Sirr deyil ki, müxtəlif xarici ölkələrdə fəaliyyət göstərən erməni diaspor və lobbisinin Ermənistanda hakimiyyətlərə təsiri hər zaman yüksək olub. Məhz diaspor və lobbi faktoru Ermənistanın Azərbaycanla sülh imzalamasını ləngidən əsas amillərdən biridir. Amma belə görünür ki, Nikol Paşinyan iqtidarı diaspor və lobbinin təsirini neytrallaşdırmağa çalışır. Elə bu da diaspor və lobbi ilə mövcud Ermənistan hakimiyyəti arasında münasibətlərin kəskinləşməsinə səbəb olub.
Hazırda Rusiyada fəaliyyət göstərən erməni diaspor və lobbisinin Ermənistandakı indiki hakimiyyətlə münasibəti əhəmiyyətli dərəcədə kəskinləşib. Rusiyada erməni lobbisini təmsil edənlərin Ermənistana gəlişinə qadağa qoyulması da bunun sübutudur. Xatırladaq ki, Rusiya Dövlət Dumasının MDB işləri üzrə müavini, ermənipərəst Konstantin Zatulinin, “Rossiya Seqodnya” Beynəlxalq İnformasiya Agentliyinin və “Russia Today” telekanalının baş redaktoru Marqarita Simonyanın Ermənistana girişi qadağan edilib. Ermənistan parlamentinin sədri Alen Simonyan bu xüsusda bildirib: “Ermənistan öz suverenliyinə qarşı hörmətsiz münasibətə biganə qala bilməz və sərhədlərimiz bizim “qırmızı xətt”imizdir. Ona görə də bütün dostlar, tərəfdaşlar bunu nəzərə almalıdır. Marqarita Simonyan haqqında isə məlumatım yoxdur. Lakin bu qadağa Simonyana, onun əri Tiqran Keosayana, müxtəlif ölkələrin erməni soyadlı manqurt agentlərinə, eləcə də Ermənistana, onun müstəqilliyinə, keçmiş rəhbərlərinə hörmətsiz münasibət göstərəcək digər şəxslərə də şamil edilə bilər”. Simonyan qeyd edib ki, onlar şəxsi söhbətlərdə Ermənistanın eks-prezidentləri haqqında kifayət qədər təhqiramiz ifadələr işlədirlər: “Bir gün səbrimi itirib bu adamların dediklərini açıqlaya bilərəm”. Ermənistan Avropa Partiyasının sədri Tiqran Xzmalyan isə qeyd edir ki, rus telekanallarının ölkəsinin ərazisində yayımı dayandırılmalıdır: “Ümumiyyətlə, belə qərarların bu qədər gec qəbul edilməsi məni məyus edir. Zatulin rus KQB-sinin davamçısı və nümayəndəsidir. O, həm də Ermənistanın strateji düşməni olan Rusiyanın sadiq nümayəndəsidir. Zatulin əsl meyllərini gizlədirdi, lakin son zamanlarda gizlətməyib, Ermənistanın dövlətçiliyinə qarşı birbaşa və gizli mübarizə aparıb. O, bir çox başqa təbliğatçılar kimi, çoxdan bu statusda olmalı idi. Zatulindən əlavə, Ermənistanda faşist Putin telekanallarının bağlanması da vacibdir. Bu addımı alqışlayıram, amma yetərli deyil”. Ermənistanın “Qraparak” nəşri yazır ki, Zatulin Paşinyan iqtidarı dövründə bir də çətin Ermənistana gələ bilsin: “Konstantin Zatulin “Lazarev Klubu”nun yaradıcısı və prezidentidir. Klub Ermənistan-Rusiya dostluğunun möhkəmləndirilməsinə yönəlib, 2018-ci ildə yaradılıb, ilk sessiyası 30 noyabr 2018-ci ildə keçirilib. Klub geniş iştirakçı kütləsini cəlb edib, ikinci sessiya Moskvada keçirilib. Bir qayda olaraq, sessiyalara Ermənistan hakimiyyətinin nümayəndələri də dəvət olunurdu. Zatulin özü Rusiyanın ən ermənipərəst simalarından biri hesab olunur, Azərbaycanda onu rədd edir, özlərinə düşmən hesab edirlər. Oktyabrın 28-də klub İrəvanda “Ermənistan-Rusiya münasibətlərinin tarixi keçmişi və bu günü” mövzusunda iclas keçirəcəkdi. İclasa çoxlu sayda ekspert, siyasətçi, analitik, jurnalist dəvət olunmuşdu. Ermənistan hökuməti Konstantin Zatulini Ermənistandan qovmaqla, əslində bu sessiyanın baş tutmasına mane oldu”.
Yaxın Şərq və Qafqaz ölkələri üzrə rusiyalı ekspert Stanislav Tarasov bildirir ki, Zatulinlə bağlı bu əhvalat qarşıdan gələn Putin-Əliyev-Paşinyan görüşü fonunda çox mənfi impulsdur. Tarasovun sözlərinə görə, Zatulinlə bağlı qərar qeyri-standartdır, onun müstəqil qəbul edilib-edilmədiyi məlum deyil: “Bu çox pis impulsdur. Mənim də üzvü olduğum “Lazarev” klubu son vaxtlar COVID və digər hallar səbəbindən fəaliyyət göstərmirdi. İndi biz İrəvana çatmaq üzrə idik və Ermənistan hakimiyyətinin Zatulinlə bağlı qərarı verilmişdi. Zatulin Ermənistan rəhbərliyinə, Ermənistanın siyasi rejiminə şəxsi təhlükə təşkil edirmi? Çətin ki. Əgər onlar hansısa təhlükəni müşahidə ediblərsə, bu belə bir fikrə gətirib çıxarır ki, Paşinyan hökuməti hansısa daxili təlatümlərdən və Rusiyanın İrəvandakı varlığından qorxur, bu, hakimiyyətin əsəbi olduğunu göstərir”. Onun sözlərinə görə, bu, Ermənistan-Rusiya münasibətlərində mənfi amildir: “Problem ondadır ki, Ermənistan KTMT-nin üzvü kimi, Rusiyanın həm də AİB çərçivəsində tərəfdaşı kimi müsbət imic qazanmışdı, lakin Bakı diplomatiyası Paşinyanın kobud səhvlərindən istifadə edərək onu neytrallaşdıra bildi. AİB və KTMT üzvü olan Azərbaycan Moskva ilə elə əlaqələr qurub ki, Ermənistan bunu edə bilməyib. Ermənistan hakimiyyətinin Rusiya Federasiyasına qarşı Avropa kartı oynamaq üçün primitiv, əyalət diplomatiyası nəticə verməyəcək”. Rusiyanın “Regnum” informasiya platformasının baş redaktoru Modest Kolerov isə bildirir: “Konstantin Zatulinin Ermənistana girişinə qadağa qoymaqla Paşinyan rejimi göstərir ki, onun artıq Rusiyaya ehtiyacı yoxdur, problemlərin sərbəst müzakirələri lazım deyil”. Onun sözlərinə görə, Paşinyan Rusiyanın ona lazım olmaması məntiqi həddinə çatıb. Kolerov qeyd edib ki, Zatulinin ölkəyə girişinin qadağan edilməsi siyasi diktatura aktıdır: “Bu, siyasi senzura aktıdır, üstəlik, siyasi diktatura aktıdır, çünki Paşinyanın uzaqlaşdırılması fikri ümumi fikirdir, bunda qeyri-adi heç nə yoxdur. Hər bir insanın belə düşünmək hüququ var. İkincisi, çox yaxşı başa düşmək lazımdır ki, Zatulin Rusiyada Ermənistanla bağlı ən mühüm ekspert və lobbiçilərdən biridir. Bu o deməkdir ki, Paşinyan rejiminin dost Rusiyaya ehtiyacı yoxdur, Paşinyan rejimi artıq öz seçimini edib, öz seçimini nümayişkaranə, kobud formada edib”.
Nahid SALAYEV
