Rusiyanın dövlət telekanalı “Rossiya 24” “Birinci” kanalının ardınca Bakıya qarşı növbəti təxribat dolu reportaj yayımlayıb. Telekanalın Ermənistanla bağlı reportajında Azərbaycana qarşı əsassız ittihamlar irəli sürülüb.
Süjetdə danışan erməni əsilli rusiyalı ekspertlər Semyon Baqdasarov və Ayk Xalatyan Azərbaycanın milli maraqlarına tam zidd olan absurd fikirlər səsləndirib. Süjetdə həmçinin qeyd olunur ki, guya Azərbaycan tərəflər arasındakı bütün razılaşmaları pozur və hətta “Amerika ilə əlbir olaraq Rusiyaya qarşı çıxır”.
Rusiya kanalı reallığı bir kənara qoyaraq Azərbaycanı günahlandırmaq istəyir.
Bu təbliğata Rusiyanın dövlət kanallarının da qoşulması çox maraqlıdır və Azərbaycanla olan müttəfiqlik prinsiplərinə uyğun gəlmir. Rusiyanın bu davranışlarına bizim cavabımız necə olmalıdır?
Müşfiq Ələsgərli: “Əvvəllər Rusiyanın rəsmi dairələri “müstəqil” KİV-lərin arxasında gizlənərək bunu edirdilərsə, indi onların öz başları görünür”
Media eksperti Müşfiq Ələsgərli “Bakı-Xəbər”ə açıqlamasında bildirdi ki, Rusiya mediasında Azərbaycana qarşı təbliğatın aparılması yeni hal deyil: “Bu proses uzun illərdi ki, davam edir. Son iki il ərzində, yəni İkinci Qarabağ müharibəsinin başlanmasından sonra bu təbliğatda xüsusi bir sərtləşmə hiss olunmaqdadır. Problem ondadır ki, Rusiyanın mediası nəinki Azərbaycana qarşı təbliğat aparır, həm də ədalətsizlik etmiş olur. Qərəzlidir və yalan üstündə qurulur. Onlar bizim əzəli torpaqlarımız olan Qarabağın və ətraf ərazilərin Ermənistana aid olduğunu deyirlər. Ermənilərin həmin ərazilərdə yaşamaq üçün təməl hüquqlarının olmasını təbliğ edirlər. Bütün bunlar yalandır. Bizim ərazi bütövlüyümüz BMT tərəfindən tanınıb. Rusiya mediasında gedən təbliğat həm də ona görə bizə təsir edir ki, yalançı faktlara söykənir və qərəzlidir. Son dövrlər bu təbliğatda yeni nüanslar üzə çıxıb. İndiyə kimi bu təbliğatı adı müstəqil olan kanallar aparırdısa, hazırda burda Rusiya dövlətinin təsiscisi olduğu kanalların da yer aldığını görürük. Rusiyanın dövlət televiziyalarında belə qərəzli təbliğatın aparılması artıq qəbuledilməz bir haldır. Məsələnin digər tərəfi budur ki, biz bu məsələdə birbaşa Rusiya dövlətinin maraqlı olduğunu hiss edirik. İkinci Qarabağ müharibəsi zamanı Azərbaycanın əksər dövlət kanalları Azərbaycana qarşı təbliğat aparırdılar, biz onlara yalnız dostcasına cavab verirdik. Ukrayna - Rusiya müharibəsi başlayandan sonra Rusiyada xüsusi qanun qəbul edildi. Kimlər ki hərbi əmliyyatları öz adı ilə çağırdı, həmin saytları bloklamağa başladılar. Həmin saytların arasında 7-yə yaxın Azərbaycan saytı da var. Bloklamanı həyata keçirən isə Rusiyanın dövlət qurumudur. Əvvələr Rusiyanın rəsmi dairələri “müstəqil” KİV-lərin arxasında gizlənırək bunu edirdilərsə, indi onların öz başları görünür. Artıq Azərbaycan da cavab tədbirləri görməyə məcburdur. Bizim də dövlət televiziyası onlara cavab verməyə başlayıb. İki ay bundan əvvəl biz Rusiyanın qərəzli təbliğat aparan iki saytını haqlı olaraq bloklamışıq. Artıq nə varsa, öz adı ilə çağırmalıyıq. Rusiyanın bütün qərəzli addımlarına adekvat cavablar verilməlidir”.
Məhəmmədəli QƏRİBLİ
