəçi olmuş Rusiyanı, Türküyəni məsələnin həllindən kənarlaşdırmaq və ümumiyyətlə, bu dövlətlərin beynəlxalq imicinə zərbə vuraraq onları Cənubu Qafqazdan çıxarmaqdır. Məlum olduğu kimi, Azərbaycan Prezidenti İlham Əliyevdən fərqli olaraq, Ermənistan Baş naziri Nikol Paşinyan iqtidarı müstəqil siyasət aparmır. Qərb institutlarının maliyyə dəstəyi ilə hakimiyyətə gəlmiş bu şəxs öz ağalarının tapşırıqlarını icra etməklə məşğuldur. Bu da öz xalqına qarşı xəyanət və erməni ictimaiyyətini Qərbin girovuna çevirməkdir. Azərbaycan və Ermənistan arasında sülh sazişinin imzalanması, delimitasiya və demarkasiya məsələlərinin həlli Ermənstanda hansısa səlahiyyət sahibinin nə deməsindən asılı deyil”.
Partiya sədri hesab edir ki, bu məsələnin istər dinc, istərsə də hərb yolu ilə çözülməsi Azərbaycan dövlət başçısının xarici siyasətində aparacağı uğurlu anlaşmalardan asılıdır.
Vidadi ORDAHALLI
