Fransa prezidenti Emmanuel Makronun Roma Papası Fransiskə hədiyyə etdiyi kitabın oğurluq olduğu iddia edilir. Bu barədə polşalı diplomat Robert Pszczel “Twitter”hesabında yazıb.
İddiaya görə, Makronun Papaya təqdim etdiyi “Əbədi sülhə doğru” (1796) kitabı II Dünya müharibəsi dövründə Lvovun işğalı zamanı nasistlər tərəfindən oğurlanmış nüsxə ola bilər.
Belə ki, kitabın birinci səhifəsində “Lvovda akademik qiraət zalı” möhürü əks olunub.
"Möhür yerində açıq-aydın yazılıb ki, Fransa prezidentinin Roma Papası Fransiskə bağışladığı kitab əvvəllər Lvovdakı Polşa Universitetinin (o zaman) kitabxanasının mülkiyyəti olub... Yumşaq desək, utancvericidir", - deyə polşalı diplomat qeyd edib.
Çox maraqlıdır ki, bütün dünyada gərgin müzakirə edilən bu mövzu ilə bağlı nə Fransa, nə də ki, Vatikan öz mövqeyini açıqlayıb. Makronun oğurluq kitab hədiyyəsi, özü də bunu dini liderə verməsinə ilahiyyatçıların münasibəti necədir?
İlahiyyatçı Tural İrfan “Bakı-Xəbər”ə açıqlamasında bildirdi ki, ümumiyyətlə dinlərdə (səmavi dinlərdən söhbət gedir - yəhudilik, müsəlmənlıq və xristianlıqda) oğurluq ən qatı cinayətlərdən biri hesab olunur: “Eyni zamanda, cinayət hesab olunmaqla yanaşı, ən böyük günah sayılır. Əvvəlki illərdə, Roma hakimiyyəti dövründə belə əmələ görə xristian dininin əsasında sərt cəzalar tədbiq olunurdu. Oğurluğun günahını ancaq ölüm hökmü ilə yumaq olardı. İndi Makronun da Roma Papasına hədiyyə etdiyi kitabın oğurluq olması haqqında ciddi mənbələrdən dəlil, sübutlar təqdim olunursa, bu sırf oğurluq hesab olunur. Çünki kitabda Lvov şəhərində kitabxanaya məxsus olması ilə bağlı möhürün olması artıq vəqf malı sayılır. Bu tək bir adamın kitabı yox, ümumi bir vəqfə aid imiş. Vəqf malını da oğurlamağın cinayəti daha ağırdır. Belə kitab insanların maddi vəsaitlərinin, vergilərinin hesabına dövlət kitabxalarında qorunur. Bu baxımdan xristian dini nəzərindən deyirəm ki, Roma Papası da onu qəbul edibsə, çox böyük yalnışlığa yol verib. Ən azından oğurluq olduğu sübut olunmasa belə, onun haqqında bu şübhələr varsa, artıq bu kitabın şübhəli olduğu məlumdur və təsdiq olunub. Bu cür işlərdə də əvvəldən dini liderlər, Roma Papası, Şeyxlüslam qəbul etdikləri hədiyyələrlə bağlı həmişə analiz aparmalıdırlar. Çünki belə məsələlər ortaya çıxa bilər. Ona görə də, Roma Papası bunu mütləq analiz etməli idi. Artıq məlum olubsa, mütləq bu əşya qaytarılmalı və yerinə qoyulmalıdır. Belə çıxır ki, Fransa prezidenti Roma Papasına layiq biləcəyi başqa bir hədiyyə tapmayıb, oğurluq kitab təqdim edib? Bəlkə də bu əməl onun üçün adi bir məsələdir. Mən belə düşünürəm ki, onun kimi insanların təfəkküründə oğurluq, günah yoxdur. Elə Makronun Ermənistan məsələsində Azərbaycana münasibətindən də biz bunu gördük. Ola bilsin, Makron Roma Papasının özünü də ləkələmək istəyir. Yəni elə insanlardan, elə siyasətçilərdən nə desən gözləmək olar. Hər bir halda, o kitab Roma Papası tərəfindən qaytarılmalıdır. Deyək ki, götürüldüyü yerə qoyulmasa da, onda qala bilməz. Din liderinin özünə də vacibdir ki, şübhəli hallardan qaçsın. Və Fransa prezidentinə bununla bağlı cavab verilməlidir ki, belə bir şübhəli kitabı nə məqsədlə gətirib Roma Papasına bağışlayıb? Hesab edirəm ki, bu çox yalnış addımdır və məqsədyönlüdür. Bunun daxilində böyük bir məqsəd var. Nasistlər dövründə oğurlandığı haqqında şübhələr olan bir kitabı gətirib Roma Papasına bağışlamaq təsadüf ola bilməz. Ola bilsin ki, Makron Vatikanda olan mənbələrin hamısının oğurluq olduğunu demək istəyir. Makron üçün kitabın oğurluq olub-olmaması dərin məna kəsb etmir. Çünki onlar bu cür nizamlarla yaşayan və dövlət idarə edən adamlardır”.
Məhəmmədəli QƏRİBLİ
