Son günlərin ən çox diqqət çəkən hadisələrindən biri də erməniyönümlü rus ekspertlərin, deputatların, media nümayəndələrinin rəsmi İrəvan tərəfindən “persona non-qrata” elan olunmalarıdır. Rusiya Dövlət Dumasının MDB, Avrasiya inteqrasiyası və həmvətənlərlə əlaqələr komitəsinin sədr müavini Konstantin Zatulinlə bağlı Ermənistan tərəfindən bu xüsusda atılan addımlar xüsusi diqqət cəlb edir.
Zatulinin Ermənistana səfərləri “arzuolunmaz” hesab edilib. “Azatutyun” radiosu yazır ki, bu barədə ilk məlumatı Zatulinin özü teleqram-kanalda yayıb. O, eyni zamanda bu barədə ona Ermənistan parlamenindən göndərilən məktubu dərc edib: “Ermənistan Respublikası parlamenti rəhbərliyinin tapşırığı ilə sizə təəssüflə məlumat veririk ki, sizin son vaxtlar Ermənistan Respublikasına ünvanlanmış bəyanatlarınız ölkələrimiz arasında dost və starteji münasibətlərə ziyan vurur. Bununla əlaqədar sizin bundan sonra Ermənistan Respublikasına gəlişiniz arzuolunmaz hesab edilir”. Zatulin bu qərarın onun üçün gözlənilməz və təhqiramiz olduğunu yazıb. Qeyd edək ki, Zatulin İrəvanda keçirilən “Lazarev klubu”nun iclasında iştirak etməli idi. Ermənistanın “Aykakan Jamanak” qəzeti xatırladır ki, Zatulin çıxışlarında baş nazir Nikol Paşinyanı 44 günlük müharibədə məğlubiyyətə görə ittiham edib. Qəzetin yazdığına görə, o, ölkənin daxili siyasətinə qarışıb və hətta Paşinyanın istefasını tələb edib. Zatulin iki həftə bundan əvvəl “Yerkir media” saytına müsahibəsində Paşinyanı “Azərbaycana dəhliz verən” sənədi imzalamaqda ittiham edib: “O və ermənilər bu sualı niyə Rusiyaya ünvanlayırlar? Sizin baş naziriniz belə bir şərtə qol çəkib”. İqtidar deputatı, baş nazirin qohumu Qraçya Akopyan bildirib ki, hansısa xarici siyasətçinin Ermənistanın daxili siyasi həyatı ilə bağlı bu sayaq bəyanatları qəbuledilməzdir. Akopyan qeyd edib ki, bütün bunlar nəzərə alınanda parlamentin reaksiyası ədalətli və gözlənilən olub: “Əgər başqa ölkənin siyasətçisi bizim daxili siyasi həyatımıza qarışırsa və baş nazirin istefaya getməsi haqda bəyanat verirsə, hesab edirəm ki, bu addım, yəni onun Ermənistana girişinin qadağan edilməsi gözləniləndir və yerindədir. Bildiyimə görə, bu, Zatulinin ilk belə bəyanatı deyil. O ilk dəfə deyil ki, Ermənistanın daxili siyasətinə qarışır. Burda məsələ təhdiddə deyil. Niyə biz xarici ölkə vətəndaşına imkan verməliyik ki, bizim daxili işlərimizə müdaxilə etsin? Əgər o məmurdursa, lap pis”. Rusiyalı tanınmış hərbi ekspert, “Mülki müdafiə” jurnalının baş redaktoru İqor Korotçenko da İrəvanın Zatulinə Ermənistana giriş qadağası qoymasına reaksiya verib. Korotçenko yazıb: “30 il erməni maraqlarına xidmət etmək – sonra pişik kimi zibil qabına atılmaq...”.
Sabiq prezident Robert Köçəryanın lideri olduğu “Hayastan” fraksiyası da baş verənlərə görə bəyanat yayıb. Burada qeyd edilir ki, Ermənistan hakimiyyətinin addımları Bakı və Ankaranın tələblərini yerinə yetirməyə hesablanıb: “Təsadüfi deyil ki, bu hakimiyyətin hədəfi illərdir Türkiyə və Azərbaycan tərəfindən tənqid edilən, ictimai, peşəkar və ya siyasi fəaliyyətlərində Ermənistanın, Qarabağ ermənilərinin və Rusiyanın maraqlarına cavab verən yanaşmaları rəhbər tutan şəxslərdir. Paşinyan və onun komandasının təqiblərinə daha bir misal “Lazarev klubu”nun koordinatoru, Rusiya Dövlət Dumasının deputatı Konstantin Zatulinin Ermənistana girişinə qadağa qoyulmasıdır. Maraqlıdır ki, cənab Zatulinin Ermənistanda arzuolunmaz şəxs olması və ölkəyə girişinə qadağa qoyulması ilə bağlı verdiyi izahat parlamentin Xarici əlaqələr şöbəsinin müdiri tərəfindən göndərilib. Hakimiyyətin bu addımı bir tərəfdən Bakı və Ankaranın tələblərini təmin etmək, digər tərəfdən isə Ermənistanla Rusiya arasında dostluq və müttəfiqlik münasibətlərini pozmağa yönəlib”. Qeyd olunub ki, “Hayastan” bloku Ermənistanın hazırkı hakimiyyətinin bu növbəti anti-erməni addımını qətiyyətlə pisləyir və təsdiq edir ki, mövcud siyasət altında Ermənistanın təhlükəsizliyinə çağırışlar artmaqdadır. Erməni politoloq Arman Qukasyan vurğulayır ki, Ermənistan hakimiyyəti Bakı ilə sinxron işləyir. O bildirib ki, Zatulinə qoyulan qadağa təəccüblü deyil: “Konstantin Zatulinin Ermənistana girişinə qadağa qoyulması məni təəccübləndirmir. Çünki onun əvvəllər Azərbaycana girişi qadağan edilib və belə görünür ki, bizim hakimiyyət Bakının hakimiyyət orqanları ilə sinxron hərəkət edir. Bakı məsələsində Zatulinin ermənipərəst fəaliyyətini nəzərə alsaq, təəccüblənmirik, Ermənistan məsələsində isə bunu sadəcə dəlilik adlandırmaq olar. Çünki Konstantin Zatulin fəaliyyəti Ermənistanın dövlət maraqlarından və Ermənistan-Rusiya münasibətlərindən irəli gələn Rusiyanın nadir siyasətçilərindən biridir”. O qeyd edib ki, Zatulin həmişə mövcud situasiya əsasında hərəkət edib, bunu ayıq-sayıq qiymətləndirib. Görünür, Ermənistan hakimiyyəti onun, mövcud reallıqlara əsaslansa da, maraqlara uyğun gəlməyən şərhlərini bəyənmir: “Təəssüf edirəm ki, Ermənistan hakimiyyəti dövlət maraqlarını deyil, dar siyasi və şəxsi maraqları rəhbər tutduğunu bir daha sübut etdi. Zatulin onilliklər ərzində ermənipərəst siyasətçi olub və hakimiyyətin onunla bu cür rəftar etməsi təəssüf doğurur. Baxmayaraq ki, qəti şəkildə deyə bilərəm ki, bu, Ermənistan cəmiyyətinin və xalqının münasibətini əks etdirmir. Bütün bunlar onu göstərir ki, Ermənistan hakimiyyəti Brüssel formatının tərəfdarıdır. O, Rusiyanın maraqlarından yan keçərək Qərb, Azərbaycan və Türkiyə ilə birlikdə Brüssel formatı çərçivəsində Qarabağ məsələsini bağlamağa çalışır. Bu, Əliyev-Putin-Paşinyan üçtərəfli görüşü ərəfəsində atılan növbəti anti-Rusiya addımıdır və sadəcə qəbuledilməzdir”. Bu arada o da bəlli olub ki, erməni əsilli rus jurnalist, “Rossiya Seqodnya” Beynəlxalq İnformasiya Agentliyinin və “Russia Today” telekanalının baş redaktoru Marqarita Simonyanın da Ermənistana girişi qadağan edilib. Bu barədə Marqarita Simonyan özünün teleqram kanalında yazıb: "Uzun illər Ermənistanın qatı himayədarı olan Konstantin Zatulinin Ermənistana girişi ölkənin hazırkı lideri tərəfindən qadağan edilib. Yeri gəlmişkən, mənim də".
Samirə SƏFƏROVA
