Vahid Ermənistan Partiyasının sədri Ervand Tarverdyan Rusiya Federasiyasının prezidenti Vladimir Vladimiroviç Putinə açıq məktub göndərib. Məktubda deyilir:
“Cənab Prezident!
Sizə və sizin şəxsinizdə öz gələcəyi üçün mübarizə aparan rus xalqına dərin hörmətimizi bildiririk.
Ermənistanda və bütövlükdə dünyada yaranmış gərgin vəziyyəti obyektiv qiymətləndirərək, vətənimiz qarşısında məsuliyyəti öz üzərimizə götürməyə hazır olduğumuz üçün birbaşa Sizə müraciət edirik.
30 ildən artıqdır ki, xalqlarımız MDB və Aİİ çərçivəsində müttəfiqlik, strateji və dostluq münasibətləri saxlayaraq müstəqil dövlətlərdə yaşayırlar.
Ermənistan Respublikasında və Cənubi Qafqazda geosiyasi gərginlik “qırılma nöqtəsinə” yaxınlaşır. İndi Naxçıvandan Ermənistanın cənub-qərb sərhədinə, radikal islamçıların və digər türk dəstələrinin hücumu planlaşdırılır. Bunun da qarşısını ancaq İran tərəfinin qüvvələri dəf edir. Hazırkı partlayıcı vəziyyət hər an yeni genişmiqyaslı müharibəyə səbəb ola bilər.
Ermənistan həm xaricdən ona qarşı təcavüz baxımından, həm də daxildən təzyiq altında olan “zəif halqa”ya çevrilib: “yumşaq güc” vasitəsilə Rusiyanın opponentləri erməni cəmiyyətinin şüurunu dəyişib.
Vəziyyəti düzəltmək mümkündür. Sizin Ermənistanın şərqindəki sərhəd ərazilərini ələ keçirmiş Azərbaycan qoşunlarının öz dislokasiya yerlərinə qaytarılmasına mötəbər müdaxiləniz vəziyyəti dıyişə bilər. Bununla Rusiya erməni cəmiyyətində tarixən haqlı olan mövqelərini bərpa edəcək. Biz əminik ki, sizin effektiv təsir imkanlarınız var.
Rusiya xalqına sülh, firavanlıq arzulayırıq”.
Göründüyü kimi, partiya sədri dolayı yolla İranın sərhədlərimizə qoşun yığmasına haqq qazandırmaq istəyir. Belə təəssürat yaratmaq istəyir ki, İran həqiqətən də Naxçıvandan Zəngəzur dəhlizi istiqamətində hücumun olacağına inandığı üçün belə addımlar atır. Bu fikirləri nə dərəcədə əsaslı saymaq olar?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistanda fəaliyyət göstərən bir partiyanın sədrinin bu məzmunda müraciəti təsadüf ola bilməz: “Burada bir neçə məqsəd güdülür. Əvvəla, İranın addımlarına haqq qazandırmağa çalışılır. Bəllidir ki, İran qoşunu Ermənistana hardansa hücum olacağına görə yığmır. Bununla Azərbaycana və bizi dəstəkləyən ölkələrə hədə gəlir. Bunun da kökündə duran ən başlıca amil Zəngəzur dəhlizidir. İran bu məsələni özünün “qırmızı xətti” elan edib. Görürlər ki, özlərinə tərəfdar tapa bilmirlər və Azərbaycan həmin dəhlizin açılmasında çox israrlıdır. İranı Ermənistanı dəstəkləyən Qərb də sevmir. Rusiya Zəngəzur dəhlizinin açılmasında çox maraqlıdır. Bu səbəbdən də, Rusiyanı bu məsələdən soyudub İranla birgə fəaliyyətə sövq etdirmək istəyirlər. Bunun üçün Türkiyəni və radikal islam amilini qabardırlar. Güya Türkiyə və Azərbaycan birgə səyləri ilə Naxçıvan vasitəsilə hücum edib Zəngəzur dəhlizini götürəcək. Bunların hamısı absurddu. İran hamıdan gözəl bilir ki, belə niyyət yoxdur. Naxçıvan Azərbaycanın suveren ərazisidir. Orada yalnız Azərbaycan ordusu var. Ümumqoşun Ordusu çox böyük potensiala malikdir. Belə güclü ordu olan yerdə hansısa radikal islamçılaranı ehtiyac var? Absurd bir yanaşma olmaqla yanaşı, həm də, növbəti erməni məkirindən xəbər verir. Təbiidir ki, Rusiya prezidenti bu müraciətə ciddi yanaşmayacaq. Çünki hazırda Türkiyə ilə Rusiya arasında ciddi əməkdaşlıq var. Putin Ərdoğana böyük önəm verdiyini bəyan etdi. Belə xırda provakasiyalarla ermənilər Rusiyanın mövqeyini dəyişə bilmırlər. İran sərhəddə nə qədər qoşun yığsa da, Azərbaycan öz haqq işini davan etdirəcək və Ermənistana öz öhdəliklərinə əməl etmək üçün lazımi təzyiqlərini göstərəcək”.
Məhəmmədəli QƏRİBLİ
