Rusiya mediasında Azərbaycana qarşı qaralama kampaniyası səngimək bilmir. İndi də heç bir əsas olmadan Azərbaycanı Ukraynaya hərbi yardım etməkdə ittiham edirlər.
Rusiya mediası yazır ki, məlumatlara görə, Azərbaycan Ukraynaya nəinki humanitar yardım, hətta silah yardımı da göstərir: “Avropa və Yaxın Şərqdəki hərbi mənbələrə inansaq, Bakı təkcə Kiyevə humanitar yardım vermir, həm də Rusiyanın Ukraynada xüsusi hərbi əməliyyatına başlamasından sonra silah verir. Azərbaycanlı muzdluların Ukrayna Silahlı Qüvvələri və millətçi batalyonlar tərəfində döyüş əməliyyatlarında iştirakı barədə də məlumatlar var. Hətta Azərbaycan mətbuatında Ukraynadakı münaqişə ilə bağlı nəşrlərə nəzər salmaq belə, Abşeron yarımadasından nə qədər təhrif edilmiş anti-Rusiya informasiya axınının gəldiyini anlamaq üçün kifayətdir. Etiraf etməliyik ki, onlar Kiyevə daha çox canfəşanlıqla rəğbət bəsləyirlər. Bakıda tanınmış Kiyev aviadaşıyıcıları tərəfindən rusofobik hücumlardan ötrü müəyyən nəzəriyyələr üçün platformanın yaradılması bunun əyani sübutudur”.
Göründüyü kimi, Rusiya mediası Azərbaycanı ağılagəlməz məsələlərdə ittiham edir. Silah yardımından tutmuş, muzdlu döyüşçülərə qədər heç bir dəlil, sübut olmadan Azərbaycanı Ukraynaya yardım etməkdə ittiham edirlər.
“Azərbaycandan muzdlu döyüşçülərin Ukraynaya göndərilməsi ilə bağlı deyilənlər tamamilə absurddur”
Məsələyə münasibət bildirən media eksperti Yadigar Məmmədlinin sözlərinə görə, Rusiya mediasında Azərbaycana yönəlik qaralama kampaniyası bir mərkəzdən idarə olunur: “Rusiya hakimiyyəti Ermənistanı özünə tərəf çəkmək üçün belə kampaniyalara start verir. Biz nəzərə almalıyıq ki, Rusiyada azad mətbuat çox azdır. Telekanallar hakimiyyətin ideoloji təbliğatını həyata keçirir. Eyni zamanda, yuxarıdan gələn tezisləri icra edir. Bütün bunlardan fürsət kimi istifadə edən həm də Rusiya mediasında kök salmış erməni əsilli şəxslərdir. Onlar bundan maksimum istifadə edib Azərbaycanın ünvanına böhtan atırlar. Məqsəd həm də odur ki, Rusiya ictimai rəyində Azərbaycana münasibətdə mənfi fikir formalaşsın. Burada digər məqam ondan ibarətdir ki, Azərbaycan-Ermənistan münasibətlərinin tənzimlənməsində Brüsselin fəallığının artması Moskvanı çox qıcıqlandırır. Rus KİV-lərinin Azərbaycana qarşı aqressiyası həm də buradan qaynaqlanır. Qarabağda erməni separatçılarını himayə etmələri azmış kimi, indi də Azərbaycanı Ukraynaya muzdlu döyüşçü göndərməkdə, silah yardımı etməkdə ittiham edirlər. Məgər Azərbaycanın güclü silah sənayesi var? Biz bir çox silahları xaricdən idxal edirik. O ki qaldı Azərbaycandan muzdlu döyüşçülərinin Ukraynaya getməsinə, bu tamamilə absurd bir məsələdir. Azərbaycan vətəndaşının başqa ölkədə döyüşməsi qanunla qadağandır. Buna görə cinayət işi açılır. Bütün bunlar bəlli məsələlərdir. Ancaq Rusiya mediası bilərəkdən Azərbaycanla bağlı yalan məlumatlar yayır. Hansısa siyasi müstəvidə bunu edə bilmirlər. Çünki ortada real fakt yoxdur. Bu səbəbdən mətbuat üzərindən qaralama kampaniyası ilə məşğul olurlar”.
Media eksperti onu da əlavə etdi ki, bu cür çirkin kampaniya ilə Azərbaycanı öz yolundan döndərə bilməyəcəklər.
Vidadi ORDAHALLI
