Ermənilərin Azərbaycana qarşı bu gün də mina terrorunu davam etdirməsi bizi narahat edir. Heç şübhəsiz, bundan dünya birliyi də narahat olmalıdır ki, Ermənistan terror yuvasına çevrilib.
Ermənilərin Laçın dəhlizindən sui-istifadə edərək törətdiyi bu cinayətlərə Türkiyənin ölkəmizdəki keçmiş hərbi attaşesi, general Yücel Karauz da münasibət bildirib.
Karauz Azərbaycan Xarici İşlər Nazirliyinin Ermənistanın Azərbaycana qarşı hərbi təhdidləri və erməni hərbçilərinin Laçın dəhlizindən sui-istifadə edərək ərazilərimizə mina daşıması haqqında açıqlamasına şərh verərkən mətbuata bildirib ki, ermənilərin bu hərəkətlərinə rus sülhməramılar dəstək verir:
“Burada əsas məsələ Ermənistanın mina istehsal etməsi yox, onu rus sülhməramlıların himayəsində Azərbaycan ərazisinə keçirməsidir. Rəsmi İrəvan bir tərəfdən sülh müqaviləsindən danışır, digər tərəfdən isə təxribatçı addımlar atır”.
O vurğulayıb ki, Laçın dəhlizi ilə keçirilən minaların əksəriyyəti piyada əleyhinə minalardır. “Sözügedən minaların istehsalı və istifadəsi 4 dekabr 1997-ci ildə Kanadanın paytaxtı Ottavada qəbul edilən və 1 mart 1999-cu ildə qüvvəyə minən “Piyada əleyhinə minaların istifadəsi, saxlanması, istehsalı və daşınmasının qadağan edilməsi və onların məhv edilməsi haqqında Konvensiya”ya ziddir. Bu konvensiyaya Ottava Konvensiyası da deyilir. Rusiya sülhməramlıları mina döşənməsinə göz yummaqla törədilən müharibə cinayətinə şərik olur. Yəni bununla, Ermənistanla yanaşı, mina partlayışı nəticəsində hərbçilərimizin şəhid olmasının səbəbkarı həm də Rusiya olur. Rus sülhməramlılarının vəzifəsi bitərəf olmaqdır, lakin onlar, təəssüf ki, Ermənistanın tərəfindədir. Ermənistanın addımları 10 noyabr bəyanatının da pozulması deməkdir. Çünki rəsmi İrəvan çoxdan öz hərbi birləşmələrini Azərbaycandan çıxarmalı, sülh müqaviləsinin imzalanması istiqamətində addımlar atmalı idi. Lakin biz bunu görmürük. Ermənistan belə addımlardan çəkinməli, prosesi manipulyasiya etməməli, öhdəliklərini yerinə yetirməlidir. Çünki Azərbaycanın da səbrinin bir həddi var və Bakının səbr kasası daşanda heç kimin xahiş-minnətinə, telefon zənginə baxmayacaq”, - türkiyəli general vurğulayıb.
“Buna qəsdən şərait yaradılır ki, ermənilər silah, mina daşısınlar, separatçılar bizə atəş açsınlar, aqressivlik göstərsinlər...”
Tanınmış hərbi ekspert Tərlan Eyvazov "Bakı-Xəbər"ə şərhində burada təəccüblü heç nə olmadığını dedi. "Bizim üçün burada təəccüblü nəsə olmamalıdır. Çünki baş verənlər göz qabağındadır. Sayın Paşa olduqca yerində vurğulayıb. Hələ az deyib. Gizlin deyil ki, rus sülhməramlıları adlanan qüvvə ermənilərin hər təxribatına göz yumur, o cümlədən də mina terroruna. Bu baxımdan da, Rusiya sülhməramlıları deyilən bir ifadə heç zaman qəbul edilə bilməz. Çünki Rusiya heç yerdə sülhməramlı olmayıb, ola bilməz də. O özünün məqsədi üçün bura gəlib və onun məqsədi Qarabağdan tamamilə köçüb getməkdə olan erməniləri orda saxlamaq olub. Buna da qismən nail olub. Daha sonra isə özünün burada mövcudiyyətini qorumaq və iki xalq arasında yaranacaq müəyyən istiləşmənin, müəyyən sülh danışıqları perspektivinin qarşısını almaqdan ötrü, təbii ki, Rusiya tərəfi tədbirlər görməli idi. Açıq münaqişə etmək imkanı yoxdur. Ona görə ki, açıq münaqişə olarsa Rusiya burda sülhməramlı funksiyasını itirə bilər. Münaqişə olarsa, təbii ki, Azərbaycan Ordusunun bir gün ərzində ordan bütün erməniləri çıxarması da mümkündür. Ona görə, ən əvvəl partizan müharibəsi istiqamətində işlər görüldü və bunun qarşısı ordumuz tərəfindən qətiyyətlə alındı. İndi isə mina müharibəsi gedir. Laçın dəhlizində məhz Rusiya hərbiçiləri durduğu üçün onlar tərəfindən maşınlar yoxlanılmalıdır, silah keçirilməsinin qarşısı alınmalıdır, beynəlxalq axtarışda olan adamlar saxlanılıb bizə təhvil verilməlidir. Bunların heç biri yerinə yetirilmir. Rusiya hərbiçiləri öz öhdəliklərini yerinə yetirmək əvəzinə bunun əksini edirlər”.
T.Eyvazov qeyd etdi ki, ruslar bunu qəsdən edirlər, səbəb də iki xalq arasında barışın baş tutmamasıdır: “Çünki buna qəsdən şərait yaradılır ki, ermənilər silah, mina daşısınlar, separatçılar bizə atəş açsınlar, aqressivlik göstərsinlər və ermənilərlə bizim aramızda heç bir sülh, barış olmasın, Rusiya sülhməramlıları növbəti 5 ildə də burda qalmış olsun. Bu hamıya aydın olan bir məsələdir”.
T.Eyvazovun qeyd etdiyinə görə, Avropanın araçılığı ilə Paşinyan sülh yönündə addımlar atmaq istəyir, Azərbaycan da bu istiqamətdə olduqca ciddi iş aparır, amma yenə də burda Rusiya faktoru var, bu da ondan ibarətdir ki, onlar məsələnin bu şəkildə qalmasını istəyirlər.
İradə SARIYEVA
