Ermənilərin azərbaycanlılara məxsus məzarlıqları minaladığı barədə uzun müddət idi ki, danışılırdı. Bu məlumat artıq faktlarla öz təsdiqini tapıb.
ANAMA-dan bildirilib ki, Ağdam rayonunun Yusifcanlı və Qarağacı, Cəbrayılın Cocuq Mərcanlı, Laçın rayonunun Suarası kəndlərində yerləşən mərazlıqların minalanmasına dair dəqiq məlumatlar var.
ANAMA-dan verilən məlumata görə, agentlik tərəfindən aparılan tədqiqat və təmizləmə əməliyyatları zamanı keçmiş təmas xətti və bu ərazilərin ətrafında yerləşən bağlar, meşələr, üzümlüklər, dağıdılmış yaşayış məskənləri, məzarlıqlar, çay kənarları və.s yerlərin ciddi şəkildə minalarla çirkləndirilməsi aşkar edilib: “Agentlikdə Ağdam rayonunun Yusifcanlı və Qarağacı, Cəbrayılın Cocuq Mərcanlı, Laçın rayonunun Suarası kəndlərində yerləşən mərazlıqların minalanmasına dair dəqiq məlumatlar var.
2021-ci ildə Ağdam rayonunun Yusifcanlı kənd mərazlığında 2 nəfər mülki şəxsin həlak olması, 2 nəfərin xəsarət alması, həmçinin son hadisə olaraq 21 oktyabr tarixində Laçın rayonunun Suarası kənd məzarlığında 1 nəfər şəxsin həlak olması, digər birinin xəsarət alması ilə nəticələnən mina hadisələri buna sübutdur”.
Ermənilər çox yaxşı bilirlər ki, azərbaycanlılar elə ilk fürsətdə əzizlərinin məzarını ziyarət etmək üçün qəbiristanlıqlara gedəcəklər, bu səbəbdən də oraları minalayıblar. Əlbəttə, onların qəbiristanlıqları minalamaqda məqsədləri böyük insan tələfatına nail olmaqdır.
“Beynəlxalq təşkilatlar seyrçi mövqedə dayanmaqdan, nəhayət ki, əl çəkməlidirlər”
İSBAM sədri Samir Adıgözəlli bildirdi ki, müharibə qurtarsa da, ermənilərin mina terroru davam edir və bu terrorun da əsas hədəfi mülki insanlardır. “Yayılan rəsmi informasiya da sübut edir ki, post müharibə dövründə də ermənilərin müharibə cinayətləri davam edir. Bu açıq göstərir ki, erməni terrorçularının əsas hədəfi mülki əhalidir. Onlar müqəddəs yerlərimizə, qəbiristanlıqlarımıza da mina basdırıblar. Bu bizə imkan verir ki, Ermənistanın müharibə cinayətlərini beynəlxalq məhkəmələrə çıxaraq və bu ölkəyə qarşı daha sərt tədbirlər görülməsinə nail olaq. Məzarlıqlarımıza minaların basdırılması bir daha təsdiqləyir ki, Ermənistan dövlət səviyyəsində terrorla məşğul olur. Ermənilər yaxşı bilir ki, azərbaycanlılar öz doğma yurdlarına qayıtdıqdan sonra ilk olaraq müqəddəs yerləri ziyarət edəcəklər. Bu müqəddəs yerlər də əzizlərinin dəfn edildiyi qəbiristanlıqlardır. Məzarlıqlarımızın minalanması Ermənistanın məqsədli şəkildə həyata keçirdiyi mina terroru aksiyasıdır ki, dünya buna biganə qalmamalıdır. Müharibə qurtarıb, amma bizim ölkəmizdə hər gün mina partlayır və dinc insanlarımız ya həyatını itirirlər, ya da şikəst olur. Ermənistanın bu cinayəti cavabsız qalmamalıdır”.
S.Adıgözəlli hesab edir ki, Azərbaycanın xarici ölkələrdəki səfirlikləri, diplomatları, habelə xaricdəki diaspor qurumları bu insanlığa zidd, bəşəriyyət əleyhinə olan cinayətləri dünyaya yaymalıdır. “Beynəlxalq təşkilatlar seyrçi mövqedə dayanmaqdan, nəhayət ki, əl çəkməlidirlər. Ermənistan tərəfindən minalanmış ərazilərimizdə, məzarlıqlarımızda monitorinq aparmaq, hadisələri müşahidə etmək üçün beynəlxalq missiya, xarici media təmsilçiləri, diplomatlar dəvət edilməlidir. Bu ciddi bir faktdır ki, bunu biz dünyaya yaymalıyıq.
Biz Ermənistandan mina xəritələrini istəyirik, onlar oyunbazlıq edir, saxta xəritələr verib həm bizi, həm də dünyanı aldadırlar. Məzarlıqların minalanması məsələsini Azərbaycan tərəfi çox ciddi şəkildə dünyanın qarşısına qoymalıdır”.
S.Adıgözəlli qeyd etdi ki, nə ötən 30 ildə, nə də indi Ermənistan heç bir beynəlxalq konvensiyanı, sənədləri, BMT-nin qəbul etdiyi qətnamələri qəbul etməyib, tanımayıb. Qurum rəhbəri hesab edir ki, Ermənistanın bu gün də davam edən mina terroruna qarşı dünya birliyi həmrəy olmalıdır. O qeyd etdi ki, erməni terroru yalnız Qafqaz üçün yox, bütün dünya üçün ciddi təhdiddir.
İradə SARIYEVA
