Fransa prezidenti Emmanuel Makron yenə Azərbaycana qarşı sərsəmləyib. Yenə də heç bir tutarlı əsas olmadan Azərbaycana yönəlik ittihamlar səsləndirib və Ermənistanla toqquşmaları Ukrayna müharibəsi ilə müqayisə edib.
Fransa prezidenti Romada Müqəddəs Egidius İcmasının “Sülh üçün fəryad – Dialoqda Dinlər və Mədəniyyət” forumunda çıxışı zamanı deyib ki, Qafqazdakı müharibəni unutmamalıyıq: “Ukrayna münaqişəsi dünyaya başqa müharibələri unutdurmamalıdır. Ukraynadakı müharibə Avropamızı parçalayır, şoka salır, həyatımızı dəyişdirir, lakin mən istəmirəm ki, bu bizə digər müharibələri unutdursun. Məsələn, Qafqazdakı müharibə, erməni xalqının başına gələnlər, Suriya, İraq, Somali, Yaxın və Orta Şərq müharibələri. Bir tərəfdə aqressiya qurbanı olan xalq, digər tərəfdə hücuma keçmək, işğal etmək və aşağılamaq qərarına gələn liderlər var. Bu vəziyyətdə kənarda qalmaq, neytrallığı qorumağın mümkün olduğunu düşünmək güc qanununun universallaşdığını etiraf etmək deməkdir”.
Görünən odur ki, Makron Azərbaycanla bağlı qərəzli, ədalətsiz mövqe sərgiləməkdə qərarlıdır. Belə olmasaydı, qısa fasilədən sonra Azərbaycanı yenidən ittiham etməzdi.
“Bir ara Makron Putinin qarşısında tir-tir əsirdi, indi isə, necə deyərlər, “kişilənir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Makronun aşırı ermənipərəstliyi region uğrunda gedən geosiyasi mübarizənin tərkib hissəsidir: “Məsələ ondadır ki, Fransa bütün vasitələrlə Cənubi Qafqaza soxulmaq istəyir. Bununla bağlı ermənilərdən bir alət kimi istifadə edirlər. Fransanın milli simvolu xoruzdur. Görünən odur ki, Makron da xoruzlanmağı xoşlayır. Fransanın praktiki olaraq bura gəlib nəsə etməsi mümkün deyil. Eyni zamanda, Fransada ənənəvi türk düşmənçiliyi var. Makronun məlum həyasızlığı həm də bununla bağlıdır. İndi də Rusiyanın zəifləməsini fürsət hesab edib regiona yerləşmək istəyirlər. Bir ara Makron Putinin qarşısında tir-tir əsirdi, indi isə necə deyərlər, “kişilənir”. Rusiya da Cənubi Qafqazı əldən vermək istəmir. Ona görə də bölgə uğrunda mübarizə gedir. Böyük Britaniya Avropa İttifaqından çıxandan sonra Fransa istəyir ki, qurumda təşəbbüsü ələ alsın. Bütün bunlar narahatlıq doğuran məqamlardır. Azərbaycanda 60-a yaxın Fransa şirkəti fəaliyyət göstərir, pul qazanır. Xristian amili də Fransanın ədalətsiz olmağında müəyyən rol oynayır. Maraqlı olan həm də odur ki, Azərbaycanda Qərbin maraqlarından çıxış edən siyasilər tülkü kimi susublar, səsləri çıxmır. Belədə Qərbə inteqrasiyadan dəm vururlar. Bu adamlar yeri gələndə hamını ittiham edirlər, amma Fransaya münasibətdə ortaya mövqe qoymurlar. O üzdən biz dövlət olaraq özümüzü belə ünsürlərdən qorumalıyıq”.
Vidadi ORDAHALLI
